اقش-تىڭ اپايتوستەرى ايبارلى
وتاندىق ەركىن كۇرەس شەبەرلەرى اراسىنان ەڭ ۇزدىك كورسەتكىشكە 86 كگ سالماق دارەجەسىندە كۇش سىناسىپ جۇرگەن ازامات داۋلەتبەكوۆ قول جەتكىزىپ وتىر. 29 جاستاعى سەمەي ءوڭىرىنىڭ تۋماسى سوڭعى ەكى جىلدا ازيا بىرىنشىلىگىن ەكى مارتە ۇتىپ, الەم چەمپيوناتىندا ەكى رەت قولا جۇلدەگەر اتاندى. سەربيانىڭ استاناسىندا جالاۋى جەلبىرگەن دۇنيەجۇزىلىك دودادا ازامات كەلەسى جىلى پاريجدە الاۋى تۇتاناتىن وليمپيا ويىندارىنىڭ ليتسەنزياسىنا يەلىك ەتتى.
ءدال سول بەلگرادتا ايدى اسپانعا ءبىر-اق شىعارىپ, كۇرەستىڭ وسى تۇرىنەن قازاقستاننان شىققان تۇڭعىش الەم چەمپيونى رەتىندە ەسىمى تاريحتا قالاتىن ريزابەك ايتمۇحان 92 كگ سالماقتا ءۇشىنشى ساتىعا جايعاستى. 19 جاستاعى جامپوز كۇنى كەشە عانا وليمپيادالىق سالماققا اۋىساتىنىن جاريا ەتتى. ال ول جەردە ازيا چەمپيوناتىندا ءتورت رەت جەڭىس تۇعىرىنا كوتەرىلىپ, ريو وليمپياداسىندا باق سىناعان الىشەر ەرعالي بار. ساقا سپورتشى وڭايلىقپەن ءوز ورنىن ەشكىمگە بەرە قويمايتىنى انىق. ياعني الداعى ۋاقىتتا 97 كگ سالماق دارەجەسىنىڭ تىزگىنىن ۇستاۋعا كىمنىڭ لايىق ەكەنىن قوس ساڭلاق ءوزارا ايقاستا انىقتايدى. قالاي بولعاندا دا, قازاق سپورتى ودان ەش ۇتىلمايدى. ويتكەنى باسەكەلەستىك بار جەردە ناتيجەنىڭ دە بولاتىنى بەلگىلى.
بەلگرادتا بەسىنشى ورىندى قاناعات تۇتقان بولات ساقاەۆ 79 كگ سالماقتىلاردىڭ اراسىندا التىنشى ورىنعا تابان تىرەدى. ال وزگە جەرلەستەرىمىز مىناداي ساتىلارعا جايعاستى: مەيرامبەك قارتباي (57 كگ), نۇرقوجا قايپانوۆ (74 كگ), بەكزات ۇركىمباي (97 كگ), يۋسۋپ باتىرمۇرزاەۆ (125 كگ) – 12, الىشەر ەرعالي (97 كگ) – 13, دارحان ەسەنعالي (74 كگ) – 14, راحات قالجان (57 كگ), ءوسىمجان داستانبەك (61 كگ) – 16, سانجار دوسجانوۆ (70 كگ) – 18, نۇربولات ابدوللاەۆ (61 كگ) جانە ءادىل وسپانوۆ (65 كگ) – 19 ورىن.
ەركىن كۇرەستە اقش-تىڭ ادۋىنى وتە كۇشتى. امەريكانىڭ 12 ءاپايتوسى توپ-10-دىققا ەنىپ وتىر. ەڭ عاجابى, سولاردىڭ بەس بالۋانى الەمدىك رەيتينگتە كوش باستاپ تۇر. ەكىنشى ورىندا – گرۋزيا قۇراماسى. قاپ تاۋىنىڭ 9 قىرانى كۇشتىلەردىڭ قاتارىنا قوسىلسا, ەكەۋىنىڭ وزگەلەردەن وق بويى وزىق. يران كومانداسى ءۇشىنشى ورىندى يەلەنۋدە. پارسى ەلىنىڭ 8 پەحلەۆانى ۇزدىكتەر ساناتىندا. موڭعوليا, ازەربايجان جانە تۇركيانىڭ دا تاسى ورگە دومالاپ تۇر. ولاردىڭ 6 وعىلانى ءدال سول مەجەدەن كورىنۋدە. سونداي-اق ۇزدىك وندىقتىڭ قاتارىنا مىنا مەملەكەتتەردىڭ مارقاسقالارى ەندى: وزبەكستان مەن جاپونيا – 5, قىرعىزستان, ارمەنيا, سلوۆاكيا, پولشا – 4, ماجارستان, رەسەي, قازاقستان – 3, سەربيا, قىتاي, پۋەرتو-ريكو, ۋكراينا, باحرەين – 2, البانيا, ارگەنتينا, بولگاريا, يزرايل, گرەكيا, سان-مارينو, گەرمانيا جانە يتاليا – 1.
توپ-3 (ەركىن كۇرەس)
57 كگ: 1. ستەفان ميچيچ (سەربيا), 2. زەليمحان اباكاروۆ (البانيا), 3. ۆانحاو تسۋ (قىتاي). 61 كگ: 1. شوتا پارتەنادزە (گرۋزيا), 2. تايىربەك جۇماشبەك ۇلى (قىرعىزستان), 3. ۆيتالي ورۋدجەۆ (اقش). 65 كگ: 1. يسمايل مۋسۋكاەۆ (ماجارستان), 2. سەباستيان ريۆەرا (پۋەرتو-ريكو), 3. راحمان اموۋزادحاليلي (يران). 70 كگ: 1. زەين ريزەرفورد (اقش), 2. ەرنازار احماتاليەۆ (قىرعىزستان), 3. ارمان اندرەاسيان (ارمەنيا). 74 كگ: 1. كايل دەيك (اقش), 2. سونەر دەميرتاس (تۇركيا), 3. تايمۇراز سالكازانوۆ (سلوۆاكيا). 79 كگ: 1. موحامماد نوحودي (يران), 2. ۆاسيلي ميحايلوۆ (ۋكراينا), 3. ۆلاديمير گامكرەليدزە (گرۋزيا). 86 كگ: 1. داۆيد تەيلور (اقش), 2. ازامات داۋلەتبەكوۆ (قازاقستان), 3. حاسان يازداني (يران). 92 كگ: 1. ميراني مايسۋرادزە (گرۋزيا), 2. وسمان نۇرماگومەدوۆ (ازەربايجان), 3. ريزابەك ايتمۇحان (قازاقستان). 97 كگ: 1. كايل سنايدەر (اقش), 2. ماگومەدحان ماگومەدوۆ (ازەربايجان), 3. گيۆي ماتشاراشۆيلي (گرۋزيا). 125 كگ: 1. تاحا اقگۇل (تۇركيا), 2. گەنو پەترياشۆيلي (گرۋزيا), 3. ءامىر حوسسەين ابباس (يران).
تۇرىكتەردىڭ تاسى ورگە دومالادى
گرەك-ريم كۇرەسىن سەرىك ەتكەن ءتورت جەرلەسىمىز توپ-10-دىقتىڭ قاتارىندا. سولاردىڭ اراسىندا نۇرسۇلتان تۇرسىنوۆتىڭ وزگەلەردەن كوشى ىلگەرى. 87 كگ سالماق دارەجەسىندە كۇش سىناساتىن 32 جاستاعى اككى بالۋان ازيا چەمپيوناتتارىندا 1 التىن, 2 كۇمىس جانە 1 قولا مەدالدى ولجالادى. 2021 جىلى توكيو وليمپياداسىندا باق سىنادى. كۇنى كەشە عانا تۇرسىنوۆ بەلگرادتاعى الەمدىك دودادا ونەر كورسەتتى. سول جارىستا قازاقستاننىڭ «كلاسسيكتەرى» اراسىنان جالعىز ءوزى عانا پاريج وليمپياداسىنىڭ جولداماسىن قورجىنعا سالدى. قازىرگى كەزدە نۇرسۇلتان الەمدىك رەيتينگتە ۇزدىك ۇشتىكتى تۇيىندەپ تۇر.
55 كگ سالماقتاعى امانعالي بەكبولاتوۆ بەسىنشى ورىندى ەنشىلەسە, مارلان مۇقاشەۆ سەگىزىنشى ساتىعا جايعاستى. بۇل بالۋانداردىڭ ەرەسەكتەر سايىسىندا ءالى دە وراسان زور تابىستارعا قول جەتكىزە العان جوق. دەسەك تە امانعالي بىلتىرعى الەم چەمپيوناتىندا بەسىنشى ورىنعا تابان تىرەسە, مارلان بيىل ءدال سول مەجەدەن كورىندى. 72 كگ سالماقتاعى يبراگيم ماگومادوۆ سەگىزىنشى ورىنعا تۇراقتادى. بىلتىر ول قازاقستاننىڭ گرەك-ريم كۇرەسى شەبەرلەرى اراسىنان استانادا ۇيىمداستىرىلعان ازيا چەمپيوناتىندا جالعىز ءوزى باس جۇلدەنى ولجالادى. بيىلعى بەلگرادتاعى الەمدىك دودادا يبراگيم جەڭىس تۇعىرىنا كوتەرىلە المادى. ال قازاقستاننىڭ وزگە بالۋاندارى UWW رەيتينگىندە مىناداي ورىنداردى يەلەنۋدە: دەمەۋ جادىراەۆ (77 كگ) – 11, مۇحامەدالى مامىربەك (63 كگ) پەن دياس قالەن (82 كگ) – 12, ايدوس سۇلتانعالي (60 كگ) – 14 جانە نۇرسۇلتان بازارباەۆ (60 كگ) – 20 ورىن.
الەمدىك رەيتينگتىڭ توپ-10-دىعىندا ازەربايجاننىڭ 10 ءاپايتوسى بار. تۇركيانىڭ 8 تارلانى سول تىزىمدە. يران, گرۋزيا, ماجارستان جانە سەربيانىڭ سايىپقىراندارى دا سەنىم ۇدەسىنەن شىعۋدا. ولاردىڭ جەتى جىگىتى مىقتىلار ساناتىندا. وزبەكستان مەن قىتايدىڭ دا قارقىنى جامان ەمەس. بۇل مەملەكەتتەردىڭ التى ءاپايتوسىنىڭ ايدارىنان جەل ەسىپ تۇر. سونداي-اق ۇزدىكتەر تىزىمىنە مىنا ەلدەردىڭ ورەندەرى ەندى: ارمەنيا – 5, قازاقستان, مولدوۆا – 4, رۋمىنيا, قىرعىزستان, بولگاريا, كۋبا – 3, جاپونيا, اۋستريا, ۋكراينا, نورۆەگيا – 2, اقش, فرانتسيا, گەرمانيا, شۆەتسيا, دانيا, چەحيا, يتاليا, مىسىر جانە ليتۆا – 1.
ساپا جاعىنا كەلەر بولساق, بۇل رەتتە تۇركيانىڭ تاسى ورگە دومالاپ تۇر. قازىرگى كەزدە انادولى ەلىنىڭ ءۇش بىردەي ءاپايتوسى الەمدىك رەيتينگتە الدىنا جان سالار ەمەس. ولار – سەلجۋك كان (72 كگ), بۇرحان اقبۇداق (82 كگ) جانە ءالي شىڭعىس (87 كگ). ارينە, وعان ەش تاڭدانۋعا بولمايدى.ويتكەنى تۇرىكتەردە جەڭىسپەن ورىلگەن باي ءداستۇرى, مىقتى باپكەرلىك مەكتەبى مامانداندىرىلعان عىلىمي-زەرتتەۋ ينستيتۋتتارى بار. ءبىر سوزبەن ايتساق, اتالعان مەملەكەتتە بالۋاندىق ونەردىڭ دامۋىنا قولايلى جاعدايدىڭ بارلىعى جاسالعان. سونىڭ ارقاسىندا تۇركيادا جالىندى ءارى قارۋلى جاستاردىڭ قالىڭ شوعىرى بىرىنەن كەيىن ءبىرى شىعىپ جاتىر.
UWW رەيتينگتىڭ كوشباسشىلارى قاتارىندا ازەربايجان مەن قىرعىزستاننان ەكى-ەكى بالۋاننان بار. ولار – ەلدەنيز ءازيزلي (55 كگ) مەن حاسرات جافاروۆ (67 كگ) جانە جولامان شارشەنبەكوۆ (60 كگ) پەن اقجول ماحمۇتوۆ (77 كگ). وعان دا ەش تاڭدانبايمىز. كۇنى كەشە عانا بەلگرادتا اياقتالعان الەم چەمپيوناتىندا قاپ تاۋىنىڭ قىراندارى 2 التىن مەن 3 كۇمىس الىپ, جالپى كوماندالىق ەسەپتە ءبىرىنشى ورىن السا, قورجىنىندا قوس التىنى بار الاتاۋدىڭ ارعى بەتىندەگى كورشىلەرىمىز ۇزدىك ۇشتىكتى تۇيىندەدى. مىنە, بۇل كۇندەرى گرەك-ريم كۇرەسىندە وسى مەملەكەت وكىلدەرىنىڭ اسىعى الشىسىنان تۇسۋدە.
توپ-5 (گرەك-ريم كۇرەسى)
55 كگ: 1. ەلدەنيز ءازيزلي (ازەربايجان), 2. نۋگزاري تسۋرتسۋميا (گرۋزيا), 3. پويا دادمارز (يران). 60 كگ: 1. جولامان شارشەنبەكوۆ (قىرعىزستان), 2. ليگۋو تساو (قىتاي), 3. كەنەشيرو فۋميتا (جاپونيا). 63 كگ: 1. لەري ابۋلادزە (گرۋزيا), 2. گراچيا پوگوسيان (ارمەنيا), 3. تالەح مامادوۆ (ازەربايجان). 67 كگ: 1. حاسرات جافاروۆ (ازەربايجان), 2. دجوني حەتسۋرياني (گرۋزيا), 3. لۋيس ورتا سانچەس (كۋبا). 72 كگ: 1. سەلجۋك كان (تۇركيا), 2. يبراگيم گانە (فرانتسيا), 3. ءالي ارسالان (سەربيا). 77 كگ: 1. اقجول ماحمۇدوۆ (قىرعىزستان), 2. مالحاس امويان (ارمەنيا), 3. زولتان لەۆاي (ماجارستان). 82 كگ: 1. بۇرحان اقبۇداق (تۇركيا), 2. رافيگ حۋسەينوۆ (ازەربايجان), 3. ياروسلاۆ فۋلچاگوۆ (ۋكراينا). 87 كگ: 1. ءالي شىڭعىس (تۇركيا), 2. داۆيد لوسونتسي (ماجارستان), 3. نۇرسۇلتان تۇرسىنوۆ (قازاقستان). 97 كگ: 1. ارتۋر الەكسانيان (ارمەنيا), 2. مۇحاممادحادي ساراۆي (يران), 3. كيريلل ميلوۆ (بولگاريا). 130 كگ: 1. ءامين مىرزازادە (يران), 2. ريزا كاياالپ (تۇركيا), 3. الين الەكسۋك-چۋراريۋ (رۋمىنيا).
مىنە, گرەك-ريم كۇرەسى مەن ەركىن كۇرەستەگى بۇگىنگى جالپى جاعداي وسىنداي. سپورتتىڭ وسى ەكى ءتۇرى بويىنشا توپ-10-دىقتىڭ قاتارىنا ەنگەن جەتى جەرلەسىمىز جايىندا ءبىز جوعارىدا ازدى-كەمدى اڭگىمەلەدىك. ايتپاقشى سول تىزىمدە تاعى ءۇش بۇرىمدىمىز بار. «ولار كىمدەر؟», «ايەلدەر كۇرەسىندە قاي كوماندانىڭ كوشى ىلگەرى؟» نەمەسە «قاي ەلدىڭ قارقىنى باسەڭ؟» دەگەن ساۋالداردىڭ جاۋابىن گازەتىمىزدىڭ كەلەسى ساندارىنىڭ بىرىندە جازامىز.
