تسيفرلىق گيگيەنا

ومىر­دەگى قاۋىپسىزدىگىمىز قانداي ماڭىز­دى بولسا, تسيفرلى الەمدەگى قاۋىپ­سىزدىگىمىز دە ءدال سونداي ماڭىزدى. قازىر ونلاين رەجىمدە بارلىعى قولجەتىمدى. جۇمىستى ونلاين ىستەيمىز, پىكىردى ونلاين بىلدىرەمىز, تاماققا دا ونلاين تاپسىرىس جاسايمىز, بيلەتتى ونلاين ساتىپ الامىز, قۇجاتتاردى دا ونلاين رەتتەيمىز. وسى قىزمەتتەردىڭ بارىنە ونلاين تولەم جاساۋ دا تۇك قيىن ەمەس. كۇندەلىكتى ءومىرىمىزدىڭ كورىنىسى وسى. الايدا اڭعارعان بولساق, وسىنىڭ بارلىعىن جۇزەگە اسىرۋعا جەكە دەرەكتەرىمىز قولدانىلادى. سوندىقتان اباي بولماساق, الاياق­تارعا الدانىپ قالۋ وپ-وڭاي. وتكەن جىلى الەم بويىنشا ءار­تۇرلى كيبەرشابۋىلدىڭ سانى 90 پايىزعا وسكەن. ياعني تەح­نولوگيا ءومىرىمىزدى قالاي جەڭىل­دەتسە, سولاي قيىنداتىپ تا جا­تىر. ماسەلەن, ءارتۇرلى الەۋمەت­تىك جەلىدەن, اسىرەسە WhاtsApp چاتتاردان كەلەتىن قورعال­ما­عان سىلتەمەلەر وتە قاۋىپتى. ودان كەيىن كەز كەلگەن جەرگە جازىپ قالدىراتىن تەلەفون ءنو­مىرىمىز بەن ەلەكتروندى پوش­تا­مىز دا – اسا قۇندى دەرەك. ال كي­بەرقىلمىستىڭ قۇربانىنا اي­نالماۋ ءۇشىن ءاربىر ادام كيبەر­گيگيەنا ۇعىمىن كۇندەلىكتى ومىرى­نە ەنگىزۋگە ءتيىس. سوندىقتان قو­عامنىڭ تسيفرلى ساۋاتتى بولۋى قاۋىپسىزدىك ءۇشىن اسا ماڭىزدى.

تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اقپاراتتىق قاۋىپسىز­دىك كوميتەتىنىڭ توراعاسى رۋسلان ابدىقالىقوۆتىڭ ايتۋىنشا, جەكە دەرەكتەردى قورعاۋعا ناقتى قادامدار جاسالۋى قاجەت.

– تسيفرلى گيگيەنا – ينتەرنەتتە قاۋىپسىزدىكتى ساقتاۋعا كومەك­تەسەتىن ەرەجەلەر مەن نۇسقاۋلار جيىن­تىعى. ينتەرنەت پايدالانۋشىلارىنا اۋەلى ءارتۇرلى اككاۋنتتارعا بىردەي قۇپيا ءسوزدى قولدانباۋدى ءارى كۇردەلى قۇپيا ءسوز ويلاپ تابۋدى ۇسىنامىن. بۇل جەكە اقپاراتتارعا رۇقسات­سىز كىرۋدىڭ الدىن الۋعا كومەكتەسە­دى. ودان كەيىن قۇرىلعىداعى باع­دارلامالاردى جاڭارتىپ وتىرۋ  كەرەك. ويتكەنى جاڭا نۇسقالاردا قاۋىپسىزدىك كۇشەيتىلىپ وتىرادى. بۇل حاكەرلەردىڭ شابۋىلدارىنان قورعاۋعا كومەكتەسەدى. سونداي-اق كۇدىك تۋدىراتىن حا­بارلامالارعا جاۋاپ بەرمەگەن ءارى بەيتانىس ادامدار جىبەرگەن سىلتەمەلەردى اشپاعان ابزال. ۆيرۋستاردان جانە باسقا دا قاۋىپتەردەن قورعاۋعا انتيۆيرۋس باعدارلامالارىن پايدالانعان ءجون. بۇل قۇرىلعىنى زياندى باعدارلامالاردان قور­عاۋعا كومەكتەسەدى. جەكە اقپارات­تاردى بەيتانىس سايتتار مەن قوسىم­شالارعا سەنىپ, جىبەرە بەرۋ­گە مۇلدە بولمايدى. جەكە اق­پاراتتى ۇسىنار الدىندا سايت­تار مەن قوسىمشالاردى مۇ­قيات تەكسەرۋ كەرەك. سونىمەن قاتار جە­لىدەگى پاراقشالاردى قور­عاۋعا ەكى فاكتورلى اۋتەنتيفيكاتسيانى پايدالانۋ قاجەت. بۇل پاراقشالارعا رۇقساتسىز كىرۋدىڭ الدىن الۋعا كومەكتەسەدى. ءارى الەۋمەتتىك جەلىلەردە جانە باس­قا دا ونلاين-سەرۆيستەردە قۇپيا­لى تەتىگىنىڭ ورناتىلعانىن تەك­سەرىپ العان دۇرىس. بۇل جەكە اق­پاراتتاردىڭ تەك جىبەرگەن ادام­دارعا قولجەتىمدى ەكەنىنە كوز جەتكىزۋگە كومەكتەسەدى, – دەيدى رۋسلان ابدىقالىقوۆ.