رەسپۋبليكالىق دەڭگەيدە ۇيىمداستىرىلعان ءىس-شاراعا قاتىسقان ارىپتەستەردىڭ ەڭبەگىنەن كونە شاھاردىڭ بۇگىنگى كەلبەتىن, تاريحي ورىندارىن شەبەرلىكپەن وبەكتيۆكە سىيدىرعانىن بايقادىق. 12 قاتىسۋشىنىڭ بارلىعى دا كوركەيگەن, جاڭارعان شاھاردى جان-جاقتى كورسەتۋ ءۇشىن ايانىپ قالماعان.
«تاراز – تاريحىمىزدىڭ تەمىرقازىعى. ەستە جوق ەسكى زاماننان سىر شەرتكەن كونە شاھار تاريحى, بايىرعى مادەنيەتى مەن تاۋەلسىزدىك جىلدارى قايتا كوركەيگەن كەلبەتىن قاتىسۋشىلار بارىنشا جاقسى كورسەتكەن.
بايقاۋدىڭ باستى ماقساتى – ەكى مىڭ جىلدان استام تاريحى بار سۇيىكتى قالامىزدىڭ بۇگىنگى بەينەسىن فوتو ونەرى ارقىلى كوپشىلىككە تانىتۋ. سونداي-اق وسى ارقىلى كاسىبي مامانداردى انىقتاپ, ولاردىڭ ەڭبەگىن حالىق اراسىندا كەڭىنەن دارىپتەگەندى ءجون دەپ ۇيعاردىق», دەدى ءىس-شارا قورىتىندىسىندا ءسوز سويلەگەن تاراز قالاسىنىڭ اكىمى باقىتجان ورىنبەكوۆ.
ءوز ءىسىنىڭ شەبەرلەرى سىنعا تۇسكەن بايقاۋ قورىتىندىسىندا تۇركىستاندىق ناقىپ شىنتەمىروۆ جۇلدەلى ءۇشىنشى ورىندى يەلەنسە, شىمكەنتتىك سامات مىرزاليەۆكە ەكىنشى ورىن بۇيىردى. قازىلار القاسى الماتىلىق ەرنۇر ماناپحان ۇلىنىڭ ەڭبەگىن جوعارى باعالاپ, ءبىرىنشى ورىنعا لايىق دەپ تاپتى.
بۇدان بولەك بايقاۋدا باق سىناعان قاتىسۋشىلار ارنايى اتالىم بويىنشا ماراپاتتالدى. ماسەلەن, «ۇزدىك فوتوگراف» اتالىمى سىيلىعىن شىمكەنتتىك ماقسات شاعىرباي يەلەنسە, «ۇزدىك قالا پەيزاجى» اتالىمى تارازدىق داۋرەن نىسانباەۆقا, «ەڭ ادەمى كورىنىس» اتالىمى تاعى ءبىر تارازدىق قاتىسۋشى تابىن ابىلداعا, ء«مولدىر تابيعات» اتالىمى تۇركىساندىق سەرىكبولسىن شەرىگە, «قاس-قاعىم ءسات» اتالىمى الماتىلىق اكپار ۇركىنباي ۇلىنا بۇيىردى. سونداي-اق جەرگىلىكتى فوتوتىلشىلەر اقادىل رىسماحان, يۋري كيم, ميحايل تە, الماتىلىق دوسجان بالابەك ۇلى ىنتالاندىرۋ سىيلىعىنا يە بولدى.
تاراز
