ناتيجە بار سياقتى. وعان قوستانايداعى جاستار سارايىندا وتكەن فورۋمدا كوز جەتكىزگەندەي بولدىق. جوبانىڭ قورىتىندىسى جاريالانعان جيىندا جەتى اي بويى بەلسەندىلىك تانىتىپ, ءتىل ۇيرەنۋگە ەرەكشە ىقىلاسى بار ەكەنىن دالەلدەپ باققان ىنتالى بالالار ماراپاتتالدى. ال قاتارلاستارىنان وزىپ شىققان ەڭ ۇزدىك 11 وقۋشى استاناعا بارىپ, ەلوردانىڭ كورىكتى جەرلەرىن قىزىقتاپ قايتاتىن بولدى.
بالانى باستان ءتىل ۇيرەنۋگە ىنتالاندىراتىن مۇنداي اۋقىمدى ءارى جارتى جىلدان اسا ۋاقىتقا سوزىلعان ۇزاقمەرزىمدى ءىس-شارانىڭ وڭىردە ءبىرىنشى رەت ءوتىپ وتىرعانىن ايتا كەتۋ كەرەك. 56 ۇلتتىڭ وكىلى قاتىسقان «جەتى قادامنىڭ» جوسپار-جوسىعىن وبلىستاعى قوعامدىق كەلىسىم مەكەمەسىنىڭ باسشىسى ناتاليا رامازانوۆا جاساپ شىققان. جوبا اۆتورىنىڭ ايتۋىنشا, بالالار ۇستازدارىنىڭ جەتەكشىلىك ەتۋىمەن ءار كەزەڭنىڭ تاقىرىبىنا ساي ەسسە جازىپ, اۋىزەكى سويلەۋ داعدىلارىن دامىتقان. مەملەكەتتىك تىلدە چەللەندج, تۋعان جەر تۋرالى شاعىن بەينەبايان ءتۇسىرىپ, ءتىل ۇيرەتەتىن ارنايى تاپسىرمالاردى ورىنداعان. بۇل ورايدا جەتى اي ىشىندە كەزىگەتىن اتاۋلى مەرەكەلەردىڭ دە ەسكەرۋسىز قالماعانىن اڭعاردىق. مىسالى, قازاقستان حالقىنىڭ بىرلىگى كۇنى قارساڭىندا وسى جوباعا تارتىلعان مۇعالىمدەر ءوز مەكتەپتەرىندە ء«تىل – ەل تىرەگى» دەگەن تاقىرىپتا سىنىپ ساعاتتارىن وتكىزسە, ماۋسىم ايىندا وقۋشىلار «اۋىلىم – التىن بەسىگىم» دەپ اتالاتىن بەينەبايان جاساعان. ال شىلدەدە ونلاين رەجىمدە وتكەن جيىندا ءار بالا «مەملەكەتتىك ءتىلدىڭ مارتەبەسىن قالاي ارتتىرامىن؟» دەگەن ساۋالعا اۋىزشا جاۋاپ بەرىپ, كوپشىلىك ورتادا ءوز ويىن ەركىن جەتكىزۋگە تالپىنعان.
بالالار بۇدان تىس بەرىلگەن تىلدىك تاپسىرمالاردى ورىنداپ بىتكەن سوڭ, اي سايىن بىلىكتى ءتىل ماماندارىنان قۇرىلعان قازىلار القاسىنىڭ قاراۋىنا جىبەرىپ وتىرعان. «مۇندا قازاق ءتىلىن ءارتۇرلى دەڭگەيدە مەڭگەرگەن بالالار وتىر. ءبىزدىڭ ماقساتىمىز – ولار ءتىلدى ابدەن مەڭگەرىپ العانشا قولداۋ كورسەتۋ, ءبىر ناتيجە شىعارعانشا كومەكتەسۋ, وزگە ۇلت وكىلدەرىنىڭ مەملەكەتتىك تىلگە دەگەن سۇرانىسىن قالىپتاستىرۋ, ولاردىڭ وزدەرىنىڭ ىشىندە مەملەكەتتىك ءتىل تىنىستاي الاتىنداي تىلدىك ورتا قۇرۋ. اتالعان جوباعا وبلىستىق قوعامدىق دامۋ باسقارماسى باستان-اياق قولداۋ كورسەتتى», دەيدى ناتاليا رامازانوۆا.
قارابالىقتاعى اباي اتىنداعى №2 مەكتەپتىڭ وقۋشىسى, ۇستازىمەن بىرگە وسى فورۋمعا ارنايى كەلگەن نادەجدا كوتوسوۆا ءتىل ۇيرەنۋ ءۇشىن وسىنداي بەلسەندى ورتانىڭ بولعانى ماڭىزدى, دەيدى. «مەملەكەتتىك تىلگە جەتى قادام» جوباسى باستالعالى, وبلىستىڭ باسقا وڭىرلەرىنەن كوپ دوس-قۇربى تاپقانىن ايتقان نادەجدا: «وسى جوباعا قاتىسىپ جاتقان بالالاردىڭ ءبارى ورىس مەكتەپتەرىندە ءبىلىم الادى. ءساۋىر ايىنان بەرى ءبارىمىز ورتاق چات ارقىلى بايلانىسىپ, تەك قازاق تىلىندە سويلەستىك. ۇنەمى ءبىرىمىزدىڭ قاتەمىزدى ءبىرىمىز تۇزەپ, قازاقشا نەشە ءتۇرلى جۇمباق جاسىرىپ, ولەڭ وقىپ, كوڭىلدى كۇندەرىمىزدى وتكىزدىك. جوبا اياقتالعانىمەن, بايلانىس ۇزىلمەيدى. قاشىقتان بولسا دا ءبىر ۋاق سويلەسىپ, اڭگىمەلەسىپ, تىلدىك داعدىمىزدى دامىتىپ وتىرامىز. ال فورۋمعا كەلسەك, بۇگىن ءدارىس وقىعان سپيكەرلەردەن ءبىز الاتىن ۇلگى-ونەگە كوپ ەكەن, ول كىسىلەردىڭ ورەلى وي-پىكىرلەرى دە ۇلكەن اسەرگە بولەدى», دەدى.
ۇيىمداستىرۋشىلار فورۋمعا جان-جاقتان قازاق ءتىلىن ءبىر كىسىدەي جاقسى مەڭگەرگەن, بۇگىندە كوپتىڭ كوز الدىندا ەلگە كورىنىپ جۇرگەن بىرنەشە بەلسەندى جاستى شاقىرعان. نادەجدا سونى ايتىپ وتىر. جيىنعا قاتىسۋشىلار ءۇش سەكتسياعا ءبولىنىپ, سول اعا-اپالارىنان اقىل سۇراپ, كەڭەس تىڭدادى. سپيكەرلەردىڭ اراسىندا كەزىندە وبلىستىق تەلەارنادا جۇمىس ىستەگەن, بۇگىندە ۇلتتىق ارنانىڭ «تاڭشولپان» باعدارلاماسىنىڭ جۇرگىزۋشىسى, ديكتور اللا گاۆرينا دا بار.
– كەزىندە ءدال وسى وقۋشىلار سەكىلدى ءبىز دە ءتۇرلى بايقاۋ مەن فورۋمعا قاتىسىپ جۇردىك. ول كەزدە وزگە ۇلت وكىلى قازاقشا سويلەسە, جۇرت جاپپاي تاڭعالىپ, كادىمگىدەي قولپاشتاپ جاتاتىن. ول داۋرەن ءوتتى. قازىر بۇل قالىپتى ۇردىسكە اينالىپ كەلەدى. ءوز باسىم سولاي بولۋى كەرەك دەپ ەسەپتەيمىن. وكىنىشتىسى, قوس ءتىلدى قاتار الىپ ءجۇرۋ كەرەك دەگەن سياقتى تاپتاۋرىن تۇسىنىكتەن ءالى ارىلا الماي كەلەمىز. مۇنى ءوزىمىز عانا توقتاتا الامىز. دەگەنمەن جاستاردىڭ تالابى ۇنادى, قازاقشا سويلەپ تۇر. ءبىزدىڭ كەزىمىزدە مۇنداي بولعان جوق. كوپ وقۋشى مەديا سالاسىنا قىزىعادى ەكەن, مەن ولارعا مەدياكەڭىستىكتە قازاق تىلىنە سۇرانىس جوعارى ەكەنىن ايتتىم. ءوز باعدارلامالارىم مەن جۇمىسىم تۋرالى اڭگىمەلەپ بەردىم. جاستار قازاق ءتىلىن بىلگەن ادام قور بولمايتىنىن تۇسىنگەندەي بولدى, – دەيدى اللا.
فورۋم بارىسىندا ءتىل ۇيرەنۋشى وقۋشىلاردىڭ ۇستازدارى قاتىسقان ترەنينگ ءوتتى. ال جوبا جەڭىمپازدارى الداعى كۇندەرى استاناعا بارىپ, ەلورداداعى الجير مۇراجايى, ۇلتتىق كىتاپحانا, ۇلتتىق مۋزەي, بەيبىتشىلىك پەن كەلىسىم سارايى, پرەزيدەنت مۇراجايى سەكىلدى قاستەرلى ورىنداردى, وزگە دە مادەني ورتالىقتاردى ارالاماق.
قوستاناي وبلىسى
