الەۋمەتتىك جەلىنىڭ پايداسىمەن بىرگە كولەڭكەلى جاقتارى دا بەلەڭ الىپ, الاياقتاردىڭ قۇربانى بولعانداردى ءجيى كەزدەستىرىپ ءجۇرمىز. قاس پەن كوزدىڭ اراسىندا ارام ويىن جۇزەگە اسىراتىنداردىڭ قيتۇرقى ارەكەتىنەن ءوز ورتامىزداعىلار دا زارداپ شەگىپ ءجۇر. تەلەگرامعا كەلگەن سىلتەمەنى اشقان تانىسىمىز الاياقتاردىڭ ارباۋىنا ءتۇسىپ, ىڭعايسىز جاعدايدا قالعان جايى بار. كيبەرالاياق ونىڭ تەلەفونىنداعى بارلىق ابونەنتكە قول جەتكىزىپ, زارداپ شەگۋشى ازاماتتىڭ اتىنان توپ قۇرىپ, سىلتەمەلەر جىبەرە باستادى. سىلتەمەنى اشقان ادامدا جاعداي قايتالانىپ, الاياقتىڭ ءىسى جالعاسا بەرەدى. سەرگەي احمەتوۆتىڭ ايتۋىنشا, حاكەرلەر بۇل ارەكەتتى ەكى سەبەپپەن جاساۋى مۇمكىن. ءبىرى ادامنىڭ بانك كارتاسىنداعى شوتىنا قول جەتكىزسە, ەندى ءبىرى ءۇشىن بۇل ەرىككەننىڭ ەرمەگى ەكەن.
«مۇنداي سىلتەمەلەر ماعان دا كەلەدى. بۇل جاعدايدا سىلتەمەنى اشپاس بۇرىن, ونى كوشىرىپ الىپ, ارنايى تەكسەرەتىن سايتتارعا سالىپ, تەكسەرىپ العان ءجون. ءوزىم سىلتەمەنى اشپاس بۇرىن vms.drweb.ru سايتى ارقىلى تەكسەرىپ وتىرامىن. سونداي-اق قاۋىپتى سىلتەمەلەردى @DrWebBot Telegram-بوتى ارقىلى دا انىقتاۋعا بولادى. سىلتەمەنى اشقان جاعدايدا الاياقتار ءسىزدىڭ تەلەفونىڭىزداعى مالىمەتتەردى كوشىرىپ الىپ, ءوز ويىن جۇزەگە اسىرۋدان تايىنبايدى», دەدى س.احمەتوۆ.
بۇدان سوڭ ول الاياقتىڭ بۇل ارەكەتىن قالاي توقتاتۋعا بولاتىنىن ايتتى. ول ءۇشىن تەلەگرامنىڭ ىشىندەگى پارامەترلەر (ناسترويكي) بولىمىنە كىرىپ, قۇرىلعى (ۋسترويستۆو) دەگەن قاتاردى تاڭدايسىز. سول جەردە ءسىزدىڭ تەلەگرامىڭىزعا كىرىپ وتىرعان ەكىنشى ادام جايىندا دەرەكتى كورۋگە بولادى. سول قۇرىلعىنىڭ ۇستىنەن باسىپ, ءوشىرىپ تاستاۋ كەرەك.
سونداي-اق سەرگەي احمەتوۆ الەۋمەتتىك جەلىدەگى پاراقشالارعا قيىن قۇپيا ءسوز قويۋدى كەڭەس بەردى. بارلىق الەۋجەلىدە قۇپيا ءسوز بىردەي بولعان جاعدايدا الاياقتار بىردەن بارلىق پاراقشاڭىزدى بۇزۋى مۇمكىن. قۇپيا سوزدەردى ساقتاۋ ءۇشىن Kpass قولدانباسىن قولدانعان ءجون.
«كوپشىلىگى بوگدە سىلتەمەلەردى اشىپ, وڭاي قۇپيا ءسوز قويعاندىقتان زارداپ شەگىپ جاتادى. نەگىزىندە بۇل ارەكەتتەرسىز الاياقتار وزدىگىنەن شابۋىل جاساي المايدى», دەدى ول.
ءبىر قاراعاندا مۇنىڭ بارلىعى قاراپايىم دۇنيە سياقتى بولىپ كورىنگەنىمەن, سىن ساعاتتا كەز كەلگەن ادام ابدىراپ قالۋى مۇمكىن. مامان كەڭەسى قاپەرىڭىزدە ءجۇرسىن.
