مەملەكەت باسشىسى قاسىم-جومارت توقاەۆتىڭ بىلتىرعى جولداۋىندا اۋىل مەديتسيناسىن دامىتۋ جونىندە ناقتى تاپسىرما بەرگەن ەدى. ۇلتتىق جوبا اياسىندا باتىس قازاقستان وبلىسىندا 2025 جىلعا دەيىن اۋىلدىق ەلدى مەكەندەردە العاشقى مەديتسينالىق-سانيتارلىق كومەك كورسەتەتىن 50 نىسان – دارىگەرلىك امبۋلاتوريا, فەلدشەرلىك-اكۋشەرلىك پۋنكت, مەديتسينالىق پۋنكت قۇرىلىسى جوسپارلاندى. وسى ماقساتتى جۇزەگە اسىرۋ ءۇشىن 2023 جىلى رەسپۋبليكالىق بيۋدجەتتەن 3,6 ملرد تەڭگە قارجى ءبولىنىپ, جوسپارلانعان 24 نىساننىڭ 12-ءسىنىڭ قۇرىلىسى بيىل باستالىپ كەتتى.
اۋىل حالقى اسىعا كۇتكەن العاشقى نىسان تەرەكتى اۋدانىنا قاراستى بارباستاۋ اۋىلىندا جاقىندا عانا قولدانىسقا بەرىلگەن ەدى. سۋ جاڭا عيماراتقا يە بولعان اۋىلدىق فەلدشەرلىك-اكۋشەرلىك بەكەتكە تەرەكتى اۋداندىق اۋرۋحاناسىنىڭ قاراجاتى ەسەبىنەن سانيتارلىق اۆتوكولىك ساتىپ الىندى.
«اتالعان ءىس-شارالاردىڭ بارلىعى دا حالىقتىڭ يگىلىگى ءۇشىن, ولاردىڭ ءال-اۋقاتىن ارتتىرۋ ماقساتىندا جانە ساپالى مەديتسينالىق كومەك كورسەتۋگە باعىتتالعان. وسى ارقىلى اۋىل تۇرعىندارىنىڭ دەنساۋلىعىن نىعايتۋ, ساۋىقتىرۋ جۇمىستارىن ۋاقىتىلى قابىلداۋ, ونكولوگيالىق اۋرۋلاردى ەرتە ساتىدا انىقتاۋ, سكرينينگ تەكسەرىستەرىنىڭ ۋاقىتىلى جۇرگىزىلۋى, ءومىر ءسۇرۋ ۇزاقتىعىن ارتتىرۋعا ۇلكەن سەپتىگىن تيگىزەدى», دەيدى باتىس قازاقستان وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ءابدىراحمانوۆا.
بارباستاۋلىقتاردىڭ قۋانىشى جۋىردا كۇنى بايتەرەك اۋدانىنداعى قاينار اۋىلىندا جالعاستى. وبلىس ورتالىعىنان 40 شاقىرىم قاشىقتا جاتقان شاعىن اۋىل تۇرعىندارى بۇعان دەيىن ءسال-ءپال سىرقاتى ءۇشىن قالاعا سابىلاتىن. 720 تۇرعىنى بار اۋىلدا سالىنعان سۋ جاڭا عيماراتقا 160 ملن تەڭگە قاراجات جۇمسالىپتى. نىسان قاجەتتى مەديتسينالىق قوندىرعىلار مەن قۇرالدار, جيھاز جانە كەڭسە تەحنيكاسىمەن تولىق جابدىقتالعان. ورتالىقتاندىرىلعان سۋ قۇبىرى, تابيعي گاز جانە اۆتونومدى جىلىتۋ جۇيەسى قوسىلعان بەكەتتە فەلدشەر, اكۋشەر, سانيتار جانە تەحنيكالىق قىزمەتكەر جۇمىس ىستەيدى. جاقىندا مەدبيكە شتاتىن ەنگىزۋ جوسپارلانعان.
«ەل دامۋىنىڭ باستى ارقاۋى – دەنى ساۋ ۇلت. حالىق دەنساۋلىعىن جاقسارتۋ – ەلىمىز ءۇشىن وزەكتى ماسەلەلەردىڭ ءبىرى. مەملەكەت باسشىسى ەل حالقىنىڭ, سونىڭ ىشىندە اۋىل تۇرعىندارىنىڭ ساۋلىعىنا ەرەكشە كوڭىل ءبولىپ وتىر. پرەزيدەنتتىڭ تاپسىرماسىن ورىنداۋ ماقساتىندا قاينار اۋىلىندا جاڭا فەلدشەرلىك-اكۋشەرلىك بەكەت اشىپ جاتىرمىز. بۇل اۋىل حالقىنىڭ دەنساۋلىعى ءۇشىن پايداسى كوپ بولادى دەگەن ويدامىز. بۇل ماسەلە كوپتەن بەرى كوتەرىلىپ جۇرگەنىن بىلەمىز. ەندى اۋىل حالقى ەم الۋ ءۇشىن اۋدان ورتالىعىنا نە ورال قالاسىنا بارمايدى. بارشاڭىزدى جاڭا نىساننىڭ اشىلۋىمەن قۇتتىقتايمىن», دەدى قاينار اۋىلى تۇرعىندارىنىڭ قۋانىشىن بولىسۋگە ارنايى كەلگەن باتىس قازاقستان وبلىسىنىڭ اكىمى ناريمان تورەعاليەۆ.
جاڭا عيماراتتا تەكسەرۋ بولمەسى, فەلدشەر مەن اكۋشەردىڭ كابينەتتەرى, فيلتر, يزولياتور, ەكپە كابينەتى قاراستىرىلعان. سونداي-اق قىزمەتكە قاجەتتى گينەكولوگيالىق كرەسلو, قۇرالداردى جۋ جانە زارارسىزداندىرۋ قۇرالى, ناۋقاستىڭ ۇيىنە بارعاندا قاجەتتى قۇرالدار سالىنعان مەديتسينالىق قوبديشا قامتىلعان.
ارينە, جاڭا نىساننىڭ اشىلعانىنا ەرەكشە قۋانعان اۋىل تۇرعىندارى وسىنداي قامقورلىعى ءۇشىن مەملەكەت باسشىسىنا, وبلىس باسشىلارىنا العىسىن جاۋدىرىپ جاتتى.
2025 جىلدىڭ سوڭىنا شەيىن ءبىزدىڭ وبلىستا وسىنداي سۋ جاڭا 50 نىسان پايدالانۋعا بەرىلەدى. سونىڭ ىشىندە بيىل 12 مەكەمە سالىنىپ بىتەدى. بۇگىنگى عيماراتتىڭ قۇرىلىسىن «التاير» كومپانياسى جۇرگىزدى. «قۇرىلىس وتە ساپالى سالىنعان, ءبىز ونى قاتاڭ باقىلادىق. جاڭا عيماراتتا قاجەتتى قوندىرعىلار, جۇمىسقا قاجەتتى بارلىق نارسە قامتىلعان», دەيدى وبلىستىق دەنساۋلىق ساقتاۋ باسقارماسىنىڭ باسشىسى ەرلان توقسانوۆ.
باتىس قازاقستان وبلىسى
