وتكەن وقۋ جىلىندا 3 جىل بويى 6 مەكتەپتىڭ اقشاسىن جىمقىرىپ كەلگەن باس ەسەپشى ۇستالعان بولاتىن. بيۋدجەتتەن 2 ملرد تەڭگەنى ۇرلاعان تالدىقورعان قالالىق ءبىلىم ءبولىمىنىڭ باس ەسەپشىسى مادلەن سەرعازينوۆا جۇمىس ىستەمەيتىن ادامداردىڭ شوتىنا جالاقى اۋدارىپ وتىرعان. اباي وبلىسىنا قاراستى 6 اۋداندا 3 ديرەكتور, 6 ەسەپشى, 1 ەكونوميست بيۋدجەتكە 19,7 ملن تەڭگە شىعىن كەلتىرگەن. ايتا بەرسەك, مۇنداي مىسال ءار وڭىردە بار. بيۋدجەتتەن قارجى بولىنگەن سوڭ, قولعا تۇسكەن اقشاعا ءوزىم قوجا دەگەندەي جەمقورلىققا بەيىم مەكتەپ ديرەكتورلارى, باس ەسەپشىلەر, مەڭگەرۋشىلەر, باس ماماندار امالىن تاۋىپ, ايلاسىن اسىرادى.
سىبايلاس جەمقورلىققا قارسى قىزمەتتىڭ مالىمەتىنشە, كەيىنگى 3 جىلدا 453 ءىس تىركەلىپ, 165 ادام سوتتالعان. ال بيۋدجەتتىڭ 11 ملرد تەڭگەسى قولدى بولعان. كوبىنە اقشا ەڭبەكاقى قورى ارقىلى ۇرلانادى. بۇعان سەبەپ – اشىق قاداعالاۋ جۇيەسىنىڭ جوقتىعى.
– ءبىلىم سالاسىنا بولىنگەن بيۋدجەتتىك قاراجات نەگىزىنەن ەڭبەكاقى قورى ارقىلى ۇرلانادى. الدىمەن, بيۋدجەتتىك ءوتىنىم بەرىلەدى. ءبىلىم ءبولىمى ارقىلى تامىر-تانىسى بار مەكتەپتەرگە بولىنەدى. ارتىنشا ءارتۇرلى تاسىلدەر ارقىلى, ماسەلەن, مۇلدەم جۇمىس ىستەمەيتىن ادامعا ەڭبەكاقى تولەۋ ارقىلى اقشا ۇرلانا باستايدى, – دەيدى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعالي.
وسىعان بايلانىستى پاۆلودار وبلىسىندا جۇيەنى تسيفرلاندىراتىن قاناتقاقتى جوبا ازىرلەنىپ, ىسكە قوسىلدى. جوبانى وبلىس اكىمدىگى مەن سىبايلاس جەمقورلىققا قارسى ءىس-قيمىل اگەنتتىگى بىرلەسىپ جۇزەگە اسىرىپ جاتىر. باعدارلاماعا جالاقىنىڭ 50 پايىزىنان اسقان اۆانس تولەمدەرىن باقىلاۋ جانە بۇعاتتاۋ تەتىگى, پەداگوگتەر مەن باسقا دا قىزمەتكەرلەردىڭ جۇمىس ساعاتتارىن قاداعالاۋ, ساباققا قاتىسۋدى باقىلاۋ, قىزمەتكەرلەردىڭ ۋاقىتىن ەسەپكە الۋ تابەلىن اۆتوماتتى تۇردە قالىپتاستىرۋ, قازىناشىلىق ەسەپتىلىك نىساندارىن تىكەلەي اقپاراتتىق جۇيەگە جۇكتەۋ قىزمەتتەرى ەنگىزىلەتىن بولادى. بۇعان دەيىن «بۇلتتى ەسەپشى» جوباسى ءبىلىم بەرۋ مەكەمەلەرىندە سىناقتان وتكەن بولاتىن. ال جەلتوقسان ايىنا دەيىن ايماق كولەمىندە ىسكە قوسۋ جوسپارلانعان. قاناتقاقتى جوبا ناتيجەلى بولسا, ەلىمىزدىڭ بارلىق وڭىرىندە قولدانىلادى.
– ءبىز مينيسترلىكتەرمەن, وڭىردەگى اتقارۋ ورگاندارىمەن بىرلەسىپ وسى ماسەلە بويىنشا زەرتتەۋ جۇمىسىن جۇرگىزگەندە, ءبىلىم سالالاسىنداعى ۇرلىق, ەڭ الدىمەن, تسيفرلاندىرۋ, اۆتوماتتاندىرۋ جۇمىستارى جۇرگىزىلمەگەندىكتەن بولادى دەگەن قورىتىندىعا كەلدىك. ويتكەنى قۇجاتتار تەك قاعاز كۇيىندە جاسالادى. مەكتەپ ەسەپشىلەرى ديرەكتورلارمەن كەلىسىپ نەمەسە كەرىسىنشە ءبىلىم بەرۋ سالاسىنداعى ءبولىم باسشىلارى ەسەپشىلەرمەن كەلىسىپ قارجىنى قولدى قىلادى. ال وسى جۇيەنى ەنگىزگەن 2020 جىلدان باستاپ جەمقورلىق فاكتىلەرىن تۇراقتى تۇردە انىقتاي باستادىق. بۇل قىلمىستىق ىستەرگە جول بەرمەۋىمىزگە ايتارلىقتاي پايداسىن تيگىزىپ جاتىر. بىراق مۇنى ايماقتىق جوبا رەتىندە باستاعان ەدىك. ەندى ءارى قاراي ءتيىستى ورگاندارمەن بىرلەسە وتىرىپ, جوبانى رەسپۋبليكا دەڭگەيىندە پايدالانۋعا كۇش سالامىز. بىرتىندەپ تۇتاستاي ءبىلىم سالاسىنا ەنگىزىلسە, ءارى قاراي دەنساۋلىق ساقتاۋ سالاسىندا دا پايدالانىپ كورۋگە بولادى, – دەدى سىبايلاس جەمقورلىققا قارسى ءىس-قيمىل اگەنتتىگى الدىن الۋ قىزمەتىنىڭ باسشىسى سايان احمەتجانوۆ.
ەلىمىزدە مەملەكەت قازىناسىنىڭ ۇشتەن ءبىرى بىلىمگە بولىنەدى ەكەن. ال جاڭا سالاداعى بىلىققا جول بەرمەۋگە, بيۋدجەت قاراجاتىنىڭ ءبۇتىن ساقتالۋىنا اشىقتىقتىڭ ايتارلىقتاي وڭ اسەرى بار.
