ءىس-شاراعا قارۋلى كۇشتەر, اۋعان سوعىسى, تاجىك-اۋعان شەكاراسى قاقتىعىسىنىڭ ارداگەرلەرى, جاس سارباز كلۋبىنىڭ مۇشەلەرى جانە اسكەرگە اتتانۋشى جاستار مەن ولاردىڭ تۋىستارى قاتىستى. اسكەرگە شاقىرىلعان جىگىتتەردىڭ كوڭىل كۇيى كوتەرىڭكى, اسكەري بورىشىن وتەۋگە ساقاداي ساي.
«اسكەر قاتارىندا قىزمەت ەتىپ, وتان الدىنداعى پارىزىن وتەۋگە ءاربىر ازامات مىندەتتى. سەبەبى تۋعان جەردى, ەلدى, اتامەكەندى قورعاۋ – قاسيەتتى بورىش. بۇل دەگەنىمىز – باتىرلىق پەن تاباندىلىق, وتانسۇيگىشتىك پەن وتانعا شەكسىز قىزمەت ەتۋدىڭ نىشانى. قاشاندا حالىقتىڭ ۇلى بولۋ – ءاربىر ازاماتتىڭ بيىك ارمانى. اسىرەسە وتان الدىنداعى بورىشىن وتەپ, اسكەر قاتارىنا قوسىلۋ – ناعىز ازاماتتىقتىڭ بەلگىسى, قايسارلىقتىڭ كورىنىسى. مۇنى ءاربىر جاس جەتە ءبىلىپ, ساناسىنا ءسىڭىرىپ وسۋگە ءتيىس. قازىر الەمدە ساياسي احۋال قيىنداپ بارادى. بىزگە ەل ءۇشىن قالقان بولاتىن باتىرلار قاجەت», دەيدى قارۋلى كۇشتەر ارداگەرى, زاپاستاعى پولكوۆنيك سەيىتجان مەڭدەكەەۆ.
جەتىسۋ وڭىرىندە جىلدان-جىلعا وتان الدىنداعى مىندەتىن وتەۋگە اسىق جاستار كوبەيىپ كەلەدى. ونىڭ ۇستىنە مەملەكەت تاراپىنان تەگىن وقۋعا قولداۋ كورسەتىلگەنىن ەستىگەن اۋىل جاستارى بۇرىنعىداي اسكەردى كەيىنگە قالدىرمايدى. جاس ساربازدار شەكارا اسكەرلەرى, ۇلتتىق ۇلان جانە ەلدىڭ قارۋلى كۇشتەرى قاتارىن تولىقتىرادى. ءبىر جىل قىزمەتىن ءوتىپ, اسكەري بيلەتىن قولىنا الادى.
«ازاماتتاردى اسكەري قىزمەتكە شاقىرۋ «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭنىڭ 27-بابىنا سايكەس جۇرگىزىلەدى. زاڭنىڭ 30-بابىنا سايكەس اسكەري قىزمەتكە شاقىرىلۋعا جاتاتىن ازاماتتار جەرگىلىكتى اسكەري باسقارۋ ورگانىنىڭ شاقىرۋ قاعازى بويىنشا شاقىرۋ كوميسسياسىنا كەلۋگە مىندەتتى. جىل سايىن شاقىرۋ كوكتەم مەن كۇزدە جۇزەگە اسىرىلادى. اسكەري قىزمەتتىڭ مەرزىمدى قىزمەتىن وتكەرۋگە جاتاتىن بالالار كونتينگەنتىن ارنايى كوميسسيا ايقىندايدى», دەيدى تالدىقورعان قالاسى قورعانىس ىستەرى جونىندەگى باسقارما باسشىسى ماقسات قۋاندىق ۇلى.
اسكەرگە شاقىرىلاتىن جاستارعا شاقىرۋ قاعازدارىن قورعانىس بولىمدەرىنىڭ ماماندارى تاپسىرادى. شاقىرۋ قاعازىن ازاماتقا جەكە تاپسىرۋ مۇمكىن بولماعان جاعدايدا, ونىڭ كەلۋىن قامتاماسىز ەتۋ ءتيىستى ىشكى ىستەر ورگانىنا جۇكتەلەدى. ىشكى ىستەر ورگاندارى ءوز قۇزىرەتى شەگىندە اسكەري مىندەتتى ورىنداۋدان جالتارعان ادامداردى ىزدەستىرۋگە مىندەتتى.
«بۇل رەتتە زاڭناما نورمالارى بويىنشا كەيىنگە قالدىرۋ بەرىلەتىن ازاماتتاردىڭ ساناتتارى بار. زاڭنىڭ 35-بابىنا سايكەس اسكەري قىزمەتكە شاقىرۋدى كەيىنگە قالدىرۋ مىناداي نەگىزدەر بويىنشا: وتباسىلىق ءمان-جايلار, ءبىلىمىن جالعاستىرۋ ءۇشىن, دەنساۋلىق جاعدايى, باسقا دا سەبەپتەرمەن بەرىلەدى. ەكى اسكەرگە شاقىرۋ ناۋقانى كەزىندە, ياعني جىل باسىنان بەرى 2500-گە جۋىق ازاماتقا كەيىنگە قالدىرۋ بەرىلدى», دەپ ءتۇسىندىردى تالدىقورعان قالاسى قورعانىس ىستەرى جونىندەگى باسقارماسىنىڭ قىزمەتتىك ءىستى ۇيىمداستىرۋ جانە اسكەرلەرى قىزمەتىنىڭ باسشىسى نۇرسۇلۋ مۇساباەۆا.
قازاقستان پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ جاستارعا ارناعان سوزىندە وتان قورعاۋدىڭ قاسيەتتى پارىز ەكەنىن ۇنەمى ايتىپ كەلەدى. ەل سەنىمدى تىرەگىنە ۇلكەن ءۇمىتىن ارتادى. سەنىمدى اقتاۋ – ازاماتتىق پارىز. جاستاردى وتانسۇيگىشتىككە باۋلۋ, ولاردى دوستىق پەن ىنتىماققا باعىتتاۋ, ەلىمىزدىڭ ەرتەڭگى بەيبىت ءومىرىنىڭ نەگىزى بولماق.
ء«ار ازامات وتان الدىنداعى بورىشىن وتەۋى قاجەت. مەن ءوز ەركىممەن اسكەر قاتارىنا بارماقپىن. اسكەردەن كەيىن كەلىسىمشارت بويىنشا قىزمەت ىستەۋگە نيەتىم دە بار. سەبەبى اسكەرگە بارعان ادام تارتىپكە ۇيرەنەدى. سوندىقتان اسكەر ەڭ الدىمەن ىشكى ءتارتىپتى قالىپتاستىرىپ, جاۋاپكەرشىلىك جۇگىن ارقالاي بىلۋگە باۋليدى. ۇيدەگىلەر شەشىمىمە قارسى بولعان جوق, قايتا قۋانا قولدادى. وسى سالادا ءوزىمنىڭ باعىمدى سىناپ كورگىم كەلەدى. بالا كۇنىمنەن ارمانىم وسى بولاتىن. مىنە, بۇگىن سول ارمانىما قول جەتكىزىپ تۇرمىن», دەيدى اسكەرگە شاقىرىلعان ميراس دايىربەك.
جەتىسۋ وبلىسى
