كارتينانى تاماشالاۋعا بەلگيادا تۇراتىن قازاق قاۋىمىنىڭ وكىلدەرى, سونداي-اق قىزىعۋشىلىق تانىتقان جەرگىلىكتى حالىق كەلدى. كورەرمەندەردىڭ ءبىرى فەريسەل ليۆيۋ «دوس-مۇقاسان» ءفيلمىن كورگەنىنە قۋانىشتى ەكەنىن جەتكىزدى. ول انسامبل مۇشەلەرى قازاقستانعا تانىمال تۇلعالار ەكەنىن, سونىمەن قاتار ونىڭ قۇرىلۋىنىڭ ۇلكەن تاريحى بارىن ايتتى. سوندىقتان بەلگيا تۇرعىنى كينوتەاترعا اسا قىزىعۋشىلىقپەن كەلگەن.
ەلىمىزدىڭ بەلگياداعى توتەنشە جانە وكىلەتتى ەلشىسى مارعۇلان بايمۇحان «دوس-مۇقاسان» ءفيلمىنىڭ ەۋروپا استاناسىندا كورسەتىلۋى – تاعى ءبىر تاماشا مادەني وقيعا ەكەنىن اتاپ ءوتتى. «بۇگىن ەۋروپالىق جانە بەلگيالىق كورەرمەن ءۇشىن اتى اڭىزعا اينالعان «دوس-مۇقاسان» ءانسامبلى تۋرالى قىزىقتى فيلم كورسەتىلدى. ونى ءبىزدىڭ ەلدە بىرنەشە بۋىن وكىلدەرى بىلەدى جانە شىعارمالارىن ءسۇيىپ تىڭدايدى. رەجيسسەر ايدىن ساحامان تۇسىرگەن, ءانسامبلدىڭ ۇزاق تا, قىزىقتى جولىن باياندايتىن ءفيلمدى ەۋروپالىق جۇرتشىلىق جوعارى ىقىلاسپەن قابىلدادى. بەلگيالىق كورەرمەنگە «دوس-مۇقاسان» تۋرالى ءتۇسىرىلىم ۇنادى دەپ ويلايمىز. وسى يگى ءداستۇردى جالعاستىرامىز دەپ ويلايمىن», دەدى مارعۇلان بايمۇحان.
ايتا كەتەيىك, ءتۇسىرىلىم جەتى ايعا جۋىق ۋاقىتقا سوزىلدى. فيلم 2022 جىلى شىقتى. ستسەناريىن جازعان – ەفرات ءشارىپوۆ, پروديۋسەرى – ايگۇل بايبەك, مۋزىكالىق جەتەكشىسى – ايدىن ساحامان. اكتەرلىك قۇرام پورترەتتىك ۇقساستىق بويىنشا تاڭدالعان. باستى رولدەردە اكتەر مەيىرعات امانگەلدين, ماقسات ءسابيتوۆ, ەلدوس شايكەنوۆ, سايات ماقۇلباەۆ, ايعانىم ساعىنباەۆا, نيكيتا پوگوداەۆ, نۇرعيسا قۋانىشباي ۇلى جانە ءابىلمانسۇر سەرىكوۆ وينادى.تانىمال بلوگەرلەر مەن ۆاينەرلەر ارتۋر اسقار ۇلى مەن زۋحرا سايپي دە دەبيۋتتىك ءرولىن ويناپ شىقتى.
«دوس-مۇقاسان» ءفيلمىنىڭ جابىق كورسەتىلىمى وتكەن جىلدىڭ 27 قىركۇيەگىندە بولدى. ال ەكى كۇننەن كەيىن قازاقستاننىڭ بارلىق كينوتەاترلارىنا پروكاتقا شىقتى.
«دوس-مۇقاسان» — 1967 جىلى قۇرىلعان ەسترادالىق ۆوكالدى اسپاپتار ءانسامبلى. نەگىزىن قالاعان – دوسىم سۇلەەۆ, مۇرات قۇسايىنوۆ, حاميت سانباەۆ, الەكساندر ليتۆينوۆ. توپتىڭ اتاۋى دا وسى انشىلەردىڭ ەسىمىنەن قۇرالعان. ءار جىلدارى انسامبل قۇرامىندا باقىتجان ءجۇمادىلوۆ, مەيىربەك مولدابەكوۆ, ءشارىپ وماروۆ, قۇرماناي وماروۆا, نۇرتاس قۇسايىنوۆ, اقجول مەيىربەكوۆ جانە تاعى باسقالار بولدى.
