پرەزيدەنت قاسىم-جومارت توقاەۆ جولداۋدا ەڭبەك نارىعىنداعى وزگەرىستەرگە قاراي تسيفرلى ەكونوميكانىڭ ءرولى ارتا تۇسەتىنىن ايتتى. شىنىندا دا, پلاتفورمالىق جۇمىسپەن قامتۋ جۇيەسىنە قىزىعاتىندار كوپ. پرەزيدەنت وسى سەكتوردا قازىردىڭ وزىندە جارتى ميلليوننان اسا ادام جۇمىس ىستەيتىنىن اتاپ ءوتتى. بىراق مۇندا دا ماسەلە بار. وسى سەكتوردا ەڭبەك ەتەتىن ازاماتتاردىڭ ەڭبەك قۇقىقتارى تولىق قورعالماعان. ەندى وسى ساناتتاعى ازاماتتاردىڭ ەڭبەك قۇقىقتارىن قورعاۋدىڭ ناقتى تاسىلدەرى پايدا بولىپ, پلاتفورمالىق جۇمىسپەن قامتۋ ماسەلەسى ءبىرشاما رەتتەلەدى دەپ ۇمىتتەنەمىز. ەڭبەك نارىعىندا جۇمىسشى مامانداردىڭ كوكەيىندە جۇرگەن تاعى ءبىر ماسەلە – ەڭبەك داۋى. ەڭبەك داۋى وندىرىستە وقىستان جاراقات العان جۇمىسشى مەن ءوندىرىس باسشىلىعى اراسىندا دا ءجيى تۋىندايدى. بۇل رەتتە پرەزيدەنت ەڭبەك تۇجىرىمداماسىنىڭ ناقتى قاشان قابىلداناتىنىن حابارلادى.
«ۇكىمەت 2030 جىلعا دەيىنگى قاۋىپسىز ەڭبەك تۇجىرىمداماسىن وسى جىلدىڭ سوڭىنا دەيىن قابىلداۋعا ءتيىس. بۇل قۇجات جۇمىس ورنىنداعى كاسىبي سىن-قاتەرلەردىڭ الدىن الۋعا جانە جويۋعا باعىتتالۋى كەرەك.
مەنىڭ تاپسىرماممەن ۇكىمەت زياندى ەڭبەك جاعدايىندا ۇزاق ۋاقىت جۇمىس ىستەپ جۇرگەن ادامداردى الەۋمەتتىك قولداۋ تەتىكتەرىن ازىرلەدى. بۇل بۇرىننان تالقىلانىپ جۇرگەن ماسەلە بولاتىن, ەندى شەشىمى تابىلدى. ونىڭ مىناداي ولشەمدەرى بار. جۇمىسشىلاردىڭ وسى سالانى دامىتۋعا سىڭىرگەن ەڭبەگى جانە دەنساۋلىعىنا زيان كەلگەنى ەسكەرىلە وتىرىپ, ولارعا زەينەت جاسىنا تولعانعا دەيىن, اتاپ ايتقاندا, 55 جاستان باستاپ ارناۋلى الەۋمەتتىك تولەم تولەنەدى. پارلامەنتتەن ۇكىمەتتىڭ ۇسىنىستارىن جەدەل قاراۋدى سۇرايمىن. ازاماتتار وسى ماسەلە شەشىمىن تابادى دەپ كۇتىپ وتىر», دەدى مەملەكەت باسشىسى.
ەڭبەك نارىعىنا قاتىستى پرەزيدەنت ايتقان ماسەلەلەر رەتتەلسە, بۇل – جۇمىسشى مارتەبەسىنىڭ بيىكتەۋىنە وڭ اسەر ەتەدى. ءسويتىپ, وتانشىل, ءبىلىمپاز, ەڭبەكقور, ءتارتىپتى, ادال, ءادىل, ۇنەمشىل, جاناشىر ۇرپاق قالىپتاستىرۋعا دا بەلگىلى ءبىر دەڭگەيدە اسەر ەتەدى. تاعى ءبىر جاعىمدى جاڭالىقتى تىلگە تيەك ەتسەك, كەلەر جىلى قاڭتاردان باستاپ ەڭ تومەنگى جالاقى مولشەرى 85 مىڭ تەڭگەگە كوتەرىلەدى. بۇل – ازاماتتاردىڭ تابىسى ارتادى دەگەن ءسوز. ەڭبەكاقىنىڭ ەڭ تومەنگى مولشەرى ءۇش جىل ىشىندە ەكى ەسە كوبەيگەنىن ەسكەرسەك, ءساتتى قادام 1 ميلليون 800 مىڭ ادامنىڭ, ونىڭ ىشىندە بيۋدجەت سالاسىندا ەڭبەك ەتەتىن 350 مىڭ ازاماتتىڭ ءال-اۋقاتىن ارتتىرۋعا سەپتىگىن تيگىزەدى ەكەن.
پرەزيدەنت ەڭبەك نارىعىن جان-جاقتى دامىتۋ ءۇشىن ۇكىمەتتىڭ قىسقا مەرزىمدە 2030 جىلعا دەيىنگى كەشەندى جوسپار بەكىتۋى كەرەگىن ايتتى. سول جوسپارعا ەڭبەك نارىعىن رەتتەۋگە قاتىستى بىرقاتار جاڭاشىلدىق ەنەدى دەپ ۇمىتتەنەمىز.
باقىت ءالمۇراتوۆ,
الەۋمەتتانۋشى
