ەلىمىز تابيعي رەسۋرستارعا ەرەكشە باي جانە زەرتتەلمەي جاتقان جەر رەسۋرستارى دا جەتەرلىك. مەملەكەت باسشىسىنىڭ جولداۋىندا قامتىلعان ماسەلەنىڭ كوبى وزەكتى, ونىڭ ىشىندە ۇنەمى قالتارىستا قالىپ شەشىمىن تاپپاي جۇرگەن پروبلەمالاردىڭ كۇن تارتىبىنە قويىلۋى ءبىزدى ءبىر سەرپىلتىپ تاستادى. ول – شيكىزاتتىق ءوندىرىس. ءبىز ۇزاق ۋاقىت بويى عىلىمدا زامانعا ساي تەحنولوگيامەن جابدىقتاۋ جاعىنان تۇرالاپ قالدىق. سونىڭ كەسىرىنەن شيكىزاتتى وڭدەۋ جانە ونى ۇقساتۋ ىسىنە ءمان بەرۋدى قويدىق. جاڭا تەحنولوگيانى ويلاپ تاپقاننان گورى سول تەحنولوگيانى شەتەلدەن ساتىپ العانعا بويىمىز ۇيرەنىپ كەتتى. جالپى, عىلىمدا جاڭالىق اشۋ ۇلكەن ىزدەنىستى تالاپ ەتەتىنى ءسوزسىز. پرەزيدەنت وسى احۋالعا تەرەڭ, جان-جاقتى تالداۋ جاساۋ ارقىلى سالاعا تۇبەگەيلى وزگەرىستىڭ قاجەتتىلىگىنە باسا نازار اۋدارعانى بايقالادى.
ەلىمىزدە جاڭا تۇرپاتتا ويلاۋ قابىلەتى كۇشتى عالىمدار كورپۋسى بار. ولاردىڭ اشقان عىلىمي جاڭالىقتارىن وندىرىسكە ەنگىزۋ, ونى ءتيىمدى پايدالانۋ جاعىنا وسىعان دەيىن باس اۋىرتپاي كەلدىك. ونىڭ دامۋى قاعاز جۇزىندە دۇرىس سياقتى كورىندى. ال ول ءىس جۇزىندە كوزگە كورىنبەيتىن ەلەس بولىپ قالدى. سونىڭ كەسىرىنەن بىزدەگى يندۋستريالدى-يننوۆاتسيالىق جوبالار جۇزەگە اسپاي جاتىر. قانىش ساتباەۆ اتىنداعى ۋنيۆەرسيتەتى مەتاللۋرگيا جانە كەن بايىتۋ ينستيتۋتىنىڭ عالىمدارى بىرنەشە جىل بويى زەرتتەۋ جۇرگىزىپ, «قازاقمىس» جشس كومپانياسى بازاسىندا قارا سەلەن مەن شلاكتان قىمبات مەتالل ايىراتىن زاۋىتتى ىسكە قوستىق. ايتسە دە قانشاما ءوندىرىس ورىندارى ءوز جاڭالىقتارىن جۇزەگە اسىرا الماي وتىر. پرەزيدەنت جولداۋىنان كەيىن وسى باعىتتىڭ جولى اشىلادى دەپ ويلايمىن. اقىلعا سالسا, ارينە, عىلىمعا جۇمىلۋ – وزەكتى شارا. بىراق ەلىمىزدەگى ءىرى كومپانيالاردى نەمەسە قۋاتتى ءوندىرىس ورىندارىن عىلىمعا جۇمىلدىرۋ ءۇشىن بيلىك تاراپىنان كەشەندى شارا قابىلدانسا, يگى ءىس بولار ەدى. سوندا عانا ءبىزدىڭ وتاندىق ءوندىرىسىمىزدىڭ باعى جانىپ, مەرەيىمىز ارتا تۇسەدى.
عىلىمنىڭ جەتىستىگىن پايدالانبايتىن سالا جوق. عىلىمدا ۇتىسقا شىعىپ جاتاتىن كەزدەر دە بولادى. عىلىم سالاسى ەۆوليۋتسيالىق شىرقاۋ شەگىنە جەتكەن كەزدە ەشتەڭەگە تاڭىرقاپ قاراۋعا بولمايتىنىن قوعام دالەلدەپ بەرگەن. پرەزيدەنتتىڭ ءوز جولداۋىندا كەن ءوندىرۋ ورىندارىن كوبىرەك اشىپ, تابيعي رەسۋرسقا باي ايماقتارعا گەولوگيالىق زەرتتەۋلەر جاساۋدى جانە سالانى تۇتاسىمەن مودەرنيزاتسيالاۋ تۋرالى ايتۋى كوڭىلگە قونىمدى. مۇنىڭ ءوزى بىزگە ۇلكەن كۇش بەرەدى.
جاڭعىرۋ – ۇنەمى جاڭاشىلدىقتى تالاپ ەتەدى. تابيعي رەسۋرستارىمىزعا جاڭاشا ءتۇر بەرىپ, جاڭارۋ پرەزيدەنت جولداۋىندا كەن ورىندارىن يگەرۋ ىسىنە ەرەكشە نازار اۋدارعانىن كورىپ وتىرمىز. مەملەكەت باسشىسىنىڭ حالىققا جولداۋىن شيكىزات وندىرۋدەگى كەلەلى ۇسىنىس دەۋگە بولادى.
باعداۋلەت كەنجاليەۆ,
ق.ساتباەۆ اتىنداعى ۇلتتىق ۋنيۆەرسيتەتى مەتاللۋرگيا جانە كەن بايىتۋ ينستيتۋتىنىڭ باس ديرەكتورى, مەملەكەتتىك سىيلىقتىڭ لاۋرەاتى
