ءتىپتى ۋنيۆەرسيتەتتە قاجەت اقپاراتتاردى كوبىنە ورىس تىلىندە جازىلعان كىتاپتار مەن اقپارات كوزدەرىنەن الاتىنى دا وتىرىك ەمەس. ويتكەنى قازاق تىلىندە ساۋاتتى ءارى تۇسىنىكتى جازىلعان عىلىمي كىتاپتار مەن اقپاراتتاردى تابۋ ءالى دە قيىن. سوندا قازاق ءتىلى قايتسە عىلىم تىلىنە اينالادى؟..
ءبىز قويعان ساۋالدىڭ جاۋابىن الاش ازاماتتارى ايتىپ تا, ىسپەن دالەلدەپ تە كەتكەن. سول كەزەڭدە جازىلعان «قازاق حرەستوماتياسى», «الىپپە», «وقۋ قۇرالى», «ەسەپ قۇرالى», «پەداگوگيكا», «پسيحولوگيا» كىتاپتارى – قازاق عىلىمىنىڭ نەگىزى. ولار ءوز زامانىندا وقۋ-ادىستەمەلەرىن اۋدارىپ, كىتاپ جازۋدى قولعا الۋ ارقىلى وقۋ مادەنيەتىن قالىپتاستىرىپ, اعارتۋشىلىقپەن اينالىستى. ەندەشە قازاق تىلىندە جازىلعان عىلىمي ەڭبەكتەر كوبەيسە, قازاق ءتىلىنىڭ عىلىمداعى تىنىسى سوندا اشىلادى. اباي ۋنيۆەرسيتەتىنىڭ عالىمدارى دايىنداعان گەنەتيكا سالاسىنا ەلەكتروندى وقۋ قۇرالى زامانعا لايىقتالعان ءتيىمدى وقۋلىق.
وقۋ قۇرالىن جاراتىلىستانۋ جانە گەوگرافيا ينستيتۋتىنىڭ جاس عالىمدارى مەن پروفەسسور-وقىتۋشىلار قۇرامى بيولوگيا عىلىمدارىنىڭ دوكتورى دوكتورحان ايدارباەۆانىڭ جەتەكشىلىگىمەن ازىرلەنگەن.
كىتاپتى دايىنداۋشىلاردىڭ ايتۋىنشا, ەلەكتروندى وقۋ قۇرالىنىڭ ماقساتى – بيولوگ ستۋدەنتتەرگە ورگانيزمدەردىڭ تۇقىم قۋالاۋشىلىق پەن وزگەرگىشتىك زاڭدىلىقتارىن, تۇقىم قۋالاۋشىلىقتىڭ تسيتولوگيالىق نەگىزدەرى تۋرالى تەرەڭ ءبىلىم بەرۋ. ەلەكتروندى وقۋ قۇرالىنىڭ مازمۇنىنا كىرىسپە, ءدارىس تەزيستەرى, زەرتحانالىق جاتتىعۋلار, ستۋدەنتتەردىڭ ءوز بەتىمەن ورىندايتىن تاپسىرمالارى, تەست تاپسىرمالارى, گەنەتيكادان ءارتۇرلى تاقىرىپتاعى وقۋ فيلمدەرى ەنگىزىلگەن. وقۋ قۇرالىنىڭ كومەگىمەن ستۋدەنتتەر قازىرگى گەنەتيكانىڭ ءارتۇرلى تاقىرىپتارى بويىنشا ءبىلىم الادى.
