قوس تاراپ قازاقستان رەسپۋبليكاسىنان قىرعىز رەسپۋبليكاسىنا جونەلتىلەتىن ونىمدەر مەن كورسەتىلەتىن قىزمەتتەردى ەكسپورتتاۋ اياسىندا بانك كليەنتتەرىن ساقتاندىراتىن بولادى, سونداي-اق ساۋدالىق قارجىلاندىرۋ سالاسىنداعى بىرلەسكەن جوبالاردى ىسكە اسىرۋ تۋرالى ورتاق شەشىمگە كەلدى.
كەلىسىم ستراتەگيالىق ارىپتەستىكتى دامىتۋدى, بىرلەسكەن باعدارلامالار مەن جوبالاردان حابار بەرەتىن سەمينارلاردى, دوڭگەلەك ۇستەلدەردى, تانىستىرىلىمداردى ۇيىمداستىرۋدى كوزدەيدى. سونىمەن قاتار سىرتقى ساۋدا قىزمەتىن جۇزەگە اسىراتىن كومپانيالاردى قارجىلاندىرۋ, ساقتاندىرۋ جانە وزگە دە قولداۋ كورسەتۋ ماسەلەسى قاراستىرىلعان.
«بۇل كەلىسىم قىرعىزستانداعى قازاقستاندىق ءونىمدى ساتىپ الۋشىلارعا جەڭىلدەتىلگەن ساۋدالىق قارجىلاندىرۋعا يە بولۋعا مۇمكىندىك بەرەدى. ءبىز ەكىجاقتى ىنتىماقتاستىق اياسىندا جيھاز جەتكىزۋ بويىنشا العاشقى جوبانى تالقىعا سالدىق. الداعى ۋاقىتتا قىرعىزستاننىڭ باسقا بانكتەرى دە «KazakhExport» باعدارلاماسىنا قىزىعۋشىلىق تانىتادى دەپ ۇمىتتەنەمىز», دەدى «KazakhExport» باسقارماسى توراعاسىنىڭ ورىنباسارى قۋانىش مۇقاجانوۆ.
«رسك بانك» ااق باسقارما توراعاسىنىڭ ءبىرىنشى ورىنباسارى اقىلبەك تۇرداليەۆ ىنتىماقتاستىقتىڭ مۇمكىندىگى كەڭ ەكەنىن ءمالىم ەتتى: «رسك بانكى – «KazakhExport» كومپانياسىمەن بايلانىس ورناتقان قىرعىزستاننىڭ العاشقى بانكى. بۇل ىنتىماقتاستىق قازاقستاندىق ءونىمدى قىرعىزستانعا ساۋدالىق قارجىلاندىرۋ ارقىلى جەتكىزۋدى جوسپارلاپ وتىرعان كاسىپكەرلەرگە, ياعني ەكسپورتتاۋشىلار مەن يمپورتتاۋشىلارعا تاماشا مۇمكىندىك ەكەنى ءسوزسىز».
«KazakhExport» ەسك» اق – «بايتەرەك» ۇبح» اق ەنشىلەس كومپانياسى. كومپانيانىڭ نەگىزگى مىندەتى – ءتۇرلى قارجى قۇرالدارى ارقىلى وتاندىق شيكىزاتتىق ەمەس ەكسپورتتاۋشىلارعا قولداۋ كورسەتۋ. 2016 جىلدان باستاپ «KazakhExport» 200-دەن اسا ەكسپورتتاۋشىعا 870 ميلليارد تەڭگەدەن اسا سوماعا قولداۋ كورسەتتى. قولداۋ كورسەتىلەتىن كاسىپورىندار ەكونوميكانىڭ تاماق جانە حيميا ونەركاسىبى, ماشينا جاساۋ, اگروونەركاسىپتىك كەشەن, مەتاللۋرگيا جانە باسقا دا ماڭىزدى سالالارىندا جۇمىس ىستەيدى. ەكسپورتتىق باعىتتار تىزىمىندە وزبەكستان, رەسەي, اۋعانستان, قىرعىزستان, تاجىكستان, قىتاي, تۇرىكمەنستان, ازەربايجان, ليتۆا, ۋكراينا, بەلارۋس, يتاليا, تۇركيا جانە ت.ب. ەلدەر بار. كومپانيانىڭ «ەكسپورتتىق ساۋدالىق قارجىلاندىرۋ» جانە «اككرەديتيۆتەردى ساقتاندىرۋ» قولداۋ كورسەتۋ قۇرالدارى شەتەلدىك ساتىپ الۋشىلار تاراپىنان قازاقستاندىق ونىمگە سۇرانىستى ارتتىرۋ ءۇشىن ەنگىزىلگەن. قارجىلاندىرۋ تولەم شارتتارى بويىنشا ەسەپ ايىرىسۋدىڭ اككرەديتيۆتىك نىسانى قولدانىلا وتىرىپ, قازاقستاننىڭ ەكىنشى دەڭگەيدەگى بانكتەرى ارقىلى جاناما تۇردە ۇسىنىلادى.
ايتا كەتكەن ءجون, «KazakhExport» كومپانياسى 2019 جىلى جەلتوقساندا بىشكەك قالاسىندا شەتەلدىك وكىلدىڭ كەڭسەسىن اشقان بولاتىن. وكىلدىك ءوز قىزمەتى اياسىندا كاسىپكەرلەردىڭ تىكەلەي بايلانىستارىن جولعا قويۋعا, قازاقستاندىق كاسىپورىندار مەن قىرعىز رەسپۋبليكاسىنداعى الەۋەتتى ساتىپ الۋشىلار اراسىنداعى ساۋدا قاتىناستارىن دامىتۋعا, سونداي-اق ەكىجاقتى مامىلەلەر تاۋەكەلدەرىن بارىنشا ازايتۋعا ىقپال ەتەدى.
