كوكشەتاۋ قالاسىنىڭ تۇرعىنى ۆەنيامين سولوۆەۆتىڭ اتاعى ءجۇزىم وسىرۋمەن شىققان. وزگە دە جەمىس-جيدەكتى مولىنان ەگەدى. ەڭ باستى جەتىستىگى, ىستىقتى سۇيەتىن, بۇل ولكەنىڭ اۋا رايىنا كوندىگە قويمايدى دەلىنەتىن ءجۇزىم وسىرگەلى جيىرما جىل. يگىلىككە بوگىپ تۇرعان ساياجاي يەسىنىڭ ايتۋىنا قاراعاندا, ءجۇزىم قايتپاس قايسار جىگەرلىگە عانا وسسە كەرەك. قالا تۇرعىندارى, ونىڭ ىشىندە ساياجايى بارلار ءجۇزىم وسەتىن جەردى كورۋگە اۋەس. ۆەنيامين اعايدىڭ ايتۋىنا قاراعاندا, ءجۇزىم ءوسىرۋدىڭ ءادىس-تاسىلدەرىن مەڭگەرىپ, ويعا العان شارۋاسىن ىسكە اسىرۋ ءۇشىن قانشاما ادەبيەتتى اقتارعان. الىس-جاقىن جەردەگى ءجۇزىم ەگىپ, جەردىڭ ءجۇزىن جىلىتقاندارمەن سىرلاسقان. سويتسە, ءجۇزىم وسىرگەن جانعا مىقتى شىدام, ەرەن ەڭبەكقورلىق كەرەك ەكەن. ايتسا ايتقانداي-اۋ, اۋىلداعى اعايىن ۋىلجىپ تۇرعان ءجۇزىم ءوسىرۋ بىلاي تۇرسىن, قارا جەرگە كومە سالساڭ, قاپتاپ شىعاتىن كارتوپ تا ەگە الماي وتىرعان جوق پا؟!
الدەنەشە رەت تاجىريبە جاساعان, قاتەلىكتەرىن ساراپقا سالعان. اقىر سوڭىندا تاۋ باسىنان قۇدىق قازعانداي قياپات ەڭبەكپەن كوزدەگەن ماقساتىنا جەتكەن. قازىر كەۋدەسىن ماقتانىش كەرنەيدى. ءبىر جاقسىسى, تاجىريبەسىن جاسىرماي, جايىپ سالۋعا, ۇمتىلعان جاننىڭ قولتىعىنان دەمەپ, كومەكتەسۋگە دايىن. العاش رەت ناتيجەگە قول جەتكىزگەندە توبەسى كوككە ءبىر-اق ەلى جەتپەي قالعانداي قۋانعان. ەندى قايتسىن, تابانى كۇرەكتەي جەتى جىلعى ەڭبەگىنىڭ ناتيجەسى.
– سولتۇستىك قازاقستاننىڭ اۋا رايىنا ءجۇزىمنىڭ «يزابەللا» دەپ اتالاتىن ءتۇرى قولايلى. بۇل سۇرىپ سۋىققا شىدامدى. ءبىزدىڭ ءوڭىردىڭ تابيعاتىنا تەز كوندىگەتىن بۇل سۇرىپتى امەريكا سەلەكتسيونەرى ۋيليام پريكس شىعارسا كەرەك. ءتاتتى ءجۇزىمنىڭ اتاۋىن ايەلىنىڭ قۇرمەتىنە يزابەللا دەپ اتاعان. ارينە, ءدامى جاعىنان كەلگەندە وڭتۇستىكتىڭ جۇزىمىمەن تايتالاسا الماس ەدى. بىراق سونىڭ وزىندە دە ەڭبەكپەن كەلگەن ىرىس بولعاندىقتان, ءدامى ءتىل ۇيىرەتىن بولىپ كورىنەدى», دەيدى ۆەنيامين الەكساندروۆيچ.
تاجىريبەلى ساياجاي يەسىنىڭ ايتۋىنا قاراعاندا, ەڭ الدىمەن ەگەتىن سۇرىپتى انىقتاۋ كەرەك ەكەن. قازىرگى كۇنى ساياجايمەن اينالىسۋ وڭايىراق. ەرتە كوكتەمدە الما, المۇرت ءتارىزدى جەمىستەردىڭ تۇقىمى كوپتەپ ساتىلادى. ءجۇزىم سۇرپىن ۇسىناتىندار دا تابىلادى. ايتسە دە مەن ءوزىم ناتيجەسىن كوزىن كورگەن كورشىلەردەن العان ءجون دەپ ەسەپتەيمىن. ءوزى دە وسى ءىسىن باستاعان كەزدە بىرنەشە بۇتاق قانا العان ەكەن. تورتەۋى عانا تامىر جايعان. سول ءتورت ءتۇپ ءجۇزىم – بۇگىندە كوكشەتاۋدا وسى جەمىستىڭ اتاسى اتانىپ وتىرعان ۆەنيامين الەكساندروۆيچتىڭ كورگەن جاننىڭ كوزىن قىزىقتىراتىن باقشاسىنىڭ باستاۋ كوزى. ءجۇزىم باعبانىنىڭ جارى فاينا ميحايلوۆنا – سوناۋ ستۋدەنتتىك جىلداردان بەرى تىنىمسىز ەڭبەكتى جانىنا سەرىك ەتكەن ۆەنيامين الەكساندروۆيچتىڭ كومەكشىسى. ەكەۋى دە ماڭداي تەرلەرىمەن سۋارىلىپ, جايقالىپ وسكەن جەمىس-جيدەكتى, اسىرەسە گۇلدەردى جاقسى كورەدى.
نەسى بار, ادەمى ارەكەت جۇعىستى بولىپ, كوكشە تاۋلارىنىڭ باۋرايىندا جايقالىپ ءجۇزىم ءوسىپ تۇرسا, ءبىر عانيبەت ەمەس پە؟
كوكشەتاۋ قالاسى
