اۋلەت يەسى سارسەنعالي ساعىندىقوۆتىڭ ماماندىعى – ەلەكتريك. ول قازىر «جەزقازعانتۇستىمەت» ءوب-نىڭ ەلەكتر جابدىقتارىنا سەرۆيستىك قىزمەت كورسەتۋ باسقارماسىندا ەڭبەك ەتەدى. بۇلاي جازعانىمىز دۇرىس تا ەمەس شىعار. ويتكەنى ول ەڭبەك جولىن باستاعان وسى ۇجىمدا 45 جىلدان بەرى تابان اۋدارماستان جۇمىس ىستەپ كەلەدى ەمەس پە؟ ماماندىعىن دا وزگەرتكەن ەمەس. ءاۋ باستا جۇمىسقا ەلەكتريك بولىپ ورنالاسىپ ەدى, ءالى سول قالپى. ۇيرەنۋشى بولىپ باستاعان ماماندىعىنىڭ قىر-سىرىن ابدەن مەڭگەرگەنى سونشالىق, بۇگىندە ول – 7-ساناتتى ەلەكتريك. بار وزگەرىس سول عانا. ماماندىقتى مەڭگەرۋ, ەڭبەك جولىندا ءوسۋ دەگەن وسى.
«جۇمىس ورنىن اۋىستىرۋ تۋرالى ويىما دا كىرىپ شىقپاپتى. راس, «جوعارى جالاقى الاسىڭ» دەپ وزدەرىنە شاقىرعان ۇجىمدار بولعان. بىراق ءوزىم جاستايىمنان بىرگە جۇرگەن ارىپتەستەرىمدى قيمادىم. جالاقى تابىلعانمەن, جانىمداعىداي جورا-جولداستار جاڭا جەردەن تابىلا ما, جوق پا دەپ ويلادىم, – دەيدى ساكەڭ. – اقشا دەگەننىڭ كوبەيگەن سايىن جەتپەيتىن اۋرۋى بولادى. ءوز ورتاڭدا ابىرويلى بولىپ جۇرگەننەن ارتىعى جوق. بالالارىما دا وسىنى ايتىپ وتىرامىن».
زايىبى ءبيبىسارا ەكەۋى ءۇش ۇل تاربيەلەپ ءوسىرىپتى. ۇلكەنى تولەپبەرگەن اكەسىنە تارتىپ ەنەرگەتيكا سالاسىن تاڭدادى. العاشىندا جەزقازعان اگرارلى-تەحنيكالىق كوللەدجىندە ەلەكترلى جانە ەلەكترمەحانيكالىق جابدىقتاردى تەحنيكالىق پايدالانۋ مەن جوندەۋ ماماندىعى بويىنشا وقىعان تولەپبەرگەن كەيىن ءو.بايقوڭىروۆ اتىنداعى جەزقازعان ۋنيۆەرسيتەتىندە ەلەكتر ەنەرگەتيكاسى ماماندىعى بويىنشا ءبىلىمىن شىڭداعان كورىنەدى. قازىر ت.ساعىندىقوۆ – «جەزقازعانتۇستىمەت» ءوب-نىڭ ەلەكتر جابدىقتارىنا سەرۆيستىك قىزمەت كورسەتۋ باسقارماسىنىڭ تاۋ-كەن اۆتوماتيكا تسەحىنىڭ باستىعى.
«باستىق» دەگەن اتىمىز عانا, ايتپەسە ورىندىقتا شىرەنىپ وتىراتىن شەنەۋنىك ەمەسپىز, ەلەكتريكتەرمەن, باسقا دا ماماندارمەن بىرگە ءوندىرىستىڭ بەل ورتاسىندا جۇرەمىز, – دەگەن تولەپبەرگەن لاۋازىمى قاراپايىم قىزمەتكە لايىق ەكەنىن ءتۇسىندىردى. – جۇمىستى ۇيلەستىرۋ, كوزىن تابا ءبىلۋ, دەر مەزگىلىندە ارەكەت ەتۋ جانە سونداي سانسىز جۇمىسقا باسشىلىق جاساۋ – مەنىڭ مىندەتىم».
سارسەنعاليدىڭ ەكىنشى پەرزەنتى ايدوس بولسا, «ترانكو ەكسپرەسس» جشس ساتباەۆ فيليالىندا اۆتوكولىك جۇرگىزۋشىسى, كەنجەسى جاندوس – جىلداندى كەنىشىنە قاراستى سارىوبا شاحتاسىندا ەلەكترسلەسار.
«ۇلداردىڭ ۇشەۋى دە اياقتانعان. ايگۇل, ايگەرىم, ايعانىم ەسىمدى ءۇش كەلىنىم بار. ولاردان 10-نان اسا نەمەرە ءسۇيىپ وتىرمىز. «قۇداي بەرەرىن توقتاتپاسىن» دەپ تىلەپ تە قويامىز. نەمەرەنىڭ الدى ازامات بولىپ تا جاتىر. ۇلكەن نەمەرەمىز ەراسىل – ستۋدەنت. ليتسەيدى ۇزدىك ءتامامداپ, جوعارى وقۋ ورنىنا ءتۇسىپ, گرانت يەگەرى اتاندى. ۇرپاعىمىزدىڭ جامان اتى شىقپاي, قاتارىنان قالماي جۇرگەندەرىن كورگەندە تاۋبە دەيمىز, ولارعا قاراپ ومىرگە سۇيىنەمىز», دەگەن ساكەڭ شوبەرە سۇيەتىن كۇننىڭ دە الىس ەمەس ەكەنىن يشارامەن جەتكىزدى.
شاڭىراقتىڭ وتاناسى, قالاداعى №10 بالاباقشانىڭ اسپازى ءبيبىسارا قاپانقىزى داستارقاننىڭ ءدامىن كەلتىرۋدى ەشكىمنەن سۇرامايتىنى حاق.
ساتباەۆ قالالىق «مەرەيلى وتباسى» بايقاۋىندا باس جۇلدەنى جەڭىپ العان ساعىندىق اۋلەتى وبلىستىق دوداعا دا قاتىسىپ, باق سىناپ, «ونەگەلى وتباسى» اتالىمىنىڭ يەگەرى اتاندى.
ماسەلە – ماراپاتتا ەمەس. كوپشىلىكتىڭ ورتاسىندا قادىرىڭنىڭ بار ەكەنىن سەزىنە بىلۋدەن اسقان باقىت جوق. سارسەنعالي ساعىندىقوۆتىڭ اۋلەتى – سونداي باقىت بۇيىرعان اۋلەت.
ۇلىتاۋ وبلىسى,
ساتباەۆ قالاسى
