ايتۋلى ءىس-شاراعا ازەربايجان مادەنيەت ءمينيسترى ءادىل كەريملي, قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ, قازاقستاننىڭ ازەربايجانداعى ەلشىسى ءالىم بايەل, ازەربايجاننىڭ ميللي ءماجىلىسى مادەنيەت كوميتەتىنىڭ ءتورايىمى گانيرا پاشاەۆا, ازەربايجان ۇلتتىق عىلىم اكادەمياسىنىڭ پرەزيدەنتى يسا گابيببەيلي, ازەربايجان ديپلوماتيالىق اكادەمياسىنىڭ رەكتورى حافيز پاشاەۆ, ازەربايجان ۇلتتىق كىتاپحاناسىنىڭ ديرەكتورى كارىم تاحيروۆ, قازاقستان ۇلتتىق كىتاپحاناسىنىڭ ديرەكتورى باقىتجامال وسپانوۆا, سونداي-اق چينگيز ابدۋللاەۆ, قويشىعۇل زارلى, باقتىعالي ايجىگىتوۆ, باقىت قۇتپانباەۆ, سايات قامشىگەر, تالانت ارىنعالي, نۇرعالي وراز, قادىربەك قانىپيا ۇلى, تاحسين مۋتالليبوۆ, ناريمان ابدۋلراحمانلى جانە ت.ب. سياقتى عىلىم, ادەبيەت جانە ونەر قايراتكەرلەرى قاتىستى.
كونفەرەنتسيا بارىسىندا قاتىسۋشىلار كەمەل توقاەۆ پەن مير جالال پاشاەۆتىڭ ءومىرى مەن شىعارماشىلىق جولى تۋرالى باياندامالار جاساپ, ءوزارا مادەني ىقپالداستىق ارقىلى تۇركى حالىقتارىن ودان ءارى جاقىنداستىرۋدىڭ ماڭىزدىلىعى تۋرالى پىكىرلەرىمەن ءبولىستى.
ءىس-شارا اياسىندا ك.توقاەۆتىڭ ازەربايجان تىلىندە جارىق كورگەن «تۇندە اتىلعان وق» كىتابى مەن م.پاشاەۆتىڭ قازاق تىلىندە باسىلىپ شىققان «تاۋلاردىڭ جۇرەگى» كىتابىنىڭ تۇساۋى كەسىلدى. تۇركى الەمىنىڭ كوركەم ءسوز شەبەرلەرىنىڭ شىعارمالار جيناعىنىڭ تۇساۋكەسەرىمەن قاتار, ولاردىڭ شىعارماشىلىعىنا ارنالعان كىتابي-يلليۋستراتسيالىق كورمە دە ۇيىمداستىرىلدى.
م.وتارباەۆ ءىس-شارانىڭ وتۋىنە بايلانىستى قازاقستان رەسپۋبليكاسى پرەزيدەنتىنىڭ قۇتتىقتاۋ حاتىن وقىپ, ونى ازەربايجان تاراپىنا تاپسىردى. مەملەكەت باسشىسىنىڭ حاتىندا «قازاق پەن ازەربايجان – ەجەلدەن تۋىس, دوس حالىقتار. باۋىرلاس ەلدەردىڭ قارىم-قاتىناسىن نىعايتۋعا كاسپي تەڭىزى ارقىلى جالعاسىپ جاتقان تاتۋ كورشىلىك پەن ەكونوميكالىق ىنتىماقتاستىق قانا ەمەس, قادىرلى قالامگەرلەرىمىز بەن كورنەكتى تۇلعالارىمىزدىڭ رۋحاني بايلانىستارى دا زور سەپتىگىن تيگىزىپ كەلەدى», دەلىنگەن.
ازەربايجان مادەنيەت ءمينيسترى ءا.كەريملي ازەربايجان ۇلتتىق كىتاپحاناسىنىڭ 100-جىلدىعىن مەرەكەلەۋمەن قاتار ءوتىپ جاتقان كونفەرەنتسيانىڭ ەكى ەلدىڭ ادەبيەتى مەن مادەنيەتى ءۇشىن ماڭىزدىلىعىن اتاپ ءوتتى.
ەلشى ءا. بايەل ءوز سوزىندە قازاقستاننىڭ قاشاندا ازەربايجانمەن بىرگە بولاتىنىن مالىمدەدى. سونىمەن قاتار, ديپلومات پرەزيدەنت ق.توقاەۆ پەن پرەزيدەنت ي.اليەۆ اراسىنداعى سەنىمدى ديالوگتىڭ ارقاسىندا ەلدەر اراسىنداعى جان-جاقتى ىنتىماقتاستىقتىڭ جاڭا دەڭگەيگە شىققاندىعىن اتاپ ءوتتى.
ميللي ءماجىلىس مادەنيەت كوميتەتىنىڭ ءتورايىمى گ.پاشاەۆا ءوز سوزىندە قازاقستان مەن ازەربايجاننىڭ باۋىرلاس حالىقتارى اراسىنداعى ورتاق تاريحي تامىرلار, سونداي-اق ەكى ەلدىڭ مادەني ىنتىماقتاستىعى تۋرالى ايتىپ بەردى. دەپۋتات ك.توقاەۆتىڭ ازەربايجان تىلىندەگى كىتابى مەن م. پاشاەۆتىڭ قازاق تىلىندەگى كىتابىنىڭ تۇساۋكەسەرىن قازاق پەن ازەربايجان دوستىعىنىڭ جارقىن ۇلگىسى دەپ اتادى.
كەمەل توقاەۆتىڭ ازەربايجان تىلىندەگى كىتابىنا العى ءسوز جازعان دەتەكتيۆ جانرىنىڭ شەبەرى چينگيز ابدۋللاەۆ توقاەۆ بيوگرافياسىنىڭ تاڭقالارلىق تۇستارىنا توقتالدى.
ۇلتتىق عىلىم اكادەمياسىنىڭ پرەزيدەنتى ي. گابيببەيلي قوس جازۋشى تاعدىرىنىڭ ۇقساستىعىنا نازار اۋداردى: ەكەۋى دە اتا-اناسىنان ەرتە ايرىلىپ, اعالارىنىڭ قامقورلىعىمەن ەر جەتتى. ەكەۋى دە ادامگەرشىلىك پەن وتانشىلدىق سياقتى قۇندىلىقتاردى دارىپتەپ, مايدانگەرلەردىڭ ءومىرىن سۋرەتتەدى.
كونفەرەنتسيا سوڭىندا ەكى ەلدىڭ ۇلتتىق كىتاپحانالارىنىڭ باسشىلارى قازاقستاننىڭ ازەربايجانداعى ەلشىلىگىنە ءىس-شارانى ۇيىمداستىرۋعا قولداۋ كورسەتكەنى ءۇشىن ريزاشىلىقتارىن ءبىلدىردى, سونداي-اق قوناقتارعا ءىس-شاراعا قاتىسقاندارى جانە تۇركى الەمىنىڭ مادەني بايلانىستارىن دامىتۋعا قوسىپ وتىرعان ۇلەستەرى ءۇشىن العىس ءبىلدىردى.
