سۋرەتتەر نازىمحان تۇرسىننىڭ جەكە مۇراعاتىنان الىندى
نازىمحان تۇرسىن – استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى № 5 مامانداندىرىلعان ءورت ءسوندىرۋ ءبولىمى باسشىسىنىڭ ورىنباسارى. ول مۇندا 2020 جىلدان بەرى قىزمەت ەتىپ كەلەدى. بۇل ءبولىم تەك ءورت ءسوندىرۋ جۇمىستارىمەن عانا ەمەس, سونداي-اق اۆاريالىق-قۇتقارۋ قىزمەتىمەن دە اينالىسادى. قالا بويىنشا شاقىرتۋ كوپ تۇسەتىن مەكەمە دە وسى جەر. ءورت ءسوندىرۋشىنىڭ ايتۋىنشا, ءبىر كۇندە ون شاقتى شاقىرتۋعا دەيىن ءتۇسۋى مۇمكىن. دابىل قاعىلعان ساتتە ولار ءبىر مينۋت ىشىندە جينالىپ, توتەنشە جاعداي ورنىنا ون مينۋت ارالىعىندا جەتەدى.
وتان ءۇشىن وتقا ءتۇسىپ جۇرگەن كەيىپكەرىمىزدىڭ بۇل ماماندىققا دەگەن اڭسارى بالا كۇنىنەن-اق اۋعان. اعا-بۋىننىڭ ىزىنەن ەرىپ, وكشە باسىپ كەلە جاتقان ول ماماندىعىن اداسپاي تاۋىپتى. كوكشەتاۋ تەحنيكالىق ينستيتۋتىندا ارنايى ءبىلىم الىپ, قازىر ەڭبەگىنىڭ نانىن جەپ ءجۇر. ءوزى بۇل سالادا تەك ماماندىعىن شەكسىز جاقسى كورەتىن تاڭداۋىنا ادال قىزمەتكەرلەر جۇمىس ىستەيتىنىن ايتادى.
ء«ورت سوندىرۋشىگە ەڭ اۋەلى جاۋاپكەرشىلىك قاجەت. ءبىز ءولىم مەن ءومىردىڭ اراسىندا تۇرعان ادامدار ءۇشىن جاۋاپتىمىز. بۇل سالاعا ادامدارعا جاقسىلىق جاسايمىن دەگەندەر عانا كەلەدى. مۇنداعىلار ادال ەڭبەكتىڭ ابىرويعا بولەيتىنىن جاقسى بىلەدى. سونداي-اق جىلدام ءارى سۋىققاندى شەشىم قابىلداۋ ماڭىزدى. ءورت ءسوندىرۋ – ۇجىمدىق جۇمىس. وتتىڭ اراسىندا جۇرگەندە بىرلىگىمىز بەكەم», دەيدى ول.
بۇل ماماندىق يەلەرى فيزيكالىق, پسيحولوگيالىق دايارلىق وقۋلارىن وقىپ تۇرادى. جالپى جۇمىس كۇنى تەمىردەي تارتىپكە بايلانعان. كۇن ءتارتىبى تاڭعى تارالىمنان باستالادى. وتىز مينۋت ىشىندە اۋىسىم قىزمەتكەرلەرىنىڭ تولقۇجاتتارى, سىرتقى كيىمى, جالپى ۇسقىنى مەن اۆتوموبيلدەرگە ارنالعان رۇقساتتاما قاعازى تەكسەرىلەدى. بۇدان ءارى ەڭبەك ادامدارىنان قىزمەتتىك مىندەتتەمەلەرىن ءبىلۋى بويىنشا سۇراقتار قويىلادى. وتكەن تاۋلىكتە اتقارىلعان جۇمىستار جونىندە ءبولىم باسشىسىنا بايانداما جاسالادى. تاڭعى تارالىمنان سوڭ اۋىسىم كەزەكشىلىگى جۇرگىزىلەدى. اۋىسىم كەزەكشىلىگىنە وتىز مينۋت ۋاقىت بەرىلەدى. ءورت ءسوندىرۋ ءاۆتوموبيلىنىڭ جۇرگىزۋشىلەرى ءورت ءسوندىرۋ تەحنيكالارىن قابىلداسا, ءورت ءسوندىرۋشى قاجەت قۇرال-جابدىقتاردى قابىلدايدى. بۇل رەتتە كولىكتىڭ جالپى جۇمىس ىستەۋى, سۋدىڭ بار-جوعى, ءورت سوندىرگىش كوبىكتىڭ دەڭگەيى مۇقيات تەكسەرىلەدى. نازىمحان تۇرسىننىڭ ايتۋىنشا, ءوزى قىزمەت ەتىپ جۇرگەن ءبولىمنىڭ تەحنيكالىق جابدىقتارى مەن ءورت ءسوندىرۋ اۆتوموبيلدەرى تۇگەل جاڭا. مەكەمە 2020-2021 جىلعى تەحنيكالارمەن جابدىقتالعان ەكەن. اراسىندا 2012-2015 جىلعى تەحنيكالاردىڭ دا بارىن جاسىرمادى.
ءسوز سوڭىندا ءورت ءسوندىرۋشى جىگىت ءار ءورت جاعدايى جادىندا ساقتاۋلى ەكەنىن ايتتى. وزگەنىڭ ءومىرى ءۇشىن وتقا تۇسۋدەن تايىنبايتىن ولاردىڭ جۇمىسى – ناعىز ەرلىك. بۇگىنگىنىڭ باتىرىنا اينالعان ەڭبەك ادامدارىنىڭ مەرەيى لايىم ۇستەم بولۋعا ءتيىس.
