farabi.university
شارا بارىسىندا قازاقستان پرەزيدەنتى قاسىم-جومارت كەمەل ۇلى توقاەۆتىڭ تۇرىك تىلىنە اۋدارىلعان «اكە تۋرالى وي-تولعاۋ» كىتابى تانىستىرىلىپ, تۇساۋى كەسىلدى. جاڭا جيناق جازۋشى, ەۋرازيا جازۋشىلار وداعىنىڭ توراعاسى ياكۋپ ومەروعلى باسقاراتىن «بەنگۋ» باسپاسىنان جارىق كورگەن. القالى جيىندى ءال-فارابي اتىنداعى قازاق ۇلتتىق ۋنيۆەرسيتەتى جانە ىستانبۇل ۋنيۆەرسيتەتى فارابي-ەۋرازيا عىلىمي ورتالىعى ۇيىمداستىردى. ەكىجاقتى تانىمدىق باسقوسۋدىڭ ماقساتى – كەمەل توقاەۆتىڭ شىعارماشىلىق مۇراسىن تۇركى الەمىنە تانىتىپ, باۋىرلاس مەملەكەتتەر اراسىندا ناسيحاتتاۋ جانە تۇركى ەلدەرى ادەبيەتىن دامىتۋ. كونفەرەنتسياعا ءال-فارابي اتىنداعى قازۇۋ-دىڭ باسقارما توراعاسى – رەكتورى جانسەيىت تۇيمەباەۆ, ەۋرازيا جازۋشىلار وداعىنىڭ توراعاسى ياكۋپ ومەروعلى, شەتەلدىك عالىمدار, تاريحشىلار, ىستانبۇل ۋنيۆەرسيتەتىنىڭ وقىتۋشى-پروفەسسورلار قۇرامى مەن ءبىلىم الۋشى جاستارى قاتىستى. جينالعاندار الدىندا تۇركيا ۋنيۆەرسيتەتتەرىنىڭ دوكتور-پروفەسسورلارى الي شۋكرۋ چورۋك, ابدۋلۋاقاپ كارا, ورحان سويلەمەز, اينا اسكەر ۇلى ارسلان بايانداما جاساپ, كەمەل توقاەۆتىڭ ءومىرى مەن شىعارماشىلىعىنا توقتالدى. ءال-فارابي اتىنداعى قازۇۋ-دىڭ باسقارما توراعاسى – رەكتورى جانسەيىت تۇيمەباەۆ ءوز سوزىندە جازۋشى كەمەل توقاەۆتى تۇركى الەمىنە تەرەڭىرەك تانىستىرىپ, تۋىستاس ەلدەر ادەبيەتىنە سىڭىرگەن ەڭبەگىن ايرىقشا اتاپ ءوتتى.
«قازاقستان پرەزيدەنتى قاسىم-جومارت كەمەل ۇلى توقاەۆتىڭ «اكە تۋرالى وي-تولعاۋ» كىتابى حح عاسىردىڭ باسىندا قازاق دالاسىندا وتكەن تاريحي وقيعالاردى باياندايدى. مەملەكەت باسشىسى ءوز اكەسىنىڭ ومىرىنە ۇڭىلە وتىرىپ, قاسىم جانە كەمەل اتتى قازاق جىگىتتەرىنىڭ اسقاق رۋحىن سۋرەتتەيدى. قابىرعالى قالامگەردىڭ شىعارماشىلىق ەڭبەكتەرى ارقىلى قازاق ادەبيەتىنىڭ قالىپتاسۋ تاريحىن جانە تۇركى الەمىنە سىڭىرگەن ەڭبەگىن تانىپ-بىلە الامىز», دەدى جانسەيىت تۇيمەباەۆ.
كەمەل توقاەۆ 1923 جىلى 2 قازاندا الماتى وبلىسىنىڭ قاراتال اۋدانىندا دۇنيەگە كەلگەن. 1948 جىلى قازاق مەملەكەتتىك ۋنيۆەرسيتەتىن بىتىرگەن. كەيىن «لەنينشىل جاس» (قازىرگى «جاس الاش»), «قازاقستان پيونەرى» (قازىرگى «ۇلان»), «سوتسياليستىك قازاقستان» (قازىرگى «ەگەمەن قازاقستان») گازەتتەرى رەداكتسيالارىندا جاۋاپتى قىزمەتتەر اتقاردى. 1960-1977 جىلدارى قازاق كسر جوعارعى كەڭەسى «ۆەدوموستارىنىڭ» باس رەداكتورى, 1980-1984 جىلدارى قازاقستان جازۋشىلار وداعىنىڭ ادەبي كەڭەسشىسى بولىپ جۇمىس ىستەدى. كەڭەس چەكيستەرى تاقىرىبىنا ارنالعان 10-نان استام كىتابى قازاق جانە ورىس تىلدەرىندە باسىلىپ شىقتى. كەمەل توقاەۆ – سوعىس تاقىرىبىنا ارنالعان سۇبەلى شىعارمالارىمەن قاتار, قازاق ادەبيەتىندەگى دەتەكتيۆ جانرىنىڭ نەگىزىن قالاعان كورنەكتى جازۋشى. «جۇلدىزدى جورىق», «قىس قارلىعاشى», «تۇندە اتىلعان وق», «قاستاندىق», «زامانداس سىرى», «ارناۋلى تاپسىرما», «سارعاباندا بولعان وقيعا», «تاڭبالى التىن», «سوڭعى سوققى», «سولدات سوعىسقا كەتتى», «ۇياسىنان بەزگەن قۇس» اتتى تۋىندىلاردىڭ اۆتورى.
