فوتو: https://polisia.kz/
تۇركىستان وبلىسىنىڭ پوليتسەيلەرى «قورعاۋ» باعدارلاماسىنىڭ كومەگىمەن تولەنبەگەن 6,6 ميلليون تەڭگە بەرەشەگى بار جۇرگىزۋشىنى انىقتاعانىن وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى باعلانبەك ايتپاەۆ ءمالىم ەتتى.
«تۇركىستان وبلىسىنىڭ پاترۋلدىك پوليتسيا باتالون قىزمەتكەرلەرىنىڭ پلانشەتتەرىنە «قورعاۋ – قاۋىپتى جۇرگىزۋشى» موبيلدىك باعدارلاماسى ارقىلى تولەنبەگەن ايىپپۇلدارى بار Volkswagen Passat اۆتوكولىگى تۋرالى اقپارات بەرىلدى. ءتارتىپ ساقشىلارى اقپارات بويىنشا بىردەن ىسكە كىرىسىپ, اتالمىش كولىكتىڭ جۇرگەن جەرىن انىقتاپ, شىمكەنت – سامارا تاس جولىندا توقتاتتى.
تەكسەرۋ كەزىندە بۇل اۆتوكولىك يەسى سوت ورىنداۋشىسىنىڭ قاۋلىسىنا سايكەس جالپى سوماسى 6,6 ميلليون تەڭگە بەرەشەك ەكەنى انىقتالدى.
جۇرگىزۋشىنىڭ اكىمشىلىك ايىپپۇلدارىنىڭ 80 پايىزى جىلدامدىق رەجيمىن بۇزعانى ءۇشىن جازىلعان.
ءتارتىپ ساقشىلارى كولىك جۇرگىزۋشىسىنە 6 ميلليون تەڭگەدەن اسىپ جىعىلاتىن ايىپپۇلدى كەشىكتىرمەي تولەۋ قاجەتتىگىن ەسكەرتتى.
