سۋرەتتى تۇسىرگەن بەكجان جۇماباي
توت باسپايتىن اسىل بولاتتان جاسالعان ەسكەرتكىش كومپوزيتسياسىندا بەينەلەنگەن ۇلتتىق كامزول كيگەن, سالپىنشاق سىرعا تاققان قازاق قىزى گرانيت تاستىڭ ۇستىندە جوعارى قاراپ قيالداپ وتىرعانداي. بيىك وكشە ادەمى ءتۋفليى, تىزەسىندە تۇرعان نوۋتبۋك ونىڭ وزىنە سەنىمدى, ىسكەر, العىر قالپىن سيپاتتاپ تۇر. كەيىپكەردىڭ العا سوزعان سول قولىنىڭ ساۋساعىنا الدەبىر قۇس قوناقتاي قالىپتى.
– جەرگىلىكتى ىسكەر ايەلدەر كەڭەسىنىڭ وكىلدەرى اقپان ايىندا جولىعىپ, اق جايىق ءوڭىرىنىڭ ىسكەر ايەلدەرى قاۋىمداستىعى اتىنان وبلىس ورتالىعىنا ءبىر ەسكەرتكىش سىيعا تارتقىسى كەلەتىنىن ايتتى. ارينە, ولاردىڭ بارلىق تىلەگىن ەسكەرە وتىرىپ وسى شىعارمانى جاساپ شىقتىق. ەسكەرتكىش «ماڭگى مەتالل» دەپ اتالاتىن ماتەريالدى ءپىسىرۋ ارقىلى جاسالعان. بۇل – توت باسپايتىن, وتە بەرىك مەتالل. مۇنى جاساپ شىعۋعا جارتى جىلدان اسا ۋاقىت كەتتى. ءمۇسىننىڭ ءبىر بۇيىرىنە اقىن مۇنايدار بالمولدانىڭ ءبىر شۋماق ولەڭى جازىلدى. ماعان بۇل كومپوزيتسيانىڭ تۇرعان جەرى دە ۇناپ تۇر: جاقىن ماڭدا ءىرى ساۋدا ورتالىعى بار, ادام اياعى ۇزىلمەيتىن, شۋلى, ىسكەري ورتا. وسى شىعارماشىلىق جۇمىسىمىز ارقىلى سۇيىكتى ورال قالامىزدىڭ كوركەيە تۇسۋىنە ۇلەس قوسساق, نيەتىمىزدىڭ اقتالعانى دەپ بىلەمىز, – دەيدى ءمۇسىننىڭ اۆتورى, سۋرەتشىلەر وداعىنىڭ مۇشەسى ەرعالي بەكەشوۆ.
ەلورداداعى «استانانىڭ قۇرداسى» كەشەنىنىڭ اۆتورى ەرعالي بەكەشوۆتىڭ قولىنان شىققان ەرەكشە مۇسىندەر ورال مەن اقساي قالالارىندا, وڭىردەگى اۋدان ورتالىقتارىندا كوپشىلىكتىڭ كوزايىمىنا اينالعان. ال ءدال وسى جاڭا ءمۇسىننىڭ شىعىنىن ليانا تۇرسىنوۆا, داريعا جۇماگەلديەۆا, بالزيا ەۆەنەەۆا, توعجان بابيەۆا, اينا باەميروۆا, دينارا قازيەۆا سىندى ىسكەر قىز-كەلىنشەكتەر جانە باتىس قازاقستان وبلىستىق قوعامدىق تاماقتاندىرۋ قاۋىمداستىعى كوتەرىپتى.
– ءبىزدىڭ كەڭەستىڭ قۇرامىندا 2 500-دەي كاسىپكەر قىز-كەلىنشەك بار. بۇگىنگى ەسكەرتكىش ءوڭىر ەكونوميكاسىنىڭ دامۋىنا ۇلەس قوسىپ جۇرگەن ىسكەر ارىپتەستەرىمە لايىقتى تارتۋ دەپ ويلايمىن, – دەيدى باتىس قازاقستان وبلىستىق ىسكەر ايەلدەر كەڭەسىنىڭ توراعاسى ليانا تۇرسىنوۆا.
باتىس قازاقستان وبلىسى
