«Batyrlar» اسكەري-پاتريوتتىق قوزعالىسىنىڭ تاربيەلەنۋشىلەرىمەن بولعان كەزدەسۋدە گەننادي ۆلاديميروۆيچ ەل اسكەرىنىڭ قۇرىلۋى مەن قالىپتاسۋ تاريحىنا توقتالدى. اسكەريلەر اۋلەتىنەن شىققان ول – ەلىمىز قارۋلى كۇشتەرىنىڭ باستاۋىندا تۇرعان تۇلعا. گەنەرال تانك پولكىنە باسشىلىق جاسادى. تانك ديۆيزياسىنىڭ شتاب باستىعى بولىپ ابىرويلى قىزمەت اتقاردى. وڭتۇستىك اسكەري وكرۋگىنىڭ شتابىن باسقاردى. قورعانىس مينيسترلىگى شتابتار باستىقتارى كوميتەتى توراعاسىنىڭ ورىنباسارى قىزمەتىن اتقارىپ, قۇرمەتتى دەمالىسقا شىقتى.
تانكيست قىزمەتى تۋرالى ايتقان ارداگەر ءومىرىنىڭ قۋاتتى ءارى كوپتوننالىق جاۋىنگەرلىك ماشيناسىمەن تىعىز بايلانىستى ەكەنىن اتاپ ءوتتى. شىنجىر تاباندى تەحنيكانىڭ سيپاتتاماسىنا جان-جاقتى توقتالدى. وقۋشىلاردى جاۋىنگەرلىك ماشيناداعى سنارياد سانى, ونى قولدانۋ, تانكتىڭ وسال جەرى قايدا دەگەن سۇراقتار قىزىقتىردى.
– توزىمدىلىك, بويىڭنىڭ قىسقا بولۋى, جاقسى ءبىلىم, قاتاڭ ءتارتىپ – بۇل تانكيسكە قاجەتتى نەگىزگى قاسيەتتەر, – دەپ اتاپ ءوتتى گەننادي نوسونوۆسكي. – تانك بولىمشەسىنىڭ جەتىستىگى نەگىزىنەن ەكيپاجدىڭ ۇيلەسىمدى ءىس-ارەكەتىنە بايلانىستى. سول سەبەپتى تانكيستەردى دايارلاۋعا كوپ كوڭىل بولىنەدى. الماتىداعى قۇرلىق اسكەرلەرىنىڭ اسكەري ينستيتۋتى – وفيتسەر كادرلاردىڭ نەگىزگى ۇستاحاناسى. ال تانك بولىمشەلەرىنىڭ كىشى ماماندارى گۆاردەيسك گارنيزونىنداعى وقۋ ورتالىعىندا دايارلانادى, – دەپ اتاپ ءوتتى ارداگەر.
ەلىمىزدىڭ قارۋلى كۇشتەرىندە اتالىپ وتەتىن 15 قىركۇيەك – تانكيست كۇنىنىڭ تاريحى سوناۋ 1942 جىلدان باستاۋ الادى. سوعىستىڭ ءبىرىنشى جىلى شىمكەنتتىك تەمىرجولشى جاستاردىڭ باستاماسىمەن ءبىر جىل ىشىندە بۇكىل رەسپۋبليكا بويىنشا تانك لەگىن قۇرۋعا جەتەتىن اقشالاي قاراجات جينالىپ, 1942 جىلعى 15 قىركۇيەكتە «قازاقستان كومسومولى» دەگەن جازۋى بار 46 «ت-34» تانكى, مايدان دالاسىنا جىبەرىلدى. بۇل جاۋىنگەرلىك ماشينالار ەكىنشى دۇنيەجۇزىلىك سوعىستىڭ شەشۋشى شايقاستارىنا قاتىستى. كەيبىر كۋاگەرلەردىڭ ەستەلىگى بەرلين تۇبىندەگى ۇرىستارعا دا ەلىمىزدە جاسالعان بىرنەشە تانكتىڭ قاتىسقانىن راستايدى.
