بايقاۋىمىزشا, قازىر بالالار ادەبيەتى اقساپ تۇرعانعا ۇقسايدى. بالالارعا ارنالعان, ولاردى قىزىقتىراتىن شىعارما كوپ ەمەس. بۇل بۇگىن عانا ايتىلعان ءسوز ەمەس. بۇرىنعىنى بىلاي قويعاندا, كەيىنگى وتىز جىل مۇعدارىندا دەربەس ەلدىڭ ءتىلى مەن مۇراتىن اڭعارتاتىن بالالار ادەبيەتى قالىپتاسىپ كەلە مە, جوق پا دەگەن سۇراق بار. وسى ولقىلىقتىڭ ورنىن تولتىرۋ ۇلتتىق مۇرات دەسە بولعانداي. ويتكەنى وقىرمان ۇلت قالىپتاستىرۋ مەكتەپتەن باستالاتىنى بەلگىلى.
بۇعان دەيىن بىرنەشە جىر جيناعى جارىق كورگەن اۆتوردىڭ مىنا ەڭبەگى وسى تۇرعىدان العاندا, ايتارلىق دۇنيە. «تاۋەلسىزدىك شۋاعى», «قۇرمەت جىرلارى», «ەڭ جاقسى كۇن», «بالاباقشا جىرلارى», «تابيعات تىلسىم الەم», «جاقسى مەن جامان», «شىنىقساڭ شىمىر بولاسىڭ», «ەرتەگىلەر مەن اڭىزدار» اتتى سەگىز بولىمنەن تۇرادى جيناق. ساناسى ەندى-ەندى قالىپتاسىپ كەلە جاتقان جاس ۇرپاقتىڭ تۇسىنۋىنە جەڭىل, ۇعىنىقتى تىلمەن جازىلعان تاقپاقتار بارشىلىق سەكىلدى. بالالارعا ارنالعان شۋماقتار «قۇرمەت جىرلارى», «مەرەكەلىك جىرلار» بولىپ تاقىرىپتىق تۇرعىدا شوعىرلانعانى دا نازار اۋدارتادى. اتاۋلى كۇن, الدەقانداي مەرەكە قارساڭىندا كەيدە وڭدى تاقپاق تاپپاي قالاتىنىمىز بار عوي. سونىمەن قاتار اۆتوردىڭ جاس ۇرپاق ءۇشىن وتىرىپ ەڭبەكتەنگەنى كورىنەدى. بالا ساناسىنا ازاتتىق, وتان تۋرالى ۇعىمداردى ءسىڭىرىپ ءوسىرۋ – بارلىعىمىزدىڭ بورىشىمىز.
