ءوزىمىز ورتەپ تاستايتىن قامىس وزگە ەلدە قادىرلى دەپ كىم ويلاعان؟ قامىستىڭ قادىرىن ءبىلىپ وتىرعان قىتاي ەلى قازىرگى تاڭدا وسى قامىسپەن تالاي ەلدى قامتاماسىز ەتىپ, سودان قىرۋار پايدا تاۋىپ وتىرعان الەمدەگى بىردەن-ءبىر مەملەكەت. كەشەگى پاندەميادا سىرتپەن بايلانىس توقتاپ, كۇللى ەۋروپا توقتاۋسىز جەتىپ تۇرعان قىتاي قامىسىن تاپپاي, جان-جاققا سۇراۋ سالا باستاپتى. وسى ساتتە قازالى قامىسى الەم نارىعىنا شىعا كەلدى.
قازالى قامىسىن شەتەلگە شىعارعان ۆەنەرا تايلاقباەۆاعا ەڭ اۋەلى اعىلشىن ءتىلىن جەتىك بىلەتىنى پايداسىن تيگىزىپتى.
«ينتەرنەتتى شارلاپ وتىرىپ وسىنداي ءبىر ەرەكشە سۇرانىسقا كوزىم ءتۇستى. سوسىن تاۋاردىڭ ءار ەلدەگى باعاسىنا تالداۋ جاسادىق. وسىلايشا, العاشقى ءونىمدى گەرمانياعا ساراپتاماعا جىبەردىك. نەمىستەردە سىناقتان وتپەگەن تاۋار ۋتيليزاتسياعا جىبەرىلەدى ەكەن. قامىس تاسىعان كولىكتى جالداۋ مەن جاراماعان جاعدايدا قامىستى جويۋدى قوسقانداعى شىعىنىمىز 5 ملن تەڭگەنىڭ ۇستىنە شىقتى. نار تاۋەكەلمەن باستاعان تىرلىگىمىز وڭعا باسىپ, نەمىستەر ءبىزدىڭ قامىستىڭ ساپاسى وتە جوعارى ەكەنىن حابارلاعاندا ارقامىزدان اۋىر جۇك تۇسكەندەي بولدى. وسىدان كەيىن گەرمانيامەن قاتار, نيدەرلاند, دانيا, فرانتسيا, پولشا, بەلارۋس مەملەكەتتەرىنە ءونىم جونەلتە باستادىق», دەيدى ۆەنەرا.
تاعى ايتا كەتەتىن جايت قازالىنىڭ قامىسى كوپ ەلدە ءۇي شاتىرىن جابۋعا جۇمسالادى ەكەن. قالاۋىن تاپسا, ودان بيووتىن وندىرۋگە دە بولادى. شاعىن اۋىلعا جىلۋ مەن جارىق بەرەتىن قازاندىق جاساۋدىڭ دا جولى بار ەكەن.
قامىستى كادەگە جاراتىپ جاتقاندار قاتارىنا تۇركيا, رۋمىنيا, رەسەي مەن ۋكراينا بار. سوڭعى ەكەۋىندە قازىرگى جاعدايعا بايلانىستى ءوندىرىس ۋاقىتشا توقتاپ تۇر. ال سىر قامىسى ساۋداعا شىققالى بەرى باسقا مەملەكەتتەردىڭ ونىمدەرىنە سۇرانىس ازايىپتى.
«ازيا قامىس» سەرىكتەستىگىن قۇرىپ, وڭىردە جوق تىڭ كاسىپتى باستاعان كەيىپكەرىمىزدىڭ ارقاسۇيەرى ازاماتى – رايىسبەك اياپبەرگەنوۆ. ەرلى-زايىپتى ەكەۋ بۇرىن تەمىرجول سالاسىندا ەڭبەك ەتكەن. بار تەحنيكانىڭ ءتىلىن بىلەتىن ۆەنەرانىڭ كوكسەگەنى تەپلوۆوز ماشينيستىگى ەدى. جۇك كاسسيرى بولىپ 14 جىل جۇمىس ىستەگەن كەلىنشەكتىڭ كاسىبى ءبىر كۇندە وزگەرىپ شىعا كەلدى. قازىر رايىسبەك قامىس شابۋ, جيناۋ سەكىلدى شارۋامەن اينالىسسا, ۆەنەرا شەتەلدىكتەرمەن بايلانىس ورناتىپ, ءونىمدى جەتكىزۋ جاعىن قولعا العان. تىنىمسىز ىزدەنىستىڭ ارقاسىندا وبلىستاعى جالاعاش اۋدانى مەن بالقاش, استانا مەن اتىراۋ وڭىرلەرىنەن سەرىكتەستەر تاپتى.
ۆەنەرا وسى كاسىپتەن جىلىنا 1-2 ملرد تەڭگە تابىس تابۋعا بولاتىنىن ايتادى. بىراق ول ءۇشىن جەر كەرەك. سەرىكتەستىك ورنالاسقان كاۋكەي اۋىلىنىڭ اۋماعىنان جەر الىپ, كاسىبىن كەڭەيتكىسى كەلەدى. قىزىلدىڭ قۇمىنا قاراي قۋاڭداريا ارقىلى كۇرىشتىڭ قاشىرتقى سۋى جينالاتىن اۋماقتان جەر سۇراپ, بيزنەس-جوسپارىن دا ۇسىنىپ قويدى. الداعى جوسپارىندا قامىستان كومىر شىعارۋ بار. شاتىردان بولەك, قامىستان نەمىس تەحنولوگياسىمەن جيھاز جاسايتىن ماتەريال شىعارعىسى كەلەدى.
