پرەزيدەنت «Mastercard» كومپانياسىنىڭ تمد-داعى, ورتالىق جانە شىعىس ەۋروپاداعى كونسالتينگتىك باعىتتى دامىتۋ ءۇشىن الماتى قالاسىن وڭىرلىك حاب رەتىندە تاڭداۋ شەشىمىن قولدادى. يننوۆاتسيالىق تولەم تەحنولوگياسى سالاسىنداعى جاھاندىق كوشباسشىلاردىڭ ءبىرى سانالاتىن كومپانيا بۇكىل ورتالىق ازيا ايماعى ءۇشىن بانك سەكتورىنداعى بيزنەس پەن ادامي كاپيتالدى دامىتۋدى جوسپارلاپ وتىر.
نيكولا ۆيللانىڭ ايتۋىنشا, قازاقستاننىڭ تسيفرلاندىرۋ, ەلەكتروندى ۇكىمەتتى جانە قولما-قول تولەمسىز ەكونوميكانى دامىتۋ تاجىريبەسىنە «Mastercard» فيليالدارى جۇمىس ىستەيتىن باسقا ەلدەر ەرەكشە قىزىعۋشىلىق تانىتىپ وتىر. بۇدان بولەك, پرەزيدەنتكە «Mastercard» كومپانياسىنىڭ ينكليۋزيۆتى ءوسىم قورى قازاقستاندا Strive باعدارلاماسىن ىسكە قوساتىنى جونىندە مالىمەت بەرىلدى. اتالعان باعدارلاما ەلىمىزدە بيزنەستى تسيفرلاندىرۋعا, 300 مىڭنان اسا شاعىن جانە ورتا بيزنەستىڭ بىلىكتىلىگىن ارتتىرۋعا كومەك كورسەتەدى.
تسيفرلىق دامۋ ءمينيسترى باعدات ءمۋسيننىڭ ايتۋىنشا, «Mastercard» حالىقارالىق تولەم جۇيەسىمەن جاسالعان ىنتىماقتاستىق تۋرالى كەلىسىم – وتانداستار ءۇشىن ماڭىزدى وقيعا.
«ونىڭ سەبەبىن تۇسىندىرەيىن. «Mastercard» سىندى حالىقارالىق كومپانيالارمەن ىنتىماقتاستىق ورناتۋ بىزگە ينۆەستيتسيالار تارتۋعا, بىلىكتى ماماندار دايارلاۋعا, ىشكى جالپى ءونىمدى ۇلعايتۋعا جانە تۇراقتى ەكونوميكالىق وسىمگە قول جەتكىزۋگە مۇمكىندىك بەرەدى», دەيدى مينيستر.
ءمينيستردىڭ سوزىنشە, ەكىجاقتى ىنتىماقتاستىقتىڭ ارقاسىندا GovTech قازاقستاندىق مودەلى ىلگەرىلەپ, ءتۇرلى سالاداعى تولەمدەردى تسيفرلاندىرۋ ەسەبىنەن قارجىلىق قىزمەتتەرگە قولجەتىمدىلىك اياسى كەڭەيەدى. IT-ەكسپورتتى, ەلەكتروندىق كوممەرتسيانى, شوب-تى تسيفرلاندىرۋدى, فينتەح ەكوجۇيەسىن ىلگەرىلەتۋ جانە دامىتۋعا جول اشىلادى. ىرگەلى كەلىسىم «اقىلدى قالالار» باعدارلاماسىنا قولداۋ جاساپ, كيبەرقاۋىپسىزدىكتى قامتاماسىز ەتۋ جانە الاياقتىققا قارسى ءىس-قيمىلدى جۇرگىزۋ ارقىلى قاۋىپسىز جانە تۇراقتى تسيفرلىق ەكوجۇيەنى قۇرۋعا جاردەمدەسپەك.
«قازىرگى تاڭدا «Mastercard» بۇكىل الەم بويىنشا 210 ەلدە جانە اۋماقتاردا بار ەكەنىن اتاپ وتكىم كەلەدى, وندا ۇكىمەتتەرگە كوپتەگەن سەكتوردا پايدا اكەلەتىن ءوسۋ سالالارىنا باعىتتالعان 1 600-دەن اسا ءارتۇرلى ۇكىمەتتىك جوبانى جۇزەگە اسىرۋعا ارنالعان اۋقىمدى تەحنولوگيالىق پلاتفورما مەن تسيفرلىق اكتيۆتەردى پايدالانادى», دەيدى ب.مۋسين.
19 قىركۇيەك كۇنى الماتى قالاسى اكىمىنىڭ ورىنباسارى الىشەر ابدىقادىروۆ پەن شىعىس ەۋروپا ايماعى بويىنشا «Mastercard» بولىمشەسىنىڭ پرەزيدەنتى ياسەمين بەدير تسيفرلىق تەحنولوگيالار سالاسىنداعى جوبالاردى ىسكە اسىرۋ ماقساتىندا ءوزارا تۇسىنىستىك تۋرالى مەموراندۋمعا قول قويدى. تاراپتار ىنتىماقتاستىق ءۇشىن بىرقاتار باعىتتاردى, سونىڭ ىشىندە قولما-قول اقشاسىز تولەم جۇيەسىندە يننوۆاتسيالىق شەشىمدەردى ەنگىزۋدى ايقىندادى.
