بۇل كۇندە ادال ەڭبەگىنىڭ ارقاسىندا ارىپتەستەرىنىڭ قۇرمەتىنە بولەنگەن اسحات داحانوۆ ستەپنوگور مويىنتىرەك زاۋىتىنا سوناۋ 2007 جىلدىڭ قاراشا ايىندا جۇمىسقا ورنالاسقانىندا كوپ جايدىڭ رەتىن بىلە قويمايتىن. اۋەلى ستانوكتار مەن اۆتوماتتاندىرىلعان جەلىنىڭ رەتتەۋشىسى بولىپ ورنالاستى. «كوز قورقاق, قول باتىر» دەگەندەي, از عانا ۋاقىتتىڭ ىشىندە وزىنە بۇرىن بەيمالىم ءوندىرىستىڭ تىنىسىن ءبىر كىسىدەي ۇعىپ العانى. اسىلىندا, كەز كەلگەن تەحنيكانىڭ ءتىلىن مەڭگەرۋ ءۇشىن ءوزىن-ءوزى قامشىلاپ, العا ۇمتىلسا جەتىپ جاتىر. ىنتالى جاننىڭ تۇلا بويىنداعى جالىن اتقان قايرات-جىگەرى جول-جونەكەي كەزدەسكەن قيىندىقتى جەڭەتىنىنە بۇگىندە ءوزى كامىل سەنەدى. ارقيلى سىزبالاردىڭ سىرىن ۇعىپ, نەبىر كۇردەلى قۇرىلعىلاردىڭ قىر-سىرىن مەڭگەرۋ دە اناۋ ايتقانداي كوپ قيىندىق ەمەس ەدى. 2008 جىلدىڭ قازان ايىندا ەكىنشى رازريادتى قاپتاۋشى بولىپ اۋىستى. ارادا ەكى جىل وتكەن سوڭ مويىنتىرەكتەردى جينايتىن ۋچاسكەنىڭ سلەسارى بولىپ ەڭبەك ەتە باستادى. ءوز ءىسىن بارىنشا تياناقتى, تىڭعىلىقتى اتقاراتىن اسحات ءجۇرسىن ۇلىنىڭ العا ۇمتىلىسى, بىلمەككە قۇمارلىعى باسشىلاردىڭ كوزىنە تۇسپەي قالعان جوق. 2015 جىلى وسى كاسىپتەگى ەڭ جوعارى بولىپ سانالاتىن ءتورتىنشى رازريادقا يە بولدى.
كۇن سايىن قاربالاسقان جۇمىستان قولى قالت ەتكەندە تۋعان جەرى تۋرالى كوپ ويلاناتىن. پاۆلودار وبلىسىنىڭ ەرتىس اۋدانىندا تۋعانىمەن, قىزىلاعاش اۋىلىندا ەر جەتكەن. سىلەتى وزەنىنىڭ جاعاسىنداعى وسى ءبىر شوق جۇلدىزداي اۋىل بەينەسى كوكىرەگىن قىزدىرىپ, ساناسىنا قايتا-قايتا ورالا بەرەدى. ات جالىن تارتىپ مىنگەندە وتپەلى كەزەڭنىڭ وكپەك جەلى اۋىلداعى اعايىندى توڭدىرىپ-اق تۇر ەدى. اۋەلى مال باققان. ورمان-توعايدان ادا, كوز ۇشىندا سارى ساعىم كىلكىپ تۇراتىن سايىن دالا. بۇرىنعى ەكونوميكالىق بايلانىستار ءۇزىلىپ, كەڭشارلار تاراپ, قوعامدىق مالدى بارتەر دەگەن «تاجال» جۇتتى. ەندىگى ارادا ەل ىشىنەن ەكى قولعا ءبىر كۇرەك تابىلا قويمايتىن سىڭايلى. كەلەشەگى الدا جاس بولعاندىقتان, قيلى-قيلى ويدىڭ قاۋمالاپ كەلىپ, ءزىلماۋىر سالماعىمەن باسا بەرگەنى. اقىرى نار تاۋەكەلگە بەل بۋعان. ستەپنوگور قالاسىنداعى كاسىبي-تەحنيكالىق ۋچيليششەگە وقۋعا ءتۇستى. ەلەكترمەن دانەكەرلەۋشى ماماندىعىن يگەرمەك. ىشتەي ءوزى وسى قالاۋىن قۇپ كورگەن. قازاق بالاسىنىڭ ماڭدايىنا مال باعۋدى عانا جازىپ قويعان جوق شىعار. وزگە جۇرت تىنىم تاپپاي يگەرىپ, ۇشپاققا شىعىپ جاتقان ماماندىقتى مەڭگەرىپ, شىن شەبەرى اتانسا, قانەكەي! اسحات ءجۇرسىن ۇلى ادام كەز كەلگەن ماماندىقتى مەڭگەرگەننەن كەيىن ءوز سالاسىنىڭ شىنايى شەبەرى بولۋى كەرەك دەپ ەسەپتەيدى. سوندا ارتىڭنان تابىستىڭ ءوزى بۇيداسىنان جەتەكتەگەن تايلاقتاي بۇلعاقتاپ ەرىپ ءوزى كەلەدى. ايتالىق, ەل ىشىندە الدەكىمنىڭ جىلۋ جۇيەسىن دانەكەرلەپ, تارتىپ بەردىڭ ەكەن دەيىك. ەشبىر كەمىستىگى جوق, اتقان وقتاي ءتۇزۋ تۇسكەن جىلۋ جۇيەسىن كورگەن ادام ءۇي يەسىنەن مۇنى كىم ىستەدى دەپ تاقاقتاپ سۇراماي ما؟ توزىعى جەتكەن تەحنيكانى جوندەسەڭ دە, جۇمىس ناتيجەسىن كورگەن تراكتورشى قولىنان ءىس كەلەتىن شەبەر ەكەنىن قاپىسىز تانىپ, دەرەگىڭدى سۇراپ الارى انىق. دەمەك, قاتارداعى بىرەۋ ەمەس, وزا شاپقان شىن شەبەر بولۋىڭ كەرەك. ال شەبەرلىك –ماشىقپەن سەرىك.
شاڭىراق كوتەردى. ەندى وتباسىن ەشتەڭەدەن تارىقتىرماي, قامتاماسىز ەتۋى كەرەك. بۇل دا قوسىمشا جاۋاپكەرشىلىك جۇكتەگەن. ءارى ءبىر ورىندا توقىراپ قالۋ تابيعاتىنان جات. قايناعان ءوندىرىستىڭ ىشىندە جۇرگەننەن كەيىن تۇتاس جۇيەنى بىلگەن ءجون. وسىلايشا, از ۋاقىتتىڭ ىشىندە اسحات ءجۇرسىن ۇلىن زاۋىت جۇمىسشىلارى بەساسپاپ مامان رەتىندە تانىدى. ءبىلىمىن جەتىلدىرىپ, كاسىبي دەڭگەيىن وسىرۋگە مۇقيات دەن قوياتىن جاس مامان ءتارتىپ پەن جاۋاپكەرشىلىكتى دە جاس جانىنا سەرىك ەتكەن. ءوزى ۇيرەنىپ قانا قويماي, وكشەسىن باسىپ كەلە جاتقان جاستاردى دا ۇيرەتۋگە, بىلمەگەنىن ايتىپ جىبەرۋگە ىنتىق. وسىلايشا, جاڭا بۋىننىڭ كاسىبي دەڭگەيىنىڭ وسۋىنە ايانباي اتسالىسىپ كەلەدى.
شىنايى شەبەردىڭ شىن ىقىلاسىن كورگەن زاۋىت باسشىلارى دا ىنتالاندىرىپ وتىرۋدى ۇمىتقان ەمەس. 2016 جانە 2022 جىلدارى ادال ەڭبەگى ءۇشىن العىسقا يە بولدى. تسەحتىڭ ۇزدىك جۇمىسشىسى رەتىندە سۋرەتى قۇرمەت تاقتاسىنا ءىلىندى.
– اسحات ءجۇرسىن ۇلى – ءوز ءىسىنىڭ ناعىز بەساسپاپ مامانى. كىسىلىك كەلبەتى دە, ادامگەرشىلىك اجارى دا ماقتاۋعا لايىق, – دەيدى مويىنتىرەك جيناقتاۋ تسەحىنىڭ باسشىسى دميتري پروتاسەۆيچ.
ايتپاقشى, قۇرمەت تاقتاسى بۇگىندە كوزگە كوپ تۇسە بەرمەيدى. اسىلىندا, جالپاق جۇرتتى جۇمىسقا جۇمىلدىرۋدىڭ, ابىرويىن اسقاقتاتۋدىڭ ادەمى ءادىسى ەدى. الدىنان جۇمىس ۇركىپ تۇراتىن اسحات ءجۇرسىن ۇلىنىڭ قۇرمەت تاقتاسىنداعى بەينەسى ادام ەڭبەگىمەن ارداقتى ەكەندىگىن ۇقتىرىپ تۇرعانداي.
اقمولا وبلىسى,
ستەپنوگور قالاسى
