«اقش ورتالىق ازياعا قاتىستى ستراتەگياسىن دامىتۋ قاجەت» دەپ اتالاتىن باعاندا اۆتور «س5+1» فورماتى ماڭىزعا يە ەكەنىن, وڭىردەگى تاعدىرشەشتى كەزدەسۋگە اينالۋى مۇمكىن ەكەنىن جازادى.
«امەريكا قۇراما شتاتتارىنا ەۋرازيا قۇرلىعىنىڭ قاق ورتاسىنا ستراتەگيالىق كوزقاراس قاجەت. ايماقتا اق ءۇيدىڭ ىقپالى تاريحي تۇرعىدا رەسەي مەن قىتايعا قاراعاندا الدەقايدا تومەن. ماسكەۋ دە, بەيجىڭ دە قيىندىقتارعا تاپ كەلگەندە ۆاشينگتون ورتالىق ازيامەن ىنتىماقتاستىقتى بەرىك ورناتا الادى. ەڭ باستىسى – وڭىردەگى كوشباسشى قازاقستانمەن تىعىز ىنتىماقتاستىق بولماق», دەپ جازادى اۆتور.
ماقالادا 2021 جىلى بايدەن اكىمشىلىگى 2021 جىلعى ۇلتتىق قاۋىپسىزدىك جونىندەگى ۋاقىتشا ستراتەگيالىق نۇسقاۋلىعىندا ورتالىق ازيانى تىلگە تيەك ەتپەگەنى كەلتىرىلگەن. ال كەيىنگى كەزدە ۆاشينگتون تاراپىنىڭ وڭىرگە نازار اۋدارۋى – ىلگەرىلەۋدىڭ ناقتى ايعاعى.
«ورتالىق ازيا ەلدەرىنىڭ كوشباسشىلارى ماسكەۋ مەن بەيجىڭگە تۇراقتى تۇردە بارادى. بىراق رەسەيدىڭ الاپات سوعىستان السىرەۋى مەن قىتايدىڭ ەكونوميكالىق قۇلدىراۋى ۆاشينگتونعا ورتالىق ازيامەن تىعىز قارىم-قاتىناس ورناتۋعا, كوپتەن وقشاۋلانعان ايماقتى باتىسپەن جانە حالىقارالىق قاۋىمداستىقپەن ينتەگراتسيالاۋعا مۇمكىندىك بەرەدى», دەلىنگەن ماقالادا.
سونداي-اق ماقالادا قازاقستاننىڭ يادرولىق قارۋدى تاراتپاۋ, تەرروريزمگە قارسى ءىس-قيمىل, قاقتىعىستاردى رەتتەۋ جانە حالىقارالىق دامۋ سەكىلدى ماسەلەلەرگە باسىمدىق بەرەتىنى, وسىلايشا حالىقارالىق ويىنشى رەتىندە تانىلىپ كەلە جاتقانى اتاپ وتىلگەن. بىلتىر پرەزيدەنت قاسىم-جومارت توقاەۆ كوپۆەكتورلى سىرتقى ساياسات دوكتريناسىن قابىلدادى. وسىنداي قادام ارقىلى شارتاراپتىڭ ءىرى جاھاندىق ويىنشىلارمەن, سونىڭ ىشىندە رەسەي, قىتاي, اقش جانە ەۋروپالىق وداقپەن تىعىز قارىم-قاتىناستى دامىتۋعا ۇمتىلادى.
«رەسەي مەن قىتايعا جاقىن ورنالاسقاندىقتان, قازاقستان ۆاشينگتونعا ۋكرايناداعى داعدارىستى شەشۋگە جانە سوعىستان كەيىنگى كەزەڭدە ماسكەۋمەن قارىم-قاتىناستى جاقسارتۋعا, سونداي-اق بەيجىڭمەن باسەكەلەستىكتىڭ كۇشەيۋىنە توتەپ بەرۋگە كومەكتەسە الادى», دەيدى ماقالا اۆتورى.
بۇدان كەيىن استانانىڭ اراعايىندىق ءرولىن اتقارۋى ءۇشىن ۆاشينگتوننىڭ كورسەتەتىن كومەگى كەلتىرىلگەن. بىرىنشىدەن, ۆاشينگتون استانانىڭ سۋپەرپرەزيدەنتتىك باسقارۋ تۇرىنەن كۇشتى پارلامەنتى, جاڭا ساياسي پارتيالارعا اشىق جانە باق ەركىندىگى كەڭەيتىلگەن پرەزيدەنتتىك رەسپۋبليكاعا كوشۋ كەزىندەگى ساياسي رەفورمالارىنا قولداۋ كورسەتە الادى. قازاقستاننىڭ دەموكراتيالىق جولى ورتالىق ازيانىڭ قالعان ءتورت مەملەكەتى ءۇشىن ايماقتى ماسكەۋ, بەيجىڭ جانە كابۋلدىڭ ىقپالىنان وقشاۋلاۋدىڭ ۇلگىسىنە اينالماق.
ەكىنشىدەن, قازاقستان «ورتالىق ءدالىز» دەپ اتالاتىن ترانسكاسپي حالىقارالىق ترانزيتتىك ءدالىزى ارقىلى ايماق پەن جاھاندىق ەكونوميكا اراسىنداعى بايلانىستىرۋشى ءرولىن اتقارادى.
«بۇل كوپارنالى كولىك ارتەرياسى شىعىس پەن باتىستى قۇبىرلار, تەمىر جولدار, اۆتوموبيل جولدارى جانە تالشىقتى-وپتيكالىق كابەلدەر ارقىلى بايلانىستىرادى. ءدالىز ورتالىق ازيانىڭ ەكونوميكالىق دامۋىنا جانە حالىقارالىق ەنەرگەتيكالىق جانە باسقا دا ساۋدا اعىندارىنا ۇلەس قوسادى. اقش ينۆەستيتسيالار, ساۋدا, تەحنولوگيا جانە جاھاندىق كومەگى ارقىلى ءدالىزدى ءساتتى جۇزەگە اسىرۋعا ىقپال ەتۋگە كۇشى جەتەدى. جالپى العاندا, امەريكا قىتاي مەن رەسەيدەن الدا بولۋ ستراتەگياسىن ۇستانا وتىرىپ, ورتالىق ازياعا تاكتيكالىق كوزقاراسىن جەتىلدىرۋى كەرەك», دەيدى اۆتور.
ەستەرىڭىزگە سالا كەتەيىك, ماقالا اۆتورى كامران بۋحاري «New Lines» ستراتەگيا جانە ساياسات ينستيتۋتىنىڭ ەۋرازيالىق قاۋىپسىزدىك جانە وركەندەۋ ءبولىمىنىڭ اعا ديرەكتورى قىزمەتىن اتقارادى. سونداي-اق ول – وتتاۆا ۋنيۆەرسيتەتىنىڭ كاسىبي دامۋ ينستيتۋتىنىڭ ۇلتتىق قاۋىپسىزدىك جانە سىرتقى ساياسات جونىندەگى مامانى.
