حالىقارالىق سامميت – ساياساتكەرلەر, ساراپشىلار, ءدىن, بيزنەس, عىلىم جانە باق وكىلدەرى دەموگرافيا جانە وتباسى ينستيتۋتىنا اسەر ەتەتىن نەگىزگى ماسەلەلەردى تالقىلايتىن الاڭ. بيىل ءىس-شاراعا الەمنىڭ 60 مەملەكەتىنەن مارتەبەلى مەيماندار شاقىرىلعان. ەلىمىزدىڭ اتىنان ماجارستان تاراپىنىڭ شاقىرۋىمەن سامميت جۇمىسىنا مادەنيەت جانە اقپارات ءمينيسترى, ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا ارنايى قاتىستى. مينيستر ماجارستان, قاتار, تۇركيا, سەربيا, سلوۆەنيا, ماروككو, ەكۆادور جانە باسقا دا بىرقاتار ەلدىڭ وكىلدەرىمەن بىرگە مينيسترلەردىڭ ينتەراكتيۆتى پانەلدىك سەسسياسىندا ءسوز سويلەدى.
«جاس ۇرپاق وتباسىلىق ينستيتۋتى قۇندىلىقتارىن, سۇيىسپەنشىلىك پەن قامقورلىقتى سىڭىرەدى, سونىڭ ارقاسىندا جاستار بولاشاقتا شاڭىراق كوتەرۋ ءۇشىن وزدەرىن قاۋىپسىز ءارى مىقتى سەزىنە الادى», دەپ ايدا بالاەۆا مەملەكەتتىڭ تۇراقتى دامۋى ءۇشىن وتباسى ينستيتۋتىنىڭ ماڭىزدى ءرولىن اتاپ ءوتتى.
«قازاقستان – كوپەتنوستى مەملەكەت. ەلدە 100-دەن اسا ەتنوس پەن 18 ءدىني كونفەسسيا وكىلدەرى تۇرادى», دەگەن مينيستر ەلىمىزدىڭ بىرقاتار دەموگرافيالىق ەرەكشەلىگىنە دە توقتالدى. بۇعان قوسا وتانداستارىمىزدىڭ ورتاشا جاسىن دا اتاپ ءوتتى.
«قازاقستان – جاستاردىڭ ەلى, وتانداستارىمىزدىڭ ورتاشا جاسى – 32 جاس. جاستار حالىقتىڭ 30 پايىزىن قۇرايدى. دەموگرافتار ەلىمىزدەگى بىرقاتار تاۋەكەلدى اتاپ كورسەتىپ ءجۇر. دەسە دە ءبىز مەملەكەتتەگى جاستىقتىڭ كۇش-جىگەرىن ەلدىڭ دامۋ مۇمكىندىكتەرىنە اينالدىرۋ ءۇشىن قولدان كەلگەننىڭ ءبارىن جاسايمىز. بۇعان ەل پرەزيدەنتى قاسىم-جومارت توقاەۆ تا ەرەكشە ءمان بەرىپ وتىر», دەدى ا.بالاەۆا.
سونداي-اق ايدا بالاەۆا ەلىمىزدىڭ وتباسىلىق-دەموگرافيالىق ساياساتىن قالىپتاستىرۋدىڭ ينستيتۋتسيونالدىق نەگىزدەرىن, ونىڭ ىشىندە رەفورمالار مەن الەۋمەتتىك قولداۋ جۇيەسىن دامىتۋ تۋرالى جان-جاقتى ايتىپ بەردى. ءارى قاراي بالالاردى تاربيەلەۋ ۇدەرىسىنە ەلەۋلى اسەر ەتەتىن وزەكتى ماسەلەلەرگە توقتالىپ, ولاردى شەشۋ بويىنشا قابىلدانىپ جاتقان شارالاردى اتاپ ءوتتى. ءسوز اراسىندا ايدا بالاەۆا كەلەسى سامميتتە جاڭا مەديانىڭ قۇندىلىق باعدارلارىن قالىپتاستىرۋعا اسەرى جانە زاماناۋي سىن-قاتەرلەردىڭ الدىن الۋداعى وتباسىنىڭ ءرولىن ارتتىرۋ تاقىرىپتارىن تالقىلاۋدى ۇسىندى.
ساپار اياسىندا مادەنيەت جانە اقپارات ءمينيسترى ماجارستاننىڭ مادەنيەت جانە يننوۆاتسيالار ءمينيسترى يانوش چاكپەن جانە ازەربايجان ۇلتتىق جينالىسىنىڭ توراعاسى ساحيبا گافاروۆامەن كەزدەستى. ولار ەكىجاقتى مادەني ىنتىماقتاستىقتى ارتتىرۋ جايىن تالقىلادى. ءارى ەكى ەلدىڭ وتباسىلىق-دەموگرافيالىق جانە مادەني-گۋمانيتارلىق قاتىناستار سالاسىنداعى ءوزارا ءىس-قيمىلىن ارتتىرۋعا قىزىعۋشىلىعىن ءبىلدىردى.
