مەملەكەت باسشىسى 2025 جىلعا قاراي نەگىزگى كاپيتالعا سالىنعان ينۆەستيتسيالار دەڭگەيىن ءىجو-ءنىڭ 25 پايىزىنا دەيىن ارتتىرۋ مىندەتىن قويدى. بۇل جىل سايىن ءوسىم 10 پايىزدان جوعارى بولۋى كەرەك دەگەندى بىلدىرەدى.
«ارينە, باسقا ەلدەر دە قاراپ وتىرعان جوق, ولار دا العا قاراي ۇمتىلىپ, دامىپ كەلەدى. ءبىر سوزبەن ايتقاندا, جاھاندىق ەكونوميكا جانە حالىقارالىق ەڭبەك نارىعى تۇبەگەيلى وزگەرىپ جاتىر. تەحنولوگيالىق باسەكە قىزىپ تۇر. بارلىق جەردە رەسۋرستار ءۇشىن تالاس ءجۇرىپ جاتىر. كليماتتىڭ وزگەرۋى, ازىق-ت ۇلىك قاۋىپسىزدىگى جانە دەموگرافيالىق تۇرعىدان ورنىقتى دامۋ ەڭ وزەكتى ماسەلەگە اينالدى. ءبىر سوزبەن ايتقاندا, ادامزات تاريحىندا بۇرىن-سوڭدى بولماعان سىن-قاتەرلەر مەن تۇبەگەيلى وزگەرىستەر ءداۋىرى باستالدى», دەگەن ەدى پرەزيدەنت. وسى ماقساتتا وبلىس اكىمىنىڭ ورىنباسارى اسەت قاناعاتوۆ «El-Mor electric installation & Services (1986) Ltd» كومپانياسىنىڭ پرەزيدەنتى گەرشون گاي مىرزا باستاعان كومپانيا وكىلدەرىمەن ىرگەلى جوباعا قاتىستى ماسەلەلەردى تالقىلادى.
ءوڭىر اكىمى ءباسپاسوز قىزمەتىنىڭ مالىمەتىنشە, شەتەلدىك كومپانيا جەتىسۋ جەرىندە قۋاتى 500 مۆت بولاتىن كۇن ەلەكتر ستانساسىنىڭ قۇرىلىسى جوباسىن جۇزەگە اسىرۋعا نيەت بىلدىرگەن. الدىمەن ءوڭىردىڭ ينۆەستيتسيالىق مۇمكىندىكتەرىنە قىسقاشا توقتالىپ, جەتىسۋ ءوڭىرىنىڭ «جاسىل» ەنەرگيانى دامىتۋداعى الەۋەتىنىڭ مول ەكەنىن اتاپ وتكەن ءا.قاناعاتوۆ شەتەلدىك كومپانيانىڭ ۇسىنىپ وتىرعان ينۆەستيتسيالىق جوباسىنا جەرگىلىكتى اكىمدىك بارىنشا قولداۋ كورسەتەتىنىن ايتتى.
يزرايلدىك كومپانيا جاڭارتىلعان ەنەرگيا كوزدەرى سالاسىندا قۋاتى 500 مۆت بولاتىن «جەتىسۋ وبلىسى اۋماعىنداعى كۇن فوتوەلەكترلىك ەلەكتر ستانساسى كەشەنىنىڭ قۇرىلىسى» جوباسىن وتاندىق «Sunstar Energy» جشس-مەن بىرلەسىپ قولعا الۋعا ىنتا ءبىلدىرىپ وتىر. كومپانيانىڭ ينۆەستيتسيالار جونىندەگى ديرەكتورى داۆيد گولودتىڭ ايتۋىنشا, جوباعا شامامەن 400 ملن دوللار كولەمىندە ينۆەستيتسيا سالىنادى.
ءا.قاناعاتوۆتىڭ ايتۋىنشا, الداعى ۋاقىتتا قۇرىلىسقا قاجەتتى جەر ۋچاسكەسى ايقىندالادى. جانە جۇمىس توبى قۇرىلىپ, جوبانى ىسكە اسىرۋدىڭ ناقتى شارالارى مەن مەرزىمدەرى بەلگىلەنەدى.
كەزدەسۋ سوڭىندا وبلىس اكىمدىگى, «El-Mor electric installation & Services (1986) Ltd» كومپانياسى جانە «Sunstar Energy» جشس اراسىندا اتالعان جوبانى جۇزەگە اسىرۋ نيەتى تۋرالى ءۇش جاقتى مەموراندۋمعا قول قويىلدى.
جىل سوڭىنا دەيىن اۋىل شارۋاشىلىعى ءونىمىنىڭ كولەمى 2,8 پايىزعا ءوسىپ, 544 ملرد تەڭگەگە جەتەدى دەپ جوسپارلانعان. وسى سالانى بۇدان ءارى دامىتۋ ءۇشىن 2027 جىلعا دەيىن قۇنى 57,9 ملرد تەڭگە بولاتىن 53 ينۆەستيتسيالىق جوبانى ىسكە اسىرۋ كوزدەلىپ وتىر. 1,2 مىڭ جاڭا جۇمىس ورنى اشىلادى. ونىڭ ىشىندە ء«ىرى جوبالار» قاناتقاقتى جوباسى اياسىندا 44,8 ملرد تەڭگەگە 18 جوبا كوزدەلسە, بيىل 400 باسقا ارنالعان, 2 ملرد تەڭگەلىك تاۋارلى ءسۇت فەرماسى سالىنا باستايدى.
جالپى, وڭىردە بارلىق سالادا ينۆەستيتسيا تارتۋ جۇمىستارى جۇيەلى ءجۇرىپ جاتىر. 2026 جىلعا دەيىنگى ينۆەستيتسيالىق پورتفەلگە قۇنى 1,6 ترلن تەڭگە بولاتىن 7,1 مىڭ جۇمىس ورنى قۇرىلاتىن 146 جوبا قالىپتاستىرىلدى. وبلىس قۇرىلعاننان بەرى جالپى قۇنى 38 ملرد تەڭگەلىك 1 مىڭنان اسا جۇمىس ورنى بار 47 جوبا ىسكە اسىرىلدى. سونىڭ ىشىندە جىل باسىنان بەرى قۇنى 1,7 ملرد تەڭگەلىك 68 جۇمىس ورنى بار 8 جوبا قولعا الىندى.
جەتىسۋ وبلىسى
