ەر-ريادتاعى ءدۇبىرلى دودادا ەل نامىسىن ەرلەر جانە ايەلدەر قۇراماسىنان 12 سپورتشى قورعادى. ولاردىڭ قاتارىندا 2016 جىلعى ريو وليمپياداسىنىڭ قولا جۇلدەگەرى, 2016 جىلى تاشكەنتتە ۇيىمداستىرىلعان ازيا چەمپيوناتىنىڭ جەڭىمپازى, 2017 جىلى تايپەيدەگى دۇنيەجۇزىلىك ۋنيۆەرسيادانىڭ باس جۇلدە يەگەرى دەنيس ۋلانوۆ, جاستار اراسىنداعى الەم چەمپيونى, بىرقاتار ءدۇبىرلى دودادا جەڭىس تۇعىرىنا كوتەرىلگەن اقمولدا سايرامكەز, قازاقستان چەمپيونى, حالىقارالىق جارىستاردىڭ جۇلدەگەرى مەن بيىلعى ەل سپارتاكياداسىنىڭ جەڭىمپازى ەلامان سەيىتقازى, جاستار اراسىنداعى الەم چەمپيوناتىنىڭ كۇمىس جۇلدەگەرى نادەجدا لي سياقتى كوپتى كورگەن ءارى تاجىريبەلى سپورتشىلار بولسا دا, جانكۇيەرلەردى قۋانتا المادى.
الەم چەمپيوناتىنىڭ قورىتىندىسى بويىنشا جەرلەستەرىمىز اراسىندا ەڭ ۇزدىك ناتيجەگە ەلامان سەيىتقازى قول جەتكىزدى. 81 كيلوعا دەيىنگى سالماق دارەجەسىندە باق سىناعان وتانداسىمىز قوسسايىستا 345 (154+191) كيلونى ەڭسەرىپ, بەسىنشى ورىنعا تابان تىرەدى. بۇل سالماقتىڭ باس جۇلدەسى قوسسايىستا 356 كيلو زىلتەمىردى ەڭسەرگەن يتاليالىق وسكار رەيەسكە بۇيىرسا, كۇمىس پەن قولا جۇلدەنى يندونەزيالىق راحمات ەرۆين ابدۋللا (354 كگ) مەن وزبەكستاندىق مۋحاممادكودير تاشتەميروۆ (352 كگ) يەلەندى.
ەلامان سەيىتقازى بىلتىر بوگوتادا (كولۋمبيا) ۇيىمداستىرىلعان الەم چەمپيوناتىنا دا قاتىسىپ, سول جىلى 342 (156+186) كيلونى باعىندىرىپ, 8-ورىننان كورىنگەن ەدى. بيىل ول ءوز ناتيجەسىن ءۇش كيلوعا جاقسارتقان. دەگەنمەن جۇلقا كوتەرۋدە كورسەتكىشى ەكى كيلوعا تومەندەگەن بولسا, سەرپە كوتەرۋدە العا ىلگەرىلەۋ بايقالادى. بۇل جولى ول بىلتىرعىعا قاراعاندا باقانداي بەس كيلوعا كوپ كوتەرگەن. ال ءدال وسى سالماقتىڭ ۆ توبىندا ونەر كورسەتۋگە ءتيىس بولعان ريو وليمپياداسىنىڭ قولا جۇلدەگەرى دەنيس ۋلانوۆ جارىس جولىنا شىقپادى.
سونىمەن قاتار 89 كيلوعا دەيىنگى سالماقتا باق سىناعان سەرگەي پەتروۆيچ س توبىندا جارىس جولىنا شىعىپ, 358 (164+194) كيلومەن ءوز توبىندا كوش باستادى. دەگەنمەن جالپى ەسەپتە نەبارى 9-ورىندا قالىپ قويدى. سونداي-اق 67 كيلوداعى اقمولدا سايرامكەز 280 (120+160) كيلومەن 12-ءشى, ەڭ جەڭىل سالماقتاعى ەرناز الپىسوۆ 233 (106+127) ناتيجەمەن 13-ءشى, قىزدار اراسىندا 49 كيلودا باق سىناعان اينۇر ابدىقالىقوۆا 151 (68+83) كيلو زىلتەمىردى ەڭسەرىپ, 30-ورىنعا تابان تىرەدى. كەيىنگى ەكى-ءۇش وليمپيادا مەن الەم چەمپيوناتتارىنان جۇلدەسىز قايتپاعان تولاعايلارىمىزدىڭ سوڭعى جىلدارداعى ناتيجەسى تىم ناشارلاپ كەتتى. قايبىر جىلدارى قوس-قوستان جۇلدە الىپ, الەمدىك اۋىر اتلەتيكا سپورتىنىڭ دەرجاۆاسىنا اينالعان قازاقستان قۇراماسى دوپينگ داۋىنا بايلانىستى قازىر توقىراۋ كەزەڭىن باستان وتكەرىپ جاتىر. ەگەر جاعداي بۇلاي جالعاسا بەرەتىن بولسا, كەلەسى جىلعى پاريج وليمپياداسىندا جەرلەستەرىمىزدى كورمەۋىمىز دە مۇمكىن.
