مەديتسينالىق پويىزدىڭ باس دارىگەرى اينۇر يگەنباەۆانىڭ ايتۋىنشا, «سالاماتتى قازاقستان» پويىزى – شالعاي ەلدى مەكەندەردەگى تۇرعىندارعا كومەك كورسەتەتىن ارنايى جوبا. قۇرامىندا 8 ۆاگونى بار. 4 ۆاگون مەديتسينالىق قۇرال-جابدىقتارمەن قامتىلعان. ەلىمىزدىڭ شالعاي ستانسالارىندا تۇراتىن 92 049 ادام جۇگىنگەن. ونىڭ ىشىندە 45 710 ادام مەديتسينالىق تەكسەرۋدەن وتكەن. كومەك الۋشىلاردىڭ 10 520-سى – بالالار. دارىگەرلەر بەس ايدا پويىزدا 5 377 رەت شاعىن حيرۋرگيالىق وپەراتسيا جاساعان. ال پسيحولوگيالىق جانە قۇقىقتىق كەڭەس الۋشىلاردىڭ سانى 5 572 ادامدى قۇراپ وتىر.
بۇل پويىز اتىراۋ وبلىسىنا 2 قىركۇيەكتە كەلدى. مۇندا 8 ەلدى مەكەنگە ايالدايتىنى كوزدەلگەن. الدىمەن جىلىوي اۋدانىنداعى تولتىر, كەيىن قۇرمانعازى اۋدانىندا ورنالاسقان اقكول ستانساسىنا توقتادى. ال يساتاي اۋدانىنداعى يساتاي ستانساسى – ءۇشىنشى بەكەت. مۇندا 5-7 قىركۇيەكتە تۇرعىندارعا تەگىن مەديتسينالىق كومەك, پسيحولوگيالىق, قۇقىقتىق جانە مەدياتيۆتىك كەڭەس بەرىلدى. اۋىل تۇرعىندارى تەراپەۆت, ستوماتولوگ, وفتالمولوگ, لور, حيرۋرگ, ۋرولوگ, نەۆروپاتولوگ, گينەكولوگ سەكىلدى بىلىكتى دارىگەرلەردىڭ كەڭەسىن الىپ, تەگىن تەكسەرۋگە جۇگىنگەن.
«باستى ماقساتىمىز – تۇرعىندارعا تەگىن قىزمەت كورسەتۋ. مەديتسينالىق پويىزدا بيوحيميالىق تالداۋ, فليۋروگرافيا, ىشكى اعزالار مەن تامىرلاردىڭ ۋدز, ەلەكترلى كارديوگرامما جانە دياگنوستيكالىق زەرتتەۋلەردىڭ باسقا دا تۇرلەرىن جۇرگىزۋگە مۇمكىندىك قاراستىرىلعان. ءبىزدىڭ قۇرامداعى تاجىريبەلى ماماندار تۇرعىنداردىڭ كەز كەلگەن ساۋالىنا كاسىبي تۇرعىدان تولىق كەڭەس بەردى. دارىگەرلەر تەكسەرۋىنەن وتكەن تۇرعىندارعا قورىتىندىسى سول ساتتە قولىنا بەرىلەدى», دەيدى ا.يگينباەۆا.
جىلجىمالى مەديتسينانىڭ دارىگەرىنە جۇگىنگەندەردىڭ قاتارىندا ءالىپ قايتاقپاەۆ تا بار. يساتاي ستانساسىندا تۇراتىن ول دارىگەرلەرگە ايەلىمەن بىرگە كەلگەن.
ء«بىز شالعاي اۋىلدا تۇرامىز. قالاداعى دارىگەرلەرگە بارۋ ءۇشىن جولكىرەسىنە قارجى قاجەت. بىراق دەنساۋلىقتى ويلاپ, الاڭداپ جۇرەمىز. مىنە, «سالاماتتى قازاقستان» مەديتسينالىق پويىزىنىڭ شالعاي اۋىلعا كەلىپ, ايەلىم ەكەۋمىز دارىگەرلەردىڭ كەڭەسىن الدىق. بۇل – ءبىز ءۇشىن ۇلكەن قولداۋ», دەيدى ءا.قايتاقپاەۆ.
اققىستاۋ اۋىلى – «سالاماتتى قازاقستان» مەديتسينالىق پويىزى توقتاعان بەسىنشى بەكەت. يساتاي اۋدانىنىڭ ورتالىعى اققىستاۋ اۋىلدىق وكرۋگىنىڭ اكىمى عادىل بورانباەۆتىڭ ايتۋىنشا, مۇندا 10 648 ادام تۇرادى. اۋدان تۇرعىندارىنا ءبىر اي بۇرىن مەديتسينالىق پويىزدىڭ كەلەتىنى حابارلانعان.
تۇرعىندار تەراپەۆت, ستوماتولوگ, وفتالمولوگ, لور, حيرۋرگ, ۋرولوگ, نەۆروپاتولوگ, اكۋشەر-گينەكولوگ سەكىلدى دارىگەرلەردىڭ كەڭەسىن الىپ, تەگىن تەكسەرۋدەن ءوتتى. وسىنىڭ وزىنەن تۇرعىنداردىڭ دەنساۋلىعىن كۇتۋگە جاۋاپكەرشىلىگىنىڭ ارتقانى بايقالادى.
ء«بىزدىڭ دارىگەرلەر سىرقاتى بار جانداردى ەش كەدەرگىسىز قابىلدايدى. اۋىل تۇرعىندارى ستوماتولوگتىڭ كومەگىنە كوبىرەك جۇگىندى. نەۆروپوتولوگ پەن حيرۋرگتىڭ قابىلداۋىنا, ۋدز-گە تۇسۋگە كەلگەن تۇرعىندار كوپ», دەپ مالىمدەدى ا.يگەنباەۆا.
ماسەلەن, كۇلايىم ابدىرەنوۆا اققىستاۋ اۋىلىندا كوپتەن تۇرادى. ونىڭ اۋىلىنان اتىراۋ قالاسىنا بارۋى ءۇشىن جارتى كۇن قاجەت.
«قالاعا جەتكەن سوڭ ەمحانا بارىپ, كەزەككە تۇرۋ كەرەك. ءبىر كۇندە شارۋا بىتە قويسا, جاقسى عوي. كەيدە ەكى-ءۇش كۇنگە كىدىرۋگە تۋرا كەلەدى. كوپتەن اۋىراتىن ءتىسىم بار ەدى. سونى جۇلدىرىپ شىقتىم. دارىگەرلەر مەيىرىمدى, قولى جەڭىل ەكەن. وبلىس ورتالىعىنان الىستاعى اۋىل تۇرعىندارى ءۇشىن وسىنداي دارىگەرلەر جيىرەك كەلگەنىن قالايمىز», دەدى ول.
اتىراۋ وبلىسى
