فوتو: سەناتتىڭ ءباسپاسوز قىزمەتى
كۇن تارتىبىنە سايكەس وتىرىس بارىسىندا «2007 جىلعى 6 قازانداعى ۇجىمدىق قاۋىپسىزدىك تۋرالى شارت ۇيىمىنىڭ بىتىمگەرشىلىك قىزمەتى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى», «ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ اۋماعىندا ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارى قۇرالىمدارىنىڭ ۋاقىتشا بولۋىنا بايلانىستى ىستەر بويىنشا يۋريسديكتسيا جانە قۇقىقتىق كومەك كورسەتۋ ماسەلەلەرى جونىندەگى كەلىسىمدى راتيفيكاتسيالاۋ تۋرالى» جانە «ۇجىمدىق قاۋىپسىزدىك تۋرالى شارت ۇيىمىنىڭ اسكەرلەرىن (ۇجىمدىق كۇشتەرىن) بىرلەسكەن ماتەريالدىق-تەحنيكالىق جانە مەديتسينالىق قامتاماسىز ەتۋ تۋرالى كەلىسىمدى راتيفيكاتسيالاۋ تۋرالى» زاڭدار قارالدى.
اتالعان زاڭداردىڭ بىرىندە «ۇيلەستىرۋشى مەملەكەتتىڭ» بولۋىن كوزدەيتىن نورما بار. بۇل ۇقشۇ-نىڭ بىتىمگەرشىلىك كونتينگەنتىنىڭ بۇۇ اياسىنداعى بىتىمگەرشىلىك وپەراتسيالارعا قاتىسۋى ءۇشىن قوياتىن بىرىككەن ۇلتتار ۇيىمىنىڭ تالابى ەكەنىن اتاپ وتكەن ءجون. مۇنداي مەملەكەت لوگيستيكا, كونتينگەنتتى تاسىمالداۋ جانە قارجى ماسەلەلەرى بويىنشا بۇۇ-مەن ءوزارا ءىس-قيمىل جاساۋ ءۇشىن ايقىندالادى. ءوز كەزەگىندە, ۇقشۇ-عا مۇشە ءار مەملەكەت بىتىمگەرشىلىك وپەراتسيالارعا قاتىسۋ دارەجەسى تۋرالى شەشىمدى دەربەس جانە ەرىكتى تۇردە قابىلدايدى.
«قارالعان زاڭدار ۇجىمدىق قاۋىپسىزدىك تۋرالى شارت ۇيىمىنىڭ قىزمەتىنە قاتىستى جەكەلەگەن ماسەلەلەردى رەتتەۋگە باعىتتالعان. اتاپ ايتقاندا, ۇيىمنىڭ بىتىمگەرشىلىك الەۋەتىن بىرىككەن ۇلتتار ۇيىمى شەڭبەرىندە قولدانۋ مۇمكىندىگى قاراستىرىلدى. سونىمەن قاتار زاڭدار اياسىندا مۇشە-مەملەكەتتەردىڭ قۇقىقتىق كومەك كورسەتۋ, ماتەريالدىق-تەحنيكالىق جانە مەديتسينالىق قامتاماسىز ەتۋ سالاسىنداعى ءوزارا ءىس-قيمىلدىڭ نەگىزدەرى مەن شارتتارى انىقتالادى. وسى زاڭدار ۇيىمنىڭ بەيبiتشىلىك پەن تۇراقتىلىقتى نىعايتۋ جولىنداعى ءىس-شارالارىنىڭ تيىمدىلىگىن ارتتىرۋعا ون ۇلەسىن قوسادى دەپ سەنەمىز», دەدى ماۋلەن اشىمباەۆ.
سونىمەن قاتار پالاتا وتىرىسىندا سەناتورلار دەپۋتاتتىق ساۋالدارىن جولدادى.
عاۋەز نۇرمۇحامبەتوۆ قوستاناي وبلىسىندا ەگىن جيناۋ ناۋقانىنا بايلانىستى پروبلەمالار تۋىنداپ وتىرعانىن ايتىپ, ەگىندى ساقتاۋعا قاتىستى بىرقاتار شارا ۇسىندى.
سۇلتانبەك ماكەجانوۆ ۇكىمەتتى رەسپۋبليكالىق بيۋدجەتتەن قوسىلعان قۇن سالىعىن قايتارۋ مۇمكىندىگىن قاراستىرۋعا شاقىردى. سەناتوردىڭ ايتۋىنشا, بۇل جەرگىلىكتى بيۋدجەتكە قوسىلعان قۇن سالىعىنان تۇسەتىن تاۋەكەلدەردى ازايتۋعا مۇمكىندىك بەرەدى.
بەكبول ورىنباساروۆ ماڭعىشلاق تۇبەگىندە ورنالاسقان تورىش القابىن ەرەكشە قورعالاتىن اۋماق دەپ تانۋ جانە ونى ماڭعىستاۋ وبلىسىنىڭ تۋريستىك مارشرۋتىنا ەنگىزۋ قاجەتتىگىن ايتتى.
ەۆگەني بولگەرت ەلىمىزدەگى جەكە مەديتسينالىق مەكەمەلەرگە قاتىستى قاتاڭ شارالار قابىلداۋعا اكەلىپ سوعاتىن تاۋەكەلدەردى اتاپ ءوتتى. وسىعان وراي سەناتور دەنساۋلىق ساقتاۋ مينيسترلىگىنە تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە العاشقى مەديتسينالىق-سانيتاريالىق كومەك قىزمەتتەرىن ساتىپ الۋ جانە ورنالاستىرۋ راسىمىنە جىبەرۋ ءۇشىن كەم دەگەندە 10 مىڭ ادامدى بەلگىلەۋ جونىندەگى نورمانى الىپ تاستاۋدى ۇسىندى.
سۇلتان دۇيسەمبينوۆ ۇلتتىق تۋريزم سالاسىنداعى پروبلەمالارعا نازار اۋدارىپ, تۋريستىك الەۋەتتى دۇرىس پايدالانۋ ءۇشىن جاڭا مەملەكەتتىك باعدارلاما قاجەت ەكەنىن تىلگە تيەك ەتتى.
رۋسلان رۇستەموۆ ارالدىڭ كەبۋىن جانە قىزىلوردا وبلىسىنداعى سۋ تاپشىلىعى پروبلەماسىن كوتەرە وتىرىپ, قاراوزەك وزەنىنىڭ ارناسىندا سالىنۋعا ءتيىس سۋ قويماسىنا سۋ جيناقتاۋدىڭ ماڭىزدى ەكەنىن ايتتى.
قايرات تاستەكەەۆ قازاقستانداعى ەكرانداردا شەتەلدىك سەريالداردىڭ كورسەتىلۋىن شەكتەۋدى ۇسىندى. دەپۋتاتتىڭ ايتۋىنشا, مۇنداي قادام ۇلتتىق بىرەگەيلىكتى نىعايتۋعا جانە ءداستۇرلى قۇندىلىقتاردى ىلگەرىلەتۋگە وڭ اسەر ەتەتىن وتاندىق كينويندۋستريانىڭ دامۋىنا تىڭ سەرپىن بەرەدى.
اندرەي لۋكين قارا مەتالل سىنىقتارىن ەكسپورتتاۋ سالاسىنداعى زاڭدىلىق ماسەلەلەرىنە توقتالدى جانە سالاداعى جاعدايدى شەشۋ ءۇشىن بىرقاتار شارا ۇسىندى.
ءالي بەكتاەۆ اۋىل شارۋاشىلىعى ماقساتىنداعى جەرلەردى پايدالانۋ سالاسىنا قاتىستى پروبلەمالارعا نازار اۋداردى.
