فوتو: akorda.kz
«بۇل سالا, شىن مانىندە, ايماقتىڭ قارقىندى دامۋى ءۇشىن تىرەك باعىتى بولا الادى. ءبىز الەمدە جاڭا ەكونوميكالىق گەوگرافيانىڭ قالىپتاسىپ جاتقانىنا كۋا بولىپ وتىرمىز. قىتاي, ەۋروپا, رەسەي, تاياۋ شىعىس باعىتتارىنداعى ساۋدا-ساتتىق اۋقىمى ۇلعايادى دەگەن بولجام بار. ورتالىق ازيا سولتۇستىك پەن وڭتۇستىكتى, باتىس پەن شىعىستى بايلانىستىراتىن جاھاندىق جولداردىڭ تورابىندا ورنالاسقان. بۇل – ايماقتىڭ كەلەشەگىنە كەڭ جول اشاتىن ەلەۋلى ارتىقشىلىعىمىز. قازىرگى كەزەڭدە ترانسكاسپي حالىقارالىق كولىك باعدارى ەرەكشە ءرول اتقارادى», دەدى پرەزيدەنت ورتالىق ازيا مەملەكەتتەرى باسشىلارىنىڭ V كونسۋلتاتيۆتىك كەزدەسۋىندەگى بايانداماسىندا.
مەملەكەت باسشىسىنىڭ ايتۋىنشا, ورتا مەرزىمدى پەرسپەكتيۆادا اتالعان ءدالىز ارقىلى جۇك تاسىمالداۋ كولەمى بەس ەسە ۇلعايۋى مۇمكىن. وسى تۇستا قازاقستان تاراپى تسيفرلىق شەشىمدەر ەنگىزۋ جانە ينفراقۇرىلىمدى جاڭعىرتۋ ارقىلى ونىڭ وتكىزۋ قابىلەتىن جوسپارلى تۇردە ارتتىرۋعا نيەت ءبىلدىرىپ وتىر.
«بىزگە باۋىرلاس مەملەكەتتەرمەن بىرلەسىپ, ءوڭىر ىشىندەگى ساۋدا-ساتتىققا كەدەرگى كەلتىرەتىن «وسال تۇستاردى» رەتتەۋ ءۇشىن كولىك جانە لوگيستيكا ينفراقۇرىلىمىن دامىتۋ جۇمىسىن جالعاستىرۋ وتە ماڭىزدى. قازاقستان جاقىن سەرىكتەستەرىمەن ەكونوميكالىق بايلانىستاردى كەڭەيتۋگە ىقپال ەتەتىن بىرقاتار ءىرى جوبانى جەدەل جۇزەگە اسىرۋدى كوزدەيدى. بۇل جەردە «دوستىق – مويىنتى», «باقتى – اياگوز», «داربازا – ماقتاارال» تەمىرجول جوبالارى, سونداي-اق «جاڭاوزەن – تۇركىمەنستان شەكاراسى» اۆتوموبيل جولى تۋرالى ءسوز بولىپ وتىر. جالپى, قازاقستان ەۋرازيانىڭ ترانزيتتىك حابى رەتىندە ءوز ءرولىن كۇشەيتۋگە نيەتتى», دەپ قوستى قاسىم-جومارت توقاەۆ.
