قارجى ۆيتسە-ءمينيسترىنىڭ ايتۋىنشا, 2024 جىلعا تۇسىمدەر 20,4 ترلن تەڭگە دەڭگەيىندە بولجانىپ وتىر. اتالعان قاراجات الەۋمەتتىك ماڭىزدى جانە ستراتەگيالىق ينفراقۇرىلىمدىق جوبالاردى قارجىلاندىرۋعا باعىتتالاتىن بولادى.
– بۇل – اۆتوموبيل جولدارىن, جىلۋ, گاز جانە سۋمەن جابدىقتاۋ جەلىلەرىن, ينجەنەرلىك جەلىلەردى جاڭعىرتۋ, سونداي-اق «جايلى مەكتەپ», «اۋىلدا دەنساۋلىق ساقتاۋدى جاڭعىرتۋ» ۇلتتىق جوبالارى اياسىندا بىرقاتار الەۋمەتتىك نىسان سالۋ, – دەدى ا.بەيسەنبەك ۇلى.
بيۋدجەت شىعىستارى 2023 جىلمەن سالىستىرعاندا 1,5 ترلن تەڭگەگە ۇلعايىپ, شامامەن 24 ترلن تەڭگەنى قۇرايدى. ونىڭ 40 پايىزدان استامى الەۋمەتتىك سالاعا تيەسىلى. 2024 جىلعا الەۋمەتتىك تولەمدەرگە ارنالعان شىعىستار 5,3 ترلن تەڭگە, حالىقتىڭ تابىسىن ارتتىرۋ باعدارلاماسىن ىسكە اسىرۋ ءۇشىن 2024 جىلى 3,5 ترلن تەڭگە كوزدەلگەن.
وتىرىس بارىسىندا دەپۋتاتتار بىرقاتار وزەكتى ماسەلەنى كوتەرىپ, سۇراقتارىن قويدى.
* * *
ماجىلىستە قارجى جانە بيۋدجەت كوميتەتىنىڭ توراعاسى ءمادي تاكيەۆتىڭ جەتەكشىلىگىمەن «قازاقستان رەسپۋبليكاسىنىڭ ۇلتتىق قورىنان 2024-2026 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوباسى تانىستىرىلدى.
زاڭ جوباسى بويىنشا ۇلتتىق ەكونوميكا ۆيتسە-ءمينيسترى ازامات ءامرين بايانداما جاسادى. ول كەپىلدىك بەرىلگەن ترانسفەرت مولشەرى 2024 جىلى باررەلىنە 43,4 دوللار, ودان كەيىنگى جىلدارى باررەلىنە 40,2- 41,8 دوللاردى قۇرايتىن بيۋدجەتتىك ەرەجەلەرگە سايكەس كەسىمدى باعامەن انىقتالاتىنىن اتاپ ءوتتى.
– ۇلتتىق قوردان كەپىلدەندىرىلگەن ترانسفەرت جىل سايىن 2 ترلن تەنگە مولشەرىندە ايقىندالدى. سونداي-اق ۇلتتىق قور پارامەترلەرىندە 2024 جىلعى 1 قاڭتاردان باستاپ ىسكە اسىرىلاتىن «ۇلتتىق قور بالالارعا» جاڭا الەۋمەتتىك باعدارلاماسى بويىنشا بالالارعا تولەمدەر مىندەتتەمەلەرى ەسكەرىلدى, – دەدى ا.ءامرين.
ۇلتتىق قوردىڭ ۆاليۋتالىق اكتيۆتەرى 2024 جىلى 68 ملرد دوللار, 2025-2026 جىلدارى 80,7-93,3 ملرد دوللار دەڭگەيىندە بولجانىپ وتىر.
وسى زاڭ جوباسى بويىنشا جۇمىس توبىنا قارجى جانە بيۋدجەت كوميتەتىنىڭ مۇشەسى مارحابات جايىمبەتوۆ جەتەكشىلىك ەتەدى. وتىرىس بارىسىندا ايتىلعان ۇسىنىس-پىكىرلەر ودان ءارى تالقىلانىپ, قاراستىرىلادى.
