فورۋمدى مادەنيەت جانە اقپارات مينيسترلىگى جانە ىشكى ىستەر مينيسترلىگى ۇيىمداستىردى. وتىرىستا قولدانىستاعى زاڭناما شەڭبەرىندە ەاەو ەلدەرىندە مەدياتسيانى قولدانۋ, مەدياتسيا كەلىسىمدەرىن كۋالاندىرۋ جانە ولاردى ورىنداۋ بويىنشا حالىقارالىق تاجىريبە, وnline-مەدياتسيانى ترانسشەكارالىق داۋلاردى شەشۋدىڭ زاماناۋي ءتاسىلى رەتىندە قولدانۋدىڭ تاجىريبەلىك تۇستارى سىندى تاقىرىپتار قاۋزالدى.
سونداي-اق باسقوسۋدا مەدياتسيا كەلىسىمىن جاساسۋ بارىسىندا جەكە مالىمەتتەرمەن جۇمىس ىستەۋ تۋرالى دا ايتىلدى. ويتكەنى قازىر بۇل اسپەكت مەدياتسيا كەلىسىمىن بۇزۋ ءۇشىن ەڭ باستى سەبەپ بولىپ تۇر. وتىرىستا قازاقستاندىق دەلەگاتسيا اتىنان «حالىقارالىق كەلىسسوزدەر اكادەمياسى» قاۋىمداستىعىنىڭ توراعاسى سابىرجان قالمۇحامبەتوۆ ءسوز الدى.
– مادەنيەت جانە اقپارات مينيسترلىگىنىڭ تاپسىرىسى بويىنشا «ازاماتتىق باستامالاردى قولداۋ ورتالىعى» كەاق قولداۋىمەن رەسپۋبليكالىق گرانت شەڭبەرىندە ەلىمىزدىڭ 9 وبلىسىندا جالپى سانى 32 ايماقتىق كونفەرەنتسيا جانە نيدەرلاندى ەلىنىڭ جەتەكشى مەدياتورلارىنىڭ قاتىسۋىمەن حالىقارالىق دوڭگەلەك ۇستەل وتكىزدىك. سونىمەن قاتار «مەدياتسيا تۋرالى» زاڭدى ءتۇسىندىرۋ جۇمىستارى جۇرگىزىلۋدە, مەدياتسيانى قولدانۋداعى نەگىزگى ماسەلەلەردى انىقتاۋ جانە تاجىريبە الماسۋ جۇمىستارىن ۇيىمداستىرامىز, – دەدى ۇيىم توراعاسى.
القالى وتىرىستا كاسىبي مەدياتور, «حالىقارالىق كەلىسسوزدەر اكادەمياسى» قاۋىمداستىعىنىڭ ساراپشىسى ارسلان قارحانوۆ «قازاقستان رەسپۋبليكاسىندا مەدياتسيانى دامىتۋ پەرسپەكتيۆالارى, مەدياتسيانى ينستيتۋتتاندىرۋ, قازاقستان رەسپۋبليكاسى مەدياتورلارىنىڭ بىرىڭعاي ءتىزىلىمى» تاقىرىبى بويىنشا بايانداما جاسادى. ول ەلىمىزدەگى مەدياتورلار قىزمەتىنىڭ ماڭىزدى اسپەكتىلەرىن تىزبەكتەدى.
– جۇمىس پروتسەستەرىن قۇرۋ كەزىندە ءبىز كاسىبي مەدياتورلاردىڭ وزىق تاجىريبەسىنە سۇيەنگىمىز كەلەدى. ءارتۇرلى ەلدەردىڭ تاجىريبەلى ساراپشىلارىمەن تانىسۋ, تاجىريبە جانە ءبىلىم الماسۋ, سونداي-اق باسقا ەلدەردەگى مەدياتورلار قىزمەتىنىڭ ەرەكشەلىكتەرىمەن جانە ولاردىڭ مەدياتسيا سالاسىنداعى زاڭناماسىنىڭ اسپەكتىلەرىمەن تانىسۋ – مۇنىڭ ءبارى بولاشاقتا ءبىز ءۇشىن پايدالى اقپارات. مادەنيەت جانە اقپارات مينيسترلىگىنە ءارتۇرلى ەلدەردىڭ مەدياتورلارىمەن تانىسۋعا جانە ەلىمىزدەگى مەدياتسيا ينستيتۋتىنىڭ دامۋى تۋرالى ايتىپ بەرۋگە مۇمكىندىك بەرگەنى ءۇشىن العىسىمدى بىلدىرەمىن, – دەدى ساراپشى.
فورۋم بارىسىندا قازاقستان مەن رەسەيدەن كەلگەن ساراپشى-پراكتيكتەر, سونىمەن قاتار تۇركيا, كيپر, پەرۋ, ليۆان, برازيليا, كەنيا جانە ءۇندىستاننان شاقىرىلعان حالىقارالىق ساراپشىلار مەدياتسيانى دامىتۋدىڭ وزەكتى ماسەلەلەرىن, ونىڭ قۇقىق قورعاۋ ۇيىمدارىنىڭ جانە مەملەكەتتىك ورگانداردىڭ, بيزنەستىڭ قىزمەتىنە ودان ءارى ينتەگراتسيالانۋىنا ىقپال ەتەتىن ۇسىنىستاردى ورتاعا سالدى. وسىلايشا جاھاننىڭ بىلىكتى ماماندارىنىڭ باسىن قوسقان ءىس-شارا ءارتۇرلى تاسىلدەر مەن ادىستەمەلەردى قولداناتىن مەدياتورلاردىڭ پىكىر الماسۋ الاڭىنا اينالدى.
– قازاقستان مەدياتسيا ينستيتۋتىن دامىتۋ بويىنشا باسقا مەملەكەتتەردەن وزىپ كەتتى. اسىرەسە, اۋىرلىعى شاعىن جانە ورتاشا قىلمىستىق ىستەردى شەشۋ بارىسىندا مەدياتسيانى قولدانۋعا قاتىستى. بارلىق ەلدەر ولاردىڭ تاجىريبەلەرىن قابىلداپ, ولاردان ۇيرەنۋى كەرەك, ويتكەنى ارىپتەستەرىمىز قازاقستاندا مەدياتسيا ينستيتۋتىن بەلسەندى تۇردە دامىتىپ جاتىر, – دەدى حالىقارالىق زاڭگەر جانە حالىقارالىق دەڭگەيدەگى بىلىكتى مەدياتور كريستينا ارزۋمانوۆا.
جيىن سوڭىندا قازاقستان مەن رەسەي اراسىندا تاجىريبە الماسۋ جانە ديالوگ الاڭدارىندا كەزدەسۋ داستۇرگە اينالاتىنى ايتىلدى.
