– «استانا وپەرا» ەلوردامىزداعى جاس تەاترلاردىڭ ءبىرى بولعانىنا قاراماستان, ءوزىنىڭ باي دا مازمۇندى رەپەرتۋارىمەن قاشان دا كورەرمەنىنە زور قۋانىش سىيلاپ كەلەدى ون جىل بويى باس قالامىزدىڭ رۋحاني-ەستەتيكالىق كەمەلدەنۋىنە قىزمەت ەتىپ كەلە جاتقان ۇجىم ەلىمىز عانا ەمەس, الەم بويىنشا مويىندالعان, تاماشا تالانتىمەن تانىلعان تاڭعاجايىپ ونەر ورداسى دەپ بۇگىندە ماقتانىشپەن ايتا الامىز. تەاتر رەپەرتۋارى الەمدىك كلاسسيكالىق جاۋھارلارمەن عانا ەمەس, ۇلتتىق تۋىندىلارمەن دە ماۋسىم سايىن تولىعىپ, قازاق ونەرىنىڭ كوسەگەسىن كوگەرتۋگە بار كۇش-جىگەرىمىزدى ارناپ قىزمەت ەتۋ ۇستىندەمىز. بيىل دا وسى داستۇردەن تانبادىق. تەاترىمىزدىڭ جاڭا ماۋسىمىنىڭ شىمىلدىعى مۇحتار اۋەزوۆتىڭ ليبرەتتوسىنا جازىلعان ا.جۇبانوۆ پەن ل.ءحاميديدىڭ ايگىلى «اباي» وپەراسىمەن ءتۇرىلدى. تاماشا تۋىندى قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى الان بورىباەۆتىڭ بايان ەتۋىندە «استانا وپەرانىڭ» جاڭا ماۋسىمىنا جاڭاشا ورنەك سىيلاعانى ءسوزسىز. 70 جىلدان استام ۋاقىت بۇرىن قازاقستاندىق كلاسسيكالىق مۋزىكا دانىشپاندارىنىڭ قالامىنان شىققان باعالى تۋىندى ەلىمىزدىڭ جەتەكشى وپەرا تەاترىندا جاڭا تىنىسقا يە بولدى. «استانا وپەرانىڭ» باس ديريجەرى الان بورىباەۆ شەكسىز تالانتى مەن ۇلتتىق كلاسسيكاعا, اتاپ ايتقاندا, ءوزىنىڭ ناعاشى اتاسى ا.جۇبانوۆتىڭ شىعارمالارىنا دەگەن ەرەكشە قۇرمەتىنىڭ ارقاسىندا «اباي» وپەراسىن ەلىمىزدىڭ مۋزىكا ونەرىنىڭ بويتۇمارىنا اينالدىردى. 2018 جىلى وسى قويىلىم ءۇشىن تەاتر قازاقستان رەسپۋبليكاسىنىڭ مەملەكەتتىك سىيلىعىمەن ماراپاتتالدى. تاۋەلسىز قازاقستاننىڭ ءتول بەينەسىنە اينالعان سپەكتاكل الەمنىڭ كوپتەگەن ەلدەرىندە قويىلىپ, كورەرمەن قاۋىمنىڭ ىستىق ىقىلاسىنا بولەندى. اتاقتى «اباي» جاڭا ماۋسىمدا دا كورەرمەن كوزايىمىنا اينالادى دەپ سەنەمىز.
– ون جىل – تەاتر ءۇشىن ۇلكەن بەلەس. ايتۋلى بەلەستى ارتقا تاستاعان ۇجىمنىڭ جاڭا ماۋسىمدا كورەرمەنىنە ۇسىنار قانداي جاڭالىعى بار؟
– العاشقى جىلدارى ءبىز رەپەرتۋارىمىزدى كلاسسيكالىق قويىلىمدارمەن تولىقتىرۋعا بەلسەنە كۇش سالدىق, ويتكەنى «استانا وپەرا» – كلاسسيكالىق تەاتر. دەسەك تە ۇلتتىق رەپەرتۋاردى دا نازاردان تىس قالدىرمادىق. قازىر, كەرىسىنشە, رەپەرتۋاردى ۇلتتىق سپەكتاكلدەرمەن بايىتۋعا جۇمىس ىستەۋدەمىز. ءوزىڭىز دە كورىپ كوزايىم بولعانداي, تەاترىمىزدىڭ وتكەن مەرەيتويلىق ماۋسىمىن احمەت جۇبانوۆ پەن عازيزا جۇبانوۆانىڭ «قۇرمانعازى» وپەراسىمەن قورىتىندىلاساق, بيىلعى ماۋسىمنىڭ اشىلۋى دا قازاقستاندىق كومپوزيتورلاردىڭ تۋىندىلارىن تىرەك ەتتى. الداعى ماۋسىمداردا بۇل ءىس ءتىپتى ەسەلەنە تۇسپەك. ياعني جاڭا ماۋسىم دا ۇلتتىق رەپەرتۋارمەن جاندانادى. الايدا مىنانى ءتۇسىنۋ كەرەك: ءبىز قويىلىمداردى «قالىپقا» سالماي, قازاق مۋزىكا مادەنيەتىنىڭ التىن قورىنا ەنگەن ۇلتتىق تۋىندىلارعا وتە مۇقيات قارايمىز جانە ولاردى الەمدىك دەڭگەيدە باسقا تەاترلاردىڭ جۇمىسىن قايتالامايتىن بىرەگەي كوزقاراس تۇرعىسىنان قويامىز. ونىڭ ايقىن مىسالى – اڭگىمەمىزدىڭ باسىندا ءسوز ەتكەن «اباي» وپەراسى. جاڭا ماۋسىمدى ۇلتتىق كلاسسيكا تۋىندىسىمەن اشا وتىرىپ, «استانا وپەرا» تەاترى ەلىمىزدىڭ باي مادەني بايلىعىن ساقتاۋ مەن ارتتىرۋدىڭ, وتاندىق اۆتورلار مەن ورىنداۋشىلاردى تانىمال ەتۋدىڭ ماڭىزدىلىعىن باسا كورسەتتى دەپ ەسەپتەيمىن.
– عالىم العي ۇلى, استاناعا ەل وڭىرلەرىنەن ادامدار وتە كوپ كەلەدى, ولاردىڭ كەيبىرى تەاترعا درەسس-كود ساقتاپ قانا كىرۋگە بولادى جانە بيلەتتەردىڭ باعاسى اسا قىمبات دەگەن ويدا. وسى راس پا؟
– تەاتردىڭ باعا ساياساتى بارىنشا وڭتايلى دەسەك بولادى. سپەكتاكل بيلەتتەرى قىمبات ەمەس, جازعى دەمالىستان كەيىنگى كەزەڭدە. مىسالى, قىركۇيەك ايىندا ك.بايسەيىتوۆا اتىنداعى كامەرالىق زالداعى كونتسەرتتەرگە بيلەتتەر شامامەن 3 مىڭ تەڭگە تۇرادى, سونداي-اق تەاترىمىزدىڭ ۇلكەن زالىندا وتەتىن سپەكتاكلدەردىڭ باعالارى دا ابدەن قولجەتىمدى. درەسس-كودقا كەلەر بولساق, بۇل دا قاتە پىكىر. ءبىز تىلەك بىلدىرۋشىلەردىڭ ءبارىن قۋانا قارسى الامىز. ارينە, ەگەر ادامدار ادەمى كيىنىپ كەلسە, قۇپتايمىز, وسى ارقىلى ولار, ەڭ الدىمەن, وزدەرىنە مەرەكە سىيلايدى عوي. سوندىقتان دا تەاترىمىزدىڭ ەسىگى ونەردى ءسۇيىپ, باعالايتىن كەز كەلگەن كورەرمەنگە ايقارا اشىق!
– اڭگىمەڭىزگە راحمەت.
اڭگىمەلەسكەن –
نازەركە جۇماباي,
«Egemen Qazaqstan»
