كەزدەسۋدە تاراپتار ەكونوميكالىق ىنتىماقتاستىقتى ودان ءارى نىعايتۋ مەن تەرەڭدەتۋدىڭ پەرسپەكتيۆالىق باعىتتارىن, سونداي-اق قازاقستان رەسپۋبليكاسىندا جۇزەگە اسىرىلىپ جاتقان بىرلەسكەن ينۆەستيتسيالىق جوبالاردى تالقىلادى.
رومان سكليار قازاقستان ينۆەستيتسيالىق احۋالدى جاقسارتۋعا ەرەكشە كوڭىل بولەتىنىن اتاپ ءوتتى. ول گەرمانيانى قازاقستاننىڭ ەۋروپالىق وداقتاعى ەڭ ماڭىزدى سەرىكتەستەرىنىڭ ءبىرى دەپ اتاپ, ەنەرگەتيكا, ونەركاسىپ, كولىك جانە لوگيستيكا سياقتى باسىم سالالارداعى ىنتىماقتاستىقتى ودان ءارى تەرەڭدەتۋگە مۇددەلىلىك تانىتتى.
ءوز كەزەگىندە فولكەر ترايەر قازاقستان گەرمانيا ءۇشىن ورتالىق ازياداعى باستى سەرىكتەس ەكەنىن اتاپ ءوتتى. گەرمانيا ستاتيستيكاسىنا سايكەس, ەلدەر اراسىنداعى ساۋدا 2022 جىلى 90,2% ارتىپ, جالپى سوماسى 9,7 ملرد ەۋروعا جەتتى. قازاقستاننىڭ گەرمانياعا ەكسپورتى دا 86,5% ءوسىپ, 6,9 ملرد ەۋرونى قۇرادى.
فولكەر ترايەر ەلدەردىڭ ەكونوميكالىق ىنتىماقتاستىقتى كەڭەيتۋ جانە تەرەڭدەتۋ ءۇشىن ۇلكەن الەۋەتى بار ەكەنىن اتاپ ءوتتى.
سونداي-اق پرەمەر-ءمينيستردىڭ ءبىرىنشى ورىنباسارى «KAZAKH INVEST» ۇك» اق قولداۋىمەن گەرمانيا ەكونوميكاسىنىڭ ورتالىق ازياداعى وكىلدىگىمەن گەرمانيانىڭ ساۋدا-ونەركاسىپ پالاتاسى ۇيىمداستىرعان قازاقستان-گەرمانيا بيزنەس فورۋمىنا قاتىستى.
فورۋم اياسىندا ىسكەرلىك بايلانىستاردى ودان ءارى دامىتۋ مەن كەڭەيتۋ جانە ەكىجاقتى ساۋدانى ىلگەرىلەتۋ پەرسپەكتيۆالارى مەن مۇمكىندىكتەرى, سونداي-اق قازاقستان مەن گەرمانيا اراسىنداعى ناقتى بىرلەسكەن جوبالار تالقىلاندى.
فورۋمعا قازاقستانداعى مەملەكەتتىك ورگاندار مەن جەكە بيزنەس وكىلدەرى, سونداي-اق گەرمانيا ەكونوميكاسىنىڭ 40-تان استام جەتەكشى وكىلدەرى قاتىستى.
