«تاياۋدا اكتيۆتەردى قايتارۋ جونىندە زاڭ قابىلداندى. بۇل زاڭ اكتيۆتەردى قايتارۋ شارالارىن ءبىر ماقساتقا جۇمىلدىرۋعا باعىتتالعان, ياعني, مۇنى قوعامدىق كەلىسىم اكتىسى دەسە دە بولادى. تۇپتەپ كەلگەندە, بۇل شارا ەكونوميكامىزدى ساۋىقتىرىپ, الەۋمەتتىك جىككە بولىنۋشىلىك پەن ادامداردىڭ اراسىنداعى الشاقتىقتىڭ الدىن الۋعا ءتيىس. ادال بيزنەسكە, شەتەلدىك جانە وتاندىق ينۆەستورلارعا بۇدان قاۋىپتەنۋدىڭ ەش رەتى جوق. مەن جولداۋىمدا جوعارى دەڭگەيدە وڭدەلگەن ءونىم شىعاراتىن كلاستەر قۇرۋ كەرەك ەكەنىن ايتتىم. ەكونوميكامىزدىڭ كوشباسشىلارى يندۋستريالاندىرۋدىڭ قوزعاۋشى كۇشىنە اينالىپ, سوڭىنان ونەركاسىپپەن اينالىسۋشى كاسىپكەرلەردىڭ جاڭا تولقىنىن ىلەستىرە الادى», دەدى پرەزيدەنت.
سونداي-اق مەملەكەت باسشىسى مەتاللۋرگيا, حيميا, ماشينا جاساۋ جانە باسقا دا سالالاردا, كەم دەگەندە, 15 ءىرى جوبانى ىسكە اسىرۋ مىندەتىن جۇكتەگەن ەدى. پرەزيدەنتتىڭ ايتۋىنشا, بۇل مەملەكەتتىڭ دە, بيزنەستىڭ دە مىندەتى.
«بيۋدجەتتىڭ مۇمكىندىكتەرى شەكتەۋلى. بۇعان قوسا, مەملەكەت تاعايىنداعان مەنەدجەرلەر دە ءتيىستى دەڭگەيدە جۇمىس ىستەمەيدى. سوندىقتان ەلىمىزدىڭ الەۋەتتى ءىرى بيزنەس وكىلدەرىنە ۇندەۋ تاستاعىم كەلەدى. سىزدەردە قارجى دا, تاجىريبە دە جەتكىلىكتى, الەمدىك نارىقتارعا شىعاتىن بايلانىستار دا بار. سوندىقتان وسىنداي جوبالاردى جۇزەگە اسىرۋ ماسەلەسىن قاراستىرۋعا شامالارىڭىز جەتەدى. ەلدىڭ دامۋىنا قارجى قۇيۋعا دايىن ەكەندەرىڭىزدى كورسەتىڭىزدەر», دەدى قاسىم-جومارت توقاەۆ ءوز سوزىندە.
