جاڭا ماۋسىمنىڭ اشىلۋىنا قاتىسقان مادەنيەت جانە اقپارات ءمينيسترى ايدا بالاەۆا كورنەكتى قوس كومپوزيتوردىڭ مازمۇندى مۋزىكاسىنا, تەاتردىڭ باس ديريجەرى ءارى سپەكتاكلدىڭ قويۋشى ديريجەرى الان بورىباەۆتىڭ كاسىبي شەبەرلىگىنە جانە قويىلىمدا ونەر كورسەتكەن ارتىستەردىڭ تاماشا ورىنداۋىنا جوعارى باعا بەرىپ, ۇجىمعا زور جەتىستىك پەن شىعارماشىلىق تابىس تىلەدى.
قويىلىمدا ايگىلى باريتون جانات شىبىقباەۆ ۆوكالدىق جانە اكتەرلىك جاعىنان باستى پارتيانى وتە ءساتتى الىپ شىقتى. ول سومداعان اقىن بەينەسىن كورەرمەن وتە جىلى قابىلدادى. ابايدىڭ شاكىرتى ايداردى تانىمال تەنور مەيىر باينەش ورىنداپ, ءوز كەيىپكەرىنىڭ ەموتسيونالدىق جاعدايى مەن ىشكى ۋايىمىن تەرەڭ اشا ءبىلدى. تاماشا سوپرانو ايگۇل نيازوۆا اجاردىڭ رولىندە اكتەرلىك شەبەرلىگىمەن تانىلىپ, ونىڭ تۇنىق داۋىسى اۋەدە ۇشقان قۇستاي قالىقتادى. قارلىعاشتىڭ پارتياسىن تاتيانا ۆيتسينسكايا كەلىستى ورىندادى. كوكبايدىڭ ءرولىن تالانتتى ءارتىس ەرجان سايپوۆ وينادى. سونداي-اق بولات ەسىمحانوۆ – «سىرتتاننىڭ», تالعات عالەەۆ «جيرەنشەنىڭ» بەينەسىن سومدادى.
وپەراداعى ەكى جاستىڭ ماحاببات حيكاياسى كورەرمەندى ادەمى اسەرگە بولەپ, كوزگە جاس الدىردى. قوس عاشىقتىڭ رومانتيكالىق سەزىمى ماڭگىلىك ادامي قۇندىلىقتارمەن استاسا ورىلگەن.
«بىزگە ءاردايىم «اباي» وپەراسىنىڭ ءبىر عانا پايىمداماسى بار سەكىلدى كورىنەتىن, الايدا «استانا وپەرانىڭ» قويىلىمى ولاي ەمەس ەكەنىن كورسەتتى. تىڭدارماندارعا تاۋەلسىز وپەرا ونەرى رۋحىنداعى ينتەرپرەتاتسيا ۇسىنىلدى. ەڭ الدىمەن, وركەستردىڭ اۋەلەگەن كەرەمەت ءۇنىن اتاپ وتكىم كەلەدى, بۇل ماەسترو الان بورىباەۆتىڭ ەڭبەگى ەكەنى ءسوزسىز. قويۋشى ديريجەر پارتيتۋرا ماتىنىمەن تىڭعىلىقتى جۇمىس ىستەگەن, سوندىقتان كومپوزيتورلاردىڭ ۇلتتىق فولكلور ءۇنى مەن ابايدىڭ ءتولتۋما اۋەنىن وزىنە سىڭىرگەن كەمەڭگەر مۋزىكاسى شىن مانىندە اسەرلى ەستىلىپ, وندا تەرەڭ دراماتۋرگيا كورىنىس تاپقان. مەنىڭ ويىمشا, جارقىن كەيىپكەرلەر شوعىرى مەن ۇلتتىق جاۋھارعا دەگەن جاڭا كوزقاراستىڭ ارقاسىندا «اباي» وپەراسى الەمدىك كلاسسيكانىڭ ماڭگى وشپەيتىن تۋىندىلارىمەن تايسالماي ءبىر قاتاردا تۇرا الادى», دەيدى تالعات يبراەۆ ەسىمدى كورەرمەن سپەكتاكل اياقتالعاننان كەيىن العان اسەرىمەن ءبولىسىپ.
ايتپاقشى, سپەكتاكلدىڭ ءتورت اياعىن تەڭ باسىپ, جۇرتشىلىق جۇرەگىنەن جول تابۋىنا زور ۇلەسىن قوسقان تەاتردىڭ باس حورمەيستەرى ەرجان ءداۋىتوۆتىڭ, قويۋشى بالەتمەيستەرلەر تۇرسىنبەك نۇرقاليەۆ پەن عاليا بورىباەۆانىڭ, قويۋشى رەجيسسەردىڭ اسسيستەنتى – ەرەنباق تويكەنوۆتىڭ, ستسەنوگراف – كورنەكتى سۋرەتشى-ستسەنوگرافى ەتسيو فريدجەريونىڭ, كوستيۋمدەر بويىنشا سۋرەتشى – «وسكار» سىيلىعىنىڭ يەگەرى فرانكا سكۋارچاپينو جانە وپەرا ترۋپپاسىنىڭ ديرەكتورى ازامات جىلتىركوزوۆتىڭ ەڭبەگى وراسان.
