ماسەلەن, جۋىردا ماماندار «Kovrolux Shymkent» ورتالىعىنىڭ يەسى, جاس كاسىپكەر داۋرەن قاجىمۇقاننىڭ جۇمىس ورنىندا بولىپ, وزىمەن تىلدەسىپ قايتتى. ول – مەملەكەتتىك سالادا بىرنەشە جىل جۇمىس ىستەگەن جان. بىراق ءوزىنىڭ ايتۋىنشا, بالالىق ارمانى بيزنەسمەن بولۋ بولعان. مەملەكەتتىك مەكەمەدەگى قىزمەتىن تاستاپ, اقىرى دىتتەگەن ماقساتىنا جەتتى. بۇگىندە جەكە كاسىپكەر. بيزنەسىن باستاعانىنا جارتى جىلداي ۋاقىت بولعان. ول اشقان «Kovrolux Shymkent» ورتالىعى كىلەم جۋ جانە جەتكىزۋ قىزمەتىن كورسەتەدى. جۇمىستىڭ ساپاسىنا قاراي كليەنتتەر ارتىپ, ولارعا لايىقتى قىزمەت كورسەتۋ ءۇشىن قوسىمشا 20 ادامدى جۇمىسقا العان. ياعني ءوزى سەكىلدى 20 جاس بۇگىندە تۇراقتى جۇمىسپەن قامتىلعان.
«كاسىپ باستاۋدىڭ ەرتە-كەشى جوق. ماڭىزدىسى – سول كاسىپتى ءارى قاراي دوڭگەلەتىپ الىپ كەتۋ. مەملەكەتتىك قىزمەتتە ىستەپ جۇرگەنىمدە كاسىپكەرلىك سالاعا جاۋاپتى مامان بولدىم. سوندا الدىما تالاي ادام كاسىپ باستاۋ ءۇشىن اقىل-كەڭەس نەمەسە ءتيىستى قىزمەتتەردى سۇراپ كەلەتىن. ولارعا قاراپ ءوزىم دە جەكە بيزنەسكە كەتىپ قالعىم كەلەتىن. قانشا دەگەنمەن بالا كەزگى ارمانىم ەدى عوي. ءسويتىپ, ءبىر كۇنى قابىرعاممەن كەڭەسىپ, مەملەكەتتىك جۇمىسىمدى ءبىرجولاتا تاستاپ, جەكە كاسىپكە كەتۋگە بەل بۋدىم. بۇل شەشىمىمە تۇك تە وكىنبەيمىن. ارينە, باستاپقى كەزدە قيىن بولدى. دەگەنمەن كاسىپكەرلىك سالاسىنداعى از-ماز ءبىلىمىم ماعان كوپ كومەگىن تيگىزدى. سونىڭ ناتيجەسىندە قۇجات, قاراجات ماسەلەسىندە اسا قينالمادىم. دەي تۇرعانمەن كاسىپكەرلىك – تاۋەكەلدى قاجەت ەتەتىن سالا. بيزنەسكە سالعان اقشاڭ ءاپ-ساتتە كۇيىپ كەتۋى مۇمكىن. سول ءۇشىن الدىمەن ىشتەي سوعان دايىن بولۋ كەرەك. سونىمەن بىرگە كوزسىز تاۋەكەلگە بارماي, «جەتى رەت ولشەپ, ءبىر رەت كەسەتىندەي» قادامىڭدى انىق باسۋىڭ قاجەت. بۇگىندە 20 ادامدى جۇمىسپەن قامتىپ وتىرمىن. الداعى ۋاقىتتا جۇمىسشىلار سانىن ەكى ەسەگە ارتتىرۋ ويىمدا بار. سونداي-اق بۇگىندە كۇنىنە مىڭ شارشى مەتر كىلەم جۋسام, الداعى كەزدە ونىڭ كولەمىن ەكى مىڭ شارشى مەترگە كوبەيتۋ نيەتىم بار. جاس كاسىپكەرلەرگە ايتارىم, تاۋەكەل ەتۋ كەرەك, سونىمەن بىرگە توزىمدىلىك تە قاجەت. بيزنەس وڭاي سالا بولماعاندىقتان, وزىڭە نىق سەنىم ارتۋ وتە ماڭىزدى. ءوز باسىم وسى كاسىپتى باستاردا ءۇش ەرەجەگە ارقا سۇيەدىم. بىرىنشىدەن – تاۋەكەل, ەكىنشىدەن – شىدامدىلىق, ۇشىنشىدەن – اركىمنىڭ ايتقانىنا ەرىپ كەتپەي, ءوزىڭ ويلاعانداي جۇمىس ىستەۋ. سوسىن كوپشىلىگى باسەكەلەستىكتەن قورقادى. ودان سەسكەنبەي-اق قويسا بولادى. ويتكەنى بىزدە الىپ بارا جاتقانداي باسەكەلەستىك تە جوق. ەكىنشىدەن, باسەكەلەستىك – ساپا مەن بەرەكەنىڭ باستاۋى. وزگەنىڭ جاساپ جاتقان دۇنيەسىنە قاراپ سەن دە ودان دا جاقسىراق جاساۋعا تىرىساسىڭ, كليەنتتىڭ كوڭىلىن اۋلاسام دەيسىڭ. ءسويتىپ, ساپاعا ءمان بەرىپ, مىقتى تاۋار جاساپ شىعاراسىڭ. سەن دە ۇتىلمايسىڭ, ساپالى زاتقا كوڭىلى تولعان تۇتىنۋشى دا ريزا. مەنىڭ ويىمشا, قايتا سول جاقسى سەكىلدى», دەيدى جاس كاسىپكەر.
جاستار رەسۋرستىق ورتالىعىنىڭ قىزمەتكەرلەرى «جاس كاسىپكەرمەن سۇحبات» ايدارىنىڭ كەزەكتى كەيىپكەرىمەن دە اڭگىمە-دۇكەن قۇردى. كامەرا وبەكتيۆىنە ىلىنگەن ىسكەر ازاماتتىڭ ءبىرى اسان نۇريسلام بولدى. اساننىڭ تاڭداعان كاسىبى – اعاش ۇستاسى. ءوزىنىڭ ايتۋىنشا, 2021 جىلى ءا.قاستەەۆ اتىنداعى ونەر كوللەدجىنىڭ «اعاشتى كوركەمدەۋ جانە وڭدەۋ» ماماندىعى بويىنشا ءبىلىم العان. بۇگىندە مەملەكەتتەن قايتارىمسىز گرانتتى جەڭىپ الىپ, جەكە كاسىبىمەن اينالىسىپ وتىر.
«اتا-بابامىزدان جالعاسىپ كەلە جاتقان ۇستالىق ونەردى قولعا الىپ, سودان نان تاۋىپ جۇرگەنىمە شۇكىرشىلىك دەيمىن. قۇداي ماعان وسىنداي دارىن بەرگەن ەكەن, سونى كادەگە جاراتسام دەگەن وي عوي مەنىكى. باستى ماقساتىم – تەك اقشا تابۋ ەمەس, ءوزىم قاتارلاس جاستاردى دا وسى ونەرگە باۋلىپ, قولونەردى بارىنشا دامىتقىم كەلەدى. مەنىڭ قولىمنان شىققان دۇنيەلەر ءوز قالامدا, ەلىمىزدىڭ باسقا دا وڭىرلەرىندە ساتىلسا جانە ادامداردان مەنىڭ بۇيىمدارىنا ەرەكشە قىزىعۋشىلىق تۋىپ جاتسا, ودان ارتىق قانداي باقىت بولۋشى ەدى! قازىر ۇستالىق ونەرگە سۇرانىس باسىم. ياعني ادامدار مۇمكىن بولسا قولدان جاسالعان تۇرمىستىق بۇيىمدارعا قىزىعادى. ولاردىڭ تالابىن قاناعاتتاندىرۋ ءۇشىن كوپ ەڭبەكتەنۋ كەرەك, سونىمەن بىرگە بيزنەستى كەڭەيتۋ دە ماڭىزدى ءىستىڭ ءبىرى دەپ ويلايمىن. جالپى, كاسىپكەرلىكتىڭ ۇلكەن جاۋاپكەرشىلىك ەكەنىن ءتۇسىندىم. بۇل – ءبىرىنشى كەزەكتە مەملەكەت الدىنداعى جاۋاپكەرشىلىك. ويتكەنى مەملەكەت بىزگە سەنىپ, قانشاما گرانت ءبولىپ جاتىر. ال سول اقشانى ءوزىنىڭ ورنىمەن, ماقساتىمەن جاراتا الماساق, بىزگە سىن. امانات دەگەن بار. وعان قيانات جاساۋعا بولمايدى. مەملەكەت تاراپىنان بەرىلگەن گرانت تا – امانات. سول مويىنعا جۇكتەلگەن پارىز امالدى ابىرويمەن اتقارىپ شىعۋىمىز كەرەك. ەكىنشىدەن, ءوزىڭنىڭ وتباسىڭ مەن قول استىڭداعى جۇمىسكەرلەر الدىندا دا ءبىراز جاۋاپكەرشىلىك جۇگىن ارقالايسىڭ. ۇيدە اتا-اناڭ ساعان سەنىپ وتىر. سولاردىڭ سەنىمىن اقتاۋ دا – ۇلكەن پارىز. تۇپكى ماقساتىم – تەك قارنىمدى تويدىرۋ ەمەس, قازاقتىڭ ۇلتتىق قولونەرىن ناسيحاتتاۋ, دامىتۋ, دارىپتەۋ. ۇلتتىق ناقىشتاعى نەبىر ادەمى ويۋلارىمىزدىڭ تۇرمىستىق بۇيىمداردا بەدەرلەنىپ, ءاربىر داستارقاننىڭ ءسانىن كىرگىزىپ تۇرسا ەكەن دەگەن ارمانىم بار. وسىلايشا, تۋعان ەلىمنىڭ رۋحانياتىن اسىرۋعا, كاسىپكەرلىك ارقىلى ەل قازىناسىنا تيتتەي بولسا دا تابىستىڭ تۇسۋىنە اتسالىسقىم كەلەدى. بولاشاق جاستاردىڭ قولىندا دەيمىز. وسى ۇراندى ناقتى ىسپەن, ارەكەتپەن دالەلدەيتىن ۋاقىت كەلدى. جۋىردا پرەزيدەنت قاسىم-جومارت توقاەۆ ءداستۇرلى جولداۋىن جولدادى. وندا مەملەكەتتىڭ دامۋىنا قاتىستى ماقساتتار مەن مەجەلەر قويىلدى. بۇلاردى ورىنداۋ ۇكىمەت موينىنداعى مىندەت بولعانىمەن, جاستاردىڭ دا كوتەرەتىن جۇگى جوق ەمەس. وسكەلەڭ ۇرپاق وسىنى سەزىنۋ كەرەك. ءاربىر جاس «ەلىمنىڭ كوركەيۋىنە مەن ۇلەس قوسپاعاندا كىم ۇلەس قوسادى» دەگەن ۇستانىممەن ءومىر سۇرسە, قازاقستاننىڭ بولاشاعى جامان بولمايدى دەپ ويلايمىن», دەدى ىسكەر.
نەگىزىنەن مەملەكەتتەن بولىنەتىن گرانتتار مەن پرەزيدەنت باستاماسىمەن قولعا الىنعان جەڭىلدەتىلگەن نەسيەلەر مەگاپوليستە شاعىن جانە ورتا بيزنەستىڭ جاندانۋىنا ۇلكەن سەپتىگىن تيگىزىپ وتىر. جالپى, شاعىن كاسىپكەرلىكتىڭ ىلگەرى باسۋىنا مەملەكەتتىڭ ءوزى ءبىرىنشى كەزەكتە مۇددەلى. سەبەبى كىشىگىرىم بيزنەس ارقىلى ەكونوميكادا ءوسىمنىڭ وڭ ديناميكاسى قالىپتاسادى. وسى سالادا قىزمەت ىستەيتىن كاسىپكەرلەردىڭ ءوزى-اق ىشكى جالپى ءونىمنىڭ ارتۋىنا اجەپتەۋىر ۇلەس قوسا الادى. سونىمەن بىرگە شاعىن كاسىپورىندار, قىزمەت كورسەتۋ ورىندارى كوپتەپ اشىلسا, قانشاما ادامنىڭ تۇراقتى جۇمىس تابۋىنا جاردەمىن تيگىزەر ەدى. قىسقاسى, مەملەكەتكە شاعىن جانە ورتا بيزنەستىڭ ەكونوميكالىق, الەۋمەتتىك پايداسى وتە زور. سوندىقتان دا پرەزيدەنت جىل سايىنعى ءاربىر جولداۋىندا ەكونوميكانىڭ وسى سەكتورىن ەرەكشە قولعا الۋ قاجەتتىگىن ۇنەمى نازارعا الىپ كەلەدى. بيىلعى جولداۋدا دا پرەزيدەنت بۇل تاقىرىپتى اينالىپ وتپەگەنى بەلگىلى. ءتىپتى جولداۋ تۇتاستاي ەكونوميكالىق سالاعا ارنالعانداي اسەر قالدىردى. مەملەكەت باسشىسى تەك جەتىستىكتەردى عانا سارالاپ قويماي, سالاداعى تۇيتكىلدى ماسەلەلەرگە دە توقتالىپ ءوتتى.
«ەندى ورتا كاسىپكەرلىكتى دامىتۋ ماسەلەسىنە توقتالعىم كەلەدى. كەيىنگى جىلدارى قابىلدانعان شارالاردىڭ ارقاسىندا شاعىن جانە ءىرى بيزنەس تۇراقتى دامي باستادى. الايدا ورتا كاسىپكەرلىكتىڭ دامۋ قارقىنى ءالى دە باسەڭ. جاڭا ەكونوميكالىق ۇلگىگە كوشۋ ءۇشىن ونى «قولمەن كوتەرۋگە» تۋرا كەلەدى. ەڭ الدىمەن, ورتا بيزنەستىڭ دامۋىن تەجەپ تۇرعان كەدەرگىلەردى جويۋ قاجەت. ورتا كاسىپكەرلىكتىڭ باسىم بولىگى ابدەن دامىعان كەزدە بولشەكتەنىپ كەتەدى. ويتكەنى ولارعا شاعىن بيزنەس دەڭگەيىندە قالعان الدەقايدا «قولايلى». ۇكىمەت شاعىن بيزنەستى ءوزارا بىرىگىپ, ءىرى كاسىپ يەلەرى بولۋعا ىنتالاندىرۋ ءۇشىن زاڭعا وزگەرىستەر ەنگىزۋى كەرەك. ەلىمىزدىڭ نارىعىندا بەلسەندى جۇمىس ىستەپ جاتقان تابىستى ورتا كاسىپورىندار كوپ ەمەس. ولارعا قولداۋ كورسەتۋ قاجەت. مۇنداي كاسىپورىنداردىڭ ارقايسىسىنا قاتىستى ناقتى جوسپار ازىرلەۋ كەرەك. سول ارقىلى ولاردىڭ ءوندىرىس قابىلەتىن ارتتىرىپ, ءونىم كولەمىن ەكى-ءۇش ەسە كوبەيتۋ قاجەت», دەدى پرەزيدەنت.
جولداۋدا مەملەكەت باسشىسى شاعىن كاسىپورىنداردى ورتا كاسىپكەرلىك دەڭگەيىنە كوتەرۋگە ۇكىمەت بارىنشا قولداۋ كورسەتۋگە ءتيىس ەكەنىن ايتتى. دەمەك جوعارىدا اتالعان شاعىن بيزنەس يەلەرى كەلەشەكتە وزدەرى ارمانداعان ۇلكەن تابىسقا قول جەتكىزە الادى دەگەن ءسوز. بۇل ءۇشىن مەملەكەت شاعىن بيزنەستىڭ ىرگەسىن كەڭەيتۋگە قول ۇشىن بەرۋگە ءازىر.
جەرگىلىكتى اكىمدىك تە بۇل باعىتتا شاما-شارقىنشا ارەكەت ەتىپ جاتىر. ماسەلەن, مەگاپوليستە جۇمىس بەرۋشىلەردەن تۇسكەن وتىنىشكە سايكەس قىركۇيەك ايىنان باستاپ 24 وقۋ ورتالىعى 1 500-دەن اسا جۇمىسسىز ازاماتتى تەگىن وقىتپاق. قىسقامەرزىمدى كاسىپتىك وقىتۋ «كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى» اياسىندا جۇزەگە اسىرىلادى. وقۋ ءساتتى اياقتالعاننان كەيىن جۇمىسسىز ازاماتتارعا سەرتيفيكات تابىستالىپ, جۇمىس بەرۋشىلەر ولاردى الەۋمەتتىك كەلىسىمشارت نەگىزىندە جۇمىسقا ورنالاستىرۋعا مىندەتتەمە الادى. وسىلايشا, كاسىپورىندارعا قوسىمشا جۇمىس كۇشى ارقىلى وزدەرىنىڭ وندىرىستىك الەۋەتىن ارتتىرۋعا مۇمكىندىك تۋادى. ءوز كەزەگىندە جۋىردا قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى بالمارجان ناربەكوۆانىڭ توراعالىعىمەن كوميسسيا وتىرىسى ءوتتى. القالى جيىندا 60-تان اسا جۇمىس بەرۋشى مەكەمەنىڭ وتىنىشتەرى سارالاندى. ولار وقۋ ۇيىمدارىندا ءتۇرلى ماماندىقتار بويىنشا جۇمىسسىز ازاماتتاردى, سونىڭ ىشىندە, اسىرەسە جاستاردى وقىتىپ, جۇمىس كۇشىمەن قامتاماسىز ەتۋدى سۇراعان. دەرەك بويىنشا جۇمىس بەرۋشى مەكەمەلەردەن تەحنيكالىق جانە كاسىپتىك سالا ماماندارىنا سۇرانىس كوپ تۇسكەن. اتاپ ايتقاندا, اۆتوموبيل جوندەۋ دانەكەرلەۋشىسى, بايلانىس جەلىلەرىنىڭ ەلەكتريكتەرى, جول-قۇرىلىس كولىگىنىڭ ءماشينيسى, كەڭ بەيىندى قۇرىلىس جۇمىستارىنىڭ شەبەرى مەن كومپيۋتەر جانە اپپاراتىق قۇرالدارىنىڭ وپەراتورى, كوكونىس ءوسىرۋشى مەن مەرچەندايزارلەر سەكىلدى ماماندىق يەلەرى بۇگىندە ەڭبەك نارىعىندا كوپ سۇرانىسقا يە ەكەن. جالپى, كاسىپتىك وقىتۋ مەرزىمى 3 ايدى قۇرايدى. اي سايىن 20 948 تەڭگە شاكىرتاقى مەن 2 اەك, ياعني 6 900 تەڭگەدەن ءبىر رەتتىك ماتەريالدى كومەك تولەنەدى. وقۋعا 18 جاستان زەينەت جاسىنا دەيىنگى, جەكە كاسىپكەر رەتىندە تىركەلمەگەن, شىمكەنت قالاسىندا تۇراقتى تىركەۋدە تۇرعان جۇمىسسىز ازاماتتار قاتىسا الادى. ۇمىتكەردىڭ مۇگەدەكتىگى بولعان جاعدايدا دارىگەردىڭ ارنايى رۇقساتى بولۋى قاجەت. ونداي ازاماتتىڭ جۇمىسقا قابىلەتتىلىگى مۇگەدەكتىكتى وڭالتۋدىڭ جەكە باعدارلاماسىندا (يپر) انىقتالادى.
ەندىگى كەزەكتە جاستار ساياساتى بويىنشا قالادا اتقارىلعان نەگىزگى ءىس-شارالارعا قىسقاشا توقتالىپ وتسەك, جالپى مەگاپوليستە بۇگىندە 14-35 جاس ارالىعىندا 362 980 تۇرعىن بار. ولار جالپى قالا تۇرعىندارىنىڭ 32%-ىن قۇرايدى. اكىمشىلىك اۋماقتان جاستاردىڭ سانى ەڭ كوبى ەڭبەكشى اۋدانىندا, وندا 105 181 جاس بار. وسكەلەڭ ۇرپاققا قىزمەت كورسەتۋ ماقساتىندا ءتورت اۋداندا دا «جاستار رەسۋرستىق ورتالىعى» قۇرىلعان. رەسمي دەرەككە زەر سالساق, جىل باسىنان بەرى جاستار رەسۋرستىق ورتالىقتارىنا كەلگەن 35 مىڭ ازاماتقا قىزمەت كورسەتىلىپتى. سونىمەن قاتار ءتۇرلى الەۋمەتتىك باعىتتار بويىنشا 500-گە جۋىق ءىس-شارا ۇيىمداستىرىلعان. جىل سوڭىنا دەيىن 6 ينديكاتوردى ورىنداۋ بويىنشا جۇمىستار جۇرمەك. ايتالىق, رەسۋرستىق ورتالىق جانىنان قۇرىلعان ء«موبيلدى توپ» مەملەكەتتىك باعدارلامالاردى ءتۇسىندىرۋ ءۇشىن شالعاي ەلدى مەكەندەرىنە بارىپ جوعارى جانە ورتا ارناۋلى وقۋ ورىندارىنىڭ ءبىتىرۋشى تۇلەكتەرىمەن كەزدەسەدى. قازىرگى تاڭدا 5 800-گە جۋىق جاسقا ء«موبيلدى توپ» وكىلدەرى مەملەكەتتىك باعدارلامالاردى ناسيحاتتاپتى.
سونىمەن بىرگە جاستار مەن جاسوسپىرىمدەر اراسىندا قۇقىقبۇزۋشىلىق, زورلىق-زومبىلىق, الىمجەتتىكتىڭ الدىن الۋ, ونداي ارەكەتتىڭ قىلمىس, قوعامعا زيان ەكەنىن ءتۇسىندىرۋ ماقساتىندا قۇقىق قورعاۋ ورگاندارىنىڭ قىزمەتكەرلەرىمەن بىرلەسىپ, «جاسوسپىرىمدەردىڭ قىلمىستىق جاۋاپكەرشىلىگى» تاقىرىبىندا سەمينار-ترەنينگ, پروفيلاكتيكالىق جۇمىستار جۇرگىزدى. سونىڭ اياسىندا 18 كەزدەسۋ ءوتىپ, وعان 720 جاس قاتىسقان. بۇعان قوسا كافەدە, ويىن-ساۋىق ورتالىقتارىندا, كوشەلەردە جانە تاعى باسقا ساۋىق قۇراتىن جەرلەردە جۇرگەن جاستارعا 14 رەيدتىك شارا ۇيىمداستىرىلىپ, 560 جاسقا مۇنداي ارەكەتتىڭ دۇرىس ەمەستىگى ايتىلدى.
مەكتەپ وقۋشىلارىن كاسىپتىك باعدارلاۋعا, جاستاردى ەڭبەك نارىعىنىڭ قاجەتتى ماماندىقتارىن تاڭداۋعا باعىتتالعان «پروفناۆيگاتسيا» جوباسى اياسىندا 52 مەكتەپكە 5 812 كەزدەسۋ مەن سەمينار-ترەنينگتەر ءوتىپ, جاس ازاماتتار كاسىپورىندارعا ەكسكۋرسياعا باردى. قالاداعى جوعارى جانە ورتا ارناۋلى وقۋ ورىندارى جاستارى اراسىندا دەسترۋكتيۆتى ءدىني اعىمداردىڭ ىقپالىندا كەتىپ قالماۋعا جول بەرمەۋ – باستى مىندەت. وسى ورايدا 5 مىڭنان اسا جاس ء«دىن ماسەلەلەرىن زەرتتەۋ ورتالىعى» كمم تەولوگ ماماندارىمەن كەزدەسىپ, وزەكتى تاقىرىپتا سۇحبات قۇردى. مەگاپوليستە ۆولونتەرلىك قىزمەتكە تارتىلعان وقۋشىلار سانى 32 مىڭنان اسادى. بيىل جالپى ءبىلىم بەرۋ مەكەمەلەرىنىڭ وقۋشىلارىنان قۇرالعان ۆولونتەرلىك توپتار «Birgemiz», «Bilim», «مەنىڭ جاسىل قالام», «Birgemiz: Asyl mura», «Birgemiz: Qamqor», «Birgemiz: Sabaqtastyq», «بارىڭمەن ءبولىس» جوبالارى اياسىندا وڭالتۋ جانە بەيىمدەۋ ورتالىقتارىنداعى, قارتتار ۇيلەرىندەگى ادامدارعا, الەۋمەتتىك وسال توپقا جاتاتىن تۇرمىسى تومەن وتباسىلارعا كومەك كورسەتىپ, جالعىز ءوزى تۇراتىن قاريالاردىڭ ۇيلەرىن تازالاپ بەردى. ودان بولەك, ۆولونتەر جاستارعا وقىتۋ ءىس-شارالارى, تاريحي-مادەني جەرلەرگە ەكسكۋرسيالار, لاگەرلىك دەمالىستار ۇيىمداستىرىلدى.
بۇگىندە شاھارداعى 24 مىڭ جاس ءوزىن ۆولونتەر دەپ سانايدى. 12 تامىز – حالىقارالىق جاستار كۇنى اياسىندا مەگاپوليستە كوپتەگەن ءىس-شارا قولعا الىندى. جاستار كۇنى «بازار جاستار ليگاسى» جوباسىمەن باستاۋ الدى. مۇندا بازاردا, ساۋدا ورتالىقتارىندا, ۇلكەن دۇكەندەردە جۇمىس ىستەيتىن جاستار ءوزارا ۇلدار مەن قىزدار كومانداسىن قۇرىپ, فۋتبول, ۆولەيبولدان جارىستى. ءوز كەزەگىندە تۋرنير جەڭىمپازدارىنا جەكەلەي پلانشەت, سمارتفون, ۆەلوسيپەد سىيلىققا بەرىلدى. سپورتتىق سايىسقا ساۋدا سالاسىندا تەر توگىپ جۇرگەن 400-گە جۋىق جاستار تارتىلدى. مۇنان وزگە شىمشاھاردا العاش رەت «Shymkent fest» جاستار فەستيۆالى وتكىزىلدى. ەكى ايعا جالعاسقان فەستيۆالدە جاستار كوشە سپورتى «Street worكout» , سكەيت, گرافيتي شوۋ, ۇستەل تەننيسى, سۋرەت سالۋدان جارىستى, سونداي-اق ينتەللەكتۋالدى سايىستار, ۇلتتىق قولونەر مەن ۇلتتىق اسپاپتار كورمەسى, پوەزيا كەشتەرى ۇيىمداستىرىلدى.
