«سۋدى باياۋ ءسۇزۋ» دەپ اتالاتىن تەحنولوگيانىڭ قۇرىلىسى وڭاي, ءارى وعان تەحنيكالىق قىزمەت كورسەتۋ ءادىسى دە ارزان. سوندىقتان دا وسى ادىسپەن شاعىن عانا اۋىلدى تازا سۋمەن قامتاماسىز ەتۋگە بولادى ەكەن.
عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنىڭ اقپاراتىنا سۇيەنسەك سۋدى دايىنداۋدىڭ جانە تازارتۋدىڭ ءداستۇرلى تەحنولوگيالارى بىرنەشە پروتسەستەردەن تۇراتىن كۇردەلى تەحنولوگيانى قامتيدى: تۇندىرۋ, ءسۇزۋ, زالالسىزداندىرۋ. ونىڭ ۇستىنە سۋ قويمالارىنىڭ قاتتى لاستانۋىنا بايلانىستى قولدا بار سۋ تازارتۋ قۇرىلعىلارى ءتيىستى ناتيجە بەرمەيدى. ەكىنشى جاعىنان, قازىر اۋىز سۋدىڭ ساپاسىنا قويىلاتىن تالاپتار دا ارتىپ وتىر, سول سەبەپتى سۋ تازارتۋ جۇيەلەرىن ورناتۋ قۇنى دا ءوسىپ جاتىر. وسىنىڭ سالدارىنان شالعايداعى شاعىن اۋىلداردا تازا سۋدىڭ باعاسى قازىر شارىقتاپ تۇر.
اتالعان ۋنيۆەرسيتەتتىڭ عالىمدارى وسىعان دەيىن بەلگىلى بولعان, الايدا ۇمىت قالعان تەحنولوگيانى, ياعني اۋىز سۋدى باياۋ ءسۇزىپ تازارتۋ ءادىسىن قايتادان زەرتتەپ, قازاقستاننىڭ جاعدايىنا قاراي بەيىمدەدى.
اۋىز سۋدى دايىنداۋعا ارنالعان باياۋ سۇزگىلەر سۋدى لايدان تازارتىپ قانا قويمايدى, سونىمەن قاتار ونىڭ قۇرامىنداعى ەرەكشە ورگانيكالىق, بەيورگانيكالىق لاستاۋشى زاتتار مەن باكتەريالاردى دا تازارتادى. ءارى بۇل رەتتە ەشقانداي دا حيميالىق رەاگەنتتەر پايدالانىلمايدى.
