باس پروكۋرور بەرىك اسىلوۆتىڭ توراعالىعىمەن وتكەن جيىندا ماماندار بالا قۇقىقتارىن قورعاۋ جانە وتباسىلارعا قولداۋ كورسەتۋ ءۇشىن IT تەحنولوگيالاردى كەڭىنەن قولدانۋدى ۇسىندى. وسى رەتتە قاتىسۋشىلارعا «ە-پرەۆەنتسيا» جوباسى تانىستىرىلدى. باعدارلاما قيىن جاسوسپىرىمدەردىڭ ءومىر ءسۇرۋ جاعدايلارىن, بوس ۋاقىتىن, ءبىلىم الۋ مۇمكىندىكتەرىن, الەۋمەتتىك ماسەلەلەردىڭ تالداۋعا مۇمكىندىك بەرەدى. ءارى پوليتسيا, ءبىلىم بەرۋ, الەۋمەتتىك قىزمەتكەرلەر اراسىنداعى ءوزارا ءىس-قيمىلدىڭ جەتكىلىكتى دەڭگەيىن قامتاماسىز ەتۋگە جول اشادى.
«كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستاردىڭ الدىن الۋ سالاسىندا قولايسىز وتباسىلارعا, كوپبالالى وتباسىلارعا جانە بالالار وگەي اكەسىمەن بىرگە تۇراتىن وتباسىلارعا ءىس جۇزىندە بارۋ قامتاماسىز ەتىلەدى. بۇل جوبا ەلوردادا جانە اقتوبە وبلىسىندا سىنالىپ جاتىر», دەلىنگەن حابارلامادا.
سونداي-اق ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ورگانداردىڭ 80-نەن استام دەرەكقورى بىرىكتىرىلگەن «وتباسىنىڭ تسيفرلىق كارتاسىنىڭ» مۇمكىندىگىن تانىستىردى. وسىلايشا, جيىلعاندار بالالاردىڭ جاراقاتتانۋىنىڭ سەبەپتەرى مەن كامەلەتكە تولماعاندار اراسىنداعى بالالار ءسۋيتسيدىنىڭ جانە قىلمىستىڭ الدىن الۋ جونىندەگى جۇمىستى ءجىتى تالقىلادى. بالا قۇقىقتارى جونىندەگى ۋاكىل دينارا زاكيەۆا زورلىق-زومبىلىق, قاتىگەزدىك, بالالاردىڭ تەرەزەدەن قۇلاۋى, بالالار مەكەمەلەرىن ليتسەنزيالاۋ جانە بۋللينگ ماسەلەلەرى بويىنشا 50-دەن استام تۇزەتۋدى قامتيتىن بالالاردىڭ قاۋىپسىزدىگىن قامتاماسىز ەتۋگە قاتىستى زاڭنامالىق سيپاتتاعى ۇسىنىستار كەلتىردى.
– ەلىمىزدە كۇن سايىن 6 بالاعا قاتىستى قىلمىس جاسالادى. كۇن سايىن 1-2 بالا ءوز-وزىنە قول جۇمسايدى نەمەسە جۇمساۋعا تىرىسادى. تەك وسى جىلدىڭ 8 ايىندا وتكەن جىلمەن سالىستىرعاندا بۇل دەرەكتەر 47 پايىزعا ءوستى. ال بالالارعا قاتىستى جاسالعان قىلمىس سانى 18 پايىزعا ءوستى. كۇن سايىن 342 بالا تۇرمىستىق زورلىق-زومبىلىققا ۇشىرايدى. بالالار اراسىندا كۇن سايىن 5 قىلمىس جاسالادى, – دەدى بالا قۇقىقتارى جونىندەگى ۋاكىل دينارا زاكيەۆا.
مەملەكەتتىك ورگاندار بۇل ۇسىنىستاردى جۇمىس توبىنىڭ وتىرىستارىندا ودان ءارى تالقىلايدى. ءىس-شارا سوڭىندا باس پروكۋرور بەرىك اسىلوۆ پەن بالا قۇقىقتارى جونىندەگى ۋاكىل دينارا زاكيەۆا مەموراندۋمعا قول قويدى. وسىلايشا, تاراپتار ءوزارا ىنتىماقتاستىق تۋرالى ۋاعدالاستى.
ايتا كەتەيىك, ەلوردا پروكۋراتۋراسى اكىمشىلىك قۇقىق بۇزۋشىلىق تۋرالى ىستەردى قاراۋ تاجىريبەسىنە تالداۋ جۇرگىزدى. ناتيجەسىندە, كامەلەتكە تولماعاندارعا قاتىستى ايىپپۇلداردىڭ ارتىق سومالارىن سالۋ جانە جاۋاپقا تارتۋ مەرزىمدەرىن قولدانۋدىڭ ەرەكشە ءتارتىبىن بۇزعانى انىقتالدى. قاداعالاۋ اكتىلەرى نەگىزىندە ۋاكىلەتتى ورگانداردىڭ 30 قاۋلىسى زاڭعا سايكەستەندىرىلدى, اتاپ ايتقاندا 13 ءىس بويىنشا ايىپپۇل سومماسى تومەندەتىلگەن. ال 17 ءىس جاۋاپكەرشىلىككە تارتۋ مەرزىمىنىڭ وتۋىنە بايلانىستى توقتاتىلىپتى.
