وتە ورىندى ايتىلعان سوزدەر. بىراق ۇكىمەت بۇل تاپسىرمانى ىسكە اسىرا الا ما, ماسەلە – سوندا. اسىرەسە ىشكى رىنوكتى قورعاۋ سالاسىندا ءالى كۇنگە ەنجارلىقتان ارىلا الماي وتىرمىز. مىسالى, «كاپيتال.كز» مالىمەتىنە قاراعاندا, بىلتىر ەلىمىزگە رەسەيدەن 60 مىڭ تونناداي ءسۇت ونىمدەرى ەنگىزىلىپتى. ال ءبىز ولارعا بار بولعانى 22,2 مىڭ توننا ءونىم ەكسپورتتاپپىز. رەسەيدەن ەنگەن ءسۇت ونىمدەرىنىڭ ءبارىن ءوز ىشىمىزدە وندىرىلۋگە بولادى-اق. سىرتتان كەلىپ جاتسا دا كورشىلەرىمىز وندىرگەن ءونىمنىڭ باعاسى تومەن. وسىندايدا ءوزىمىزدىڭ ءوندىرۋشىنى قولداۋ ءۇشىن رەتتەگىش فاكتورلاردى ىسكە قوسىپ, يمپورتتىڭ باعاسىن كوتەرۋگە ابدەن بولادى. بىراق ەاەو شارتى بويىنشا, ونداي شارالار قولدانۋعا ءبىزدىڭ قاقىمىز جوق. ال ولار باسەكەلەستىك ارتىپ بارا جاتسا, شارت نەگىزدەرىنە سۇيەنىپ, ونىمدەرىمىزگە توسقاۋىل قويا قويادى. وسىنداي ادىلەتسىزدىكتەردى ەڭسەرۋگە ۇكىمەت تاراپىنان ساياسي ەرىك-جىگەر كەرەك.
پرەزيدەنت جولداۋدا 100-دەن اسا تاۋارلى-ءسۇت فەرماسىن سالدىرعانىمىز ءۇشىن سولتۇستىك قازاقستان وبلىسىنىڭ جەتىستىگىن كوپكە ۇلگى ەتتى. بىراق وسىنداي فەرما سالعان كەيبىر جىگىتتەر ءسۇت ءوندىرۋ ءتيىمسىز, قولداعى مالدى ساتۋ كەرەك دەپ ءجۇر. ويتكەنى ءبارى دە ميلليونداعان تەڭگە نەسيەگە العان مالىنىڭ قارىزىن جابا الماي قالامىز با دەپ الاڭدايدى.
ىشكى وندىرۋشىلەردى قولداۋ ماسەلەسىندە وزبەكستان العا ءتۇسىپ بارادى. ولار بىزدەن بيدايدى شيكىزات تۇرىندە ەنگىزىپ, وزدەرىندە ۇن قىلىپ, ار جاعىنداعى اۋعانستان, تاجىكستان سياقتى ەلدەرگە ساتادى. مۇنىڭ ەكونوميكالىق تيىمدىلىگىن ايتپاعاندا, قانشاما قوسالقى جۇمىس ورىندارىن اشۋعا مۇمكىندىك بار. ال ءبىز ۇن كۇيىندە ەنگىزەيىك دەسەك, باج سالىعىن ۇلكەيتىپ قويعان. سوندىقتان بيداي كۇيىندە وتكىزۋگە ءماجبۇرمىز. وسىنداي تۇيتكىلدى ماسەلەلەردى وڭ شەشە الساق, ءىسىمىز ىلگەرىلەپ جۇرە بەرەر ەدى.
جومارت وماروۆ,
«توكۋشي GRAIN» جشس ديرەكتورى
سولتۇستىك قازاقستان وبلىسى
بالانىڭ ۇيىرمەدەن ۇيرەنەرى كوپ
جەكە تۇلعانى وقىتۋ, تاربيەلەۋ جانە دامىتۋدا ۇيلەستىرۋشى قوسىمشا ءبىلىم بەرۋ ۇيىمدارىنىڭ الار ورنى ەرەكشە. بۇل ورايدا وبلىستىق جاس تۋريستەر ستانساسىنىڭ اتقارىپ وتىرعان ەڭبەگى اۋقىمدى. بالالاردىڭ جازعى دەمالىسىن ءتيىمدى وتكىزۋدى قامتاماسىز ەتەتىن مەملەكەتتىك مەكەمە 8 مىڭنان اسا بالانى ۇيىرمە جۇمىستارىمەن قامتيدى.
بيىل «تۇركىستان وبلىستىق جاس تۋريستەر ستانساسى» كمم ءوزىنىڭ 65 جىلدىق مەرەيتويىن اتاپ وتكەلى وتىر. مەكەمە 1953 جىلى شىمكەنت قالاسىنداعى وبلىستىق «وقۋشىلار ۇيىندە» تۋريستىك ءبولىم رەتىندە اشىلىپ, 1957 جىلى بالالار تۋريستىك-ەكسكۋرسيالىق بازاسى رەتىندە دەربەس ءبولىنىپ شىققاننان كەيىن اتاۋىن «جاس تۋريستەر ستانساسى» دەپ وزگەرتتى. بۇگىندە بۇل مەكەمە قىزمەتىن تۇركىستان قالاسىندا جالعاستىرىپ, وبلىستاعى بالالار مەن جاسوسپىرىمدەر ءتۋريزمىنىڭ ورتالىعىنا اينالىپ ۇلگەردى.
اتالعان ستانسا مەن وعان قاراستى قالا, اۋداندىق مەكەمەلەردىڭ قىزمەتى – بالالار مەن جاسوسپىرىمدەردىڭ دەمالىسىن, ولاردى ساۋىقتىرۋ مەن جۇمىسپەن قامتىلۋىن ۇيىمداستىرۋ, سونداي-اق شىعارماشىلىق دامۋى ءۇشىن قاجەتتى جاعدايلار جاساۋ, كامەلەتكە تولماعانداردىڭ قۇقىق بۇزۋشىلىقتارىنىڭ, قىلمىس جاساۋلارىنىڭ الدىن الۋ, قاراۋسىز جانە قاداعالاۋسىز قالۋلارىن بولدىرماۋ. قازىرگى كەزدە ستانسادا تۋريستىك-سپورتتىق, تۋريستىك-ەكسكۋرسيالىق, تۋريستىك-ەكولوگيالىق, تۋريستىك-ولكەتانۋ, تۋريستىك-ارحەولوگيالىق جانە ۇلتتىق تۋريزم باعىتتارىندا جۇمىستار اتقارىلىپ كەلەدى.
مەنىڭ اۆتورلىق جوبام نەگىزىندە ەرەكشە پىشىمدەگى «وركەنيەتتى ءومىر» ينتەللەكتۋالدى توك-شوۋى, «جاسىل ساقشى» بالالار مەن جاسوسپىرىمدەر ۇيىمىنىڭ سلەتى, «تۇران سكاۋتتار اسكەري-پاتريوتتىق قوزعالىسى» جيىنى, « ۇلى تۇران ۇرپاقتارى» تاقىرىبىندا ولكەتانۋشىلار فەستيۆالى, ء«بىز – تۋريستىك وتباسىمىز!» وتباسىلىق تۋريستىك فەستيۆالى, «قوعام جانە وتباسى» اتا-انالار فورۋمى مەن ۇلتتىق تۋريزم – ۇلتتىق قۇندىلىقتاردى ناسيحاتتاۋ ماقساتىندا «ۇلتتىق ات سپورتىن ۇيىرمەگە قاتىسۋشىلار اراسىندا ناسيحاتتاۋ» كوشپەلى سەمينارى ەلىمىزدە العاش رەت وتكىزىلدى.
سونىمەن بىرگە وقۋ-اعارتۋ مينيسترلىگىنە قاراستى رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ «جاز قىزىعى – كوڭىلدى دەمالىس» جوسپارىنا سايكەس 1 ماۋسىم – 20 تامىز ارالىعىندا 1500-دەن اسا ءىس-شارا ۇيىمداستىرىلىپ, ولاردا 12 مىڭعا جۋىق وقۋشى قامتىلدى.
ساۋلە ومىرباەۆا,
«وبلىستىق جاس تۋريستەر ستانساسى» كمم ديرەكتورى
تۇركىستان وبلىسى
نيەتىمىز مۇمكىندىكپەن ۇيلەسپەي تۇر
بيىل ەۋروكۋبوك ويىندارىنا ءاۋ باستا ءتورت كوماندا قاتىسقانى بەلگىلى. ەل چەمپيونى رەتىندە دۇبىرگە قوسىلعان «استانا» ەكىنشى تۋردا-اق زاگرەبتىڭ «ديناموسىنان وڭباي «تاياق جەپ», ەۋروپا ليگاسىنا سىرعىدى. وندا دا تۇراقتاي الماي, اۋپىرىمدەپ ءجۇرىپ كونفەرەنتسيا ليگاسىنىڭ توپتىق كەزەڭىنە ءوتتى. وعان دا شۇكىر دەمەسكە لاجىمىز جوق. ارينە, كەزىندە چەمپيوندار ليگاسى مەن ەۋروپا ليگاسىنىڭ توپتىق كەزەڭدەرىندە ويناعان كوماندادان باسقا ناتيجە كۇتكەنىمىز انىق.
قالعان ءۇش كوماندامىز ويىندارىن كونفەرەنتسيا ليگاسىندا باستادى. ەۋروپادا رەيتينگىمىز تومەن بولعاندىقتان, ەۋروپا ليگاسىنا كوماندا قاتىستىرا المادىق. ال اتالعان ليگادا ونەر كورسەتكەن قوستانايدىڭ «توبىلى» ەكىنشى تۋردا بىلتىرعى جارتىلاي فينالعا شىققان شۆەيتساريانىڭ «بازەلىن» قاپى قالدىرىپ, كەلەسى كەزەڭدە دە جەڭىستى جولىن جالعاستىرعانىمەن, پلەي-وففتا ۇتىلىپ, توپتىق كەزەڭنەن شەت قالدى.
«ورداباسى» العاشقى ەكى ويىننىڭ قورىتىندىسى بويىنشا ەۋروپاعا «جورىعىن» اياقتادى. شىمكەنتتىكتەر ءتاپ-ءتاۋىر وينادى, بىراق تورەشىلەردىڭ دورەكى قاتەلىكتەرى كوماندانىڭ جولىنا توسقاۋىل قويدى. سوندىقتان ولاردىڭ ءارى قارايعى تاعدىرلارى ءبىز ءۇشىن جۇمباق كۇيىندە قالدى. ال «اقتوبەنىڭ» قارسىلاستارى اناۋ ايتقانداي مىقتى ەمەس ەدى, سوعان قاراماستان سۇرەڭسىز ويناعان اقتوبەلىكتەر ءوز جانكۇيەرلەرىن جەرگە قاراتتى.
نە نارسەنىڭ دە دەڭگەيگە بارىپ تىرەلەتىنى بەلگىلى جايت قوي. ماسەلەن, كوماندالارىمىزدى كۇشەيتەدى دەپ سىرتتان جالدايتىن لەگيونەرلەرىمىزدىڭ دەڭگەيى جوعارى دەپ ايتا المايمىز. ويتكەنى دەڭگەيى جوعارى فۋتبولشى قازاقستان سياقتى رەيتينگى تومەن ەلدە دوپ تەپپەيدى. ارينە, ءبىزدىڭ ولشەممەن الىپ قاراعاندا, ولاردىڭ الاتىن جالاقىلارى جوعارى-اق.
جەرگىلىكتى اياقدوپشىلاردى دا الاقان جاياتىنداردىڭ ساناتىنا قوسا المايسىز. بىراق الەمدىك دەڭگەيدەگى دەمەي-اق قويايىق, ەۋروپاداعى ورتان قول كوماندالاردا وينايتىن فۋتبولشىلاردىڭ جالاقىلارى بىزدەگىمەن مۇلدەم سالىستىرۋعا كەلمەيدى. مىنە, لەگيونەرلەرىمىزدىڭ ءبىز كۇتكەندەي ويناي المايتىندارىنىڭ سىرى وسىندا ەكەنىن كوزىقاراقتى جانكۇيەرلەر ءبىز ايتپاي-اق بەس ساۋساقتاي بىلەدى. وسى سەبەپتى كوماندالارىمىزدان اسا جاقسى ناتيجە كۇتۋ كۇپىرلىك دەر ەدىك.
تەمىربەك ارىستانوۆ
قوستاناي وبلىسى
