ەڭ ءبىر ەسكەرىلمەي كەلە جاتقان كۇرمەۋلى ماسەلەلەرگە سۋ, ەنەرگيا تاپشىلىعى, ينفراقۇرىلىمدى دامىتۋ سىندى تۇيتكىلدەر ساۋاتتى ءبىر شەشىمىن كۇتىپ تۇرعانى جالپىعا ايان. بۇدان بولەك, بيۋدجەتتىك قاتىناستاردى رەتتەۋ دە بار.
سۋ شارۋاشىلىعىمەن اينالىساتىن جەكە سالالىق مينيسترلىكتىڭ قۇرىلۋى ماعان ەرەكشە اسەر قالدىردى. بيىلعى جازداعى قۋاڭشىلىق ءىس جۇزىندە كوپ تۇيتكىلدىڭ بەتىن اشتى. بىزدىڭشە بۇل جاڭا قۇرىلىم ۇلان دالامىزدى سۋمەن قامتۋ, تۇتاستاي العاندا سۋدى ۇنەمدەۋگە دە يگى ىقپالىن تيگىزەدى دەپ ويلاۋعا بولادى.
سۋدان كەيىنگى ماڭىزدىسى – جول ساپاسى. جول جايلى بولۋى ءۇشىن ستاندارت قابىلدانۋى تۇسىنىكتى. جول قاۋىپسىزدىگى ەكونوميكامىزدىڭ وركەندەۋىنە بىردەن-ءبىر فاكتور.
ەندىگى ءبىر ويلانارلىق جايت. اتوم ستانساسىن سالۋ نە سالماۋ ساۋالى قازىر ءبارىمىزدىڭ الدىمىزدا كەسە كولدەنەڭ تۇر. سەمەي زاردابىنان سوڭ بۇل ءبىزدىڭ جۇيكەمىزدە دە, جۇرەگىمىزدە دە قارا داق بولىپ قالىپ قويعان. جاپونياداعى جارىلىستاردى الالىق. چەرنوبىلدەگى اپات. جويقىن جارىلىستار سالدارىن بۇقارا ءالى كۇنگە دەيىن تارتىپ كەلەدى. بۇل تاقىرىپقا ورالماق تۇگىلى, ايتۋدىڭ ءوزى سانامىزعا سارساڭ مەن ۇرەي ۇيالاتادى. وسىنداي كۇردەلى ساۋالدى حالىقتىڭ ەنشىسىنە قالدىرۋدىڭ ءوزى ەلدىڭ بولاشاعىنا دەگەن تەرەڭ سەنىمنىڭ كورىنىسى دەپ باعامدارلىق. اتوم ەنەرگەتيكاسى قازاقستانعا قاجەت! بۇل مەنىڭ جەكە پىكىرىم. وسى ارادا سالالىق مامانداردىڭ دايارلانۋى دەگەن دۇنيە قىلاڭىتادى. كىمنىڭ تەحنولوگياسىن الامىز؟ ەۋروپانىڭ دامىعان قاۋىپسىز تەحنولوگياسىن ەنگىزۋدىڭ ومىرلىك ءمانى بار. رەفەرەندۋم – وسى سۇراقتىڭ وركەنيەتتى جاۋابى.
جەرگىلىكتى باسقارۋدى ءارى قاراي دامىتۋ. اۋدان جانە قالا اكىمدەرىنىڭ سايلاۋى. ءار ايماق باسشىسى جاۋاپكەرشىلىكتى الۋى ءۇشىن قازىنالىق دەربەستىگى بولۋى شارت. كورپاراتيۆتىك سالىق. قوسىلعان قۇن سالىعى. بيۋدجەتارالىق قوعالىستىڭ قولايىن جاعاتىن امالدار مۇنىڭ ءبارى. تۇپتەپ كەلگەندە قارجىلىق ساياساتتىڭ وڭتايلانۋى ءار ايماقتىڭ ەركىن دامۋىنا تىڭ مۇمكىندىك.
سەرىكجان بايبوسىنوۆ,
پرەزيدەنت جانىنداعى مەملەكەتتىك باسقارۋ اكادەمياسى
قاراعاندى وبلىسى فيليالىنىڭ ديرەكتورى
