كوللاجدى جاساعان –زاۋرەش سماعۇل, «ەQ»
پرەزيدەنت ءسوز باسىندا ايتقانداي, مۇعالىمدەر مەن دارىگەرلەردىڭ ەڭبەكاقىسى ءوستى. ميلليونعا جۋىق ەل تۇرعىنى زەينەتاقى جيناعىنىڭ ءبىر بولىگىن پايدالانىپ, تۇرعىن ءۇي ماسەلەسىن شەشتى. مۇنىڭ بارلىعى راس. قازىرگى تاڭدا «جايلى مەكتەپ» جوباسى اياسىندا 400-گە جۋىق مەكتەپ سالۋ قولعا الىنعان. اۋىلدىق جەردە 300-دەن استام دەنساۋلىق ساقتاۋ نىسانى سالىنىپ جاتىر. «ۇلتتىق قور – بالالارعا» جوباسى دا كەلەر جىلدان باستاپ جۇزەگە اسپاق. سونىمەن قاتار يگەرىلمەي جاتقان نەمەسە زاڭسىز بەرىلگەن 8 ميلليون گەكتار جەر مەملەكەت مەنشىگىنە قايتارىلعانىن جەتكىزدى پرەزيدەنت. مۇنىڭ بارلىعى سوڭعى جىلدارداعى ەلەۋلى وزگەرىستەر دەۋگە بولادى.
ەندى جاڭا جولداۋىندا مەملەكەت باسشىسى سۋ رەسۋرستارى جانە يرريگاتسيا مينيسترلىگىنىڭ قۇرىلاتىنىن جەتكىزدى. كەيىنگى ۋاقىتتا سۋ تاپشىلىعى ءجيى كورىنىس بەرىپ كەلەدى. بۇل – ورتالىق ازيا مەملەكەتتەرىنە ورتاق ماسەلە. بۇل رەتتە قاسىم-جومارت كەمەل ۇلى: «ەلىمىز ءۇشىن سۋدىڭ ماڭىزى مۇناي, گاز نەمەسە مەتالدان كەم ەمەس. سۋ شارۋاشىلىعى جۇيەسىن ءتيىمدى دامىتۋ ماسەلەسىمەن دەربەس مەكەمە اينالىسۋى قاجەت دەپ سانايمىن», دەپ جاڭا مينيسترلىك قۇرۋدى تاپسىردى.
مەملەكەت باسشىسىنىڭ وندىرىستىك جاراقات تۋرالى جولداۋدا ايتۋى ونىڭ بۇل ماسەلەگە نازار اۋدارىپ وتىرعانىن كورسەتەدى. ءوندىرىس ءبىزدىڭ ءوڭىر ءۇشىن ءبىرىنشى كەزەكتە تۇر. سوندىقتان ءوندىرىس قاۋىپسىزدىگى ماسەلەسى وبلىس ءۇشىن ماڭىزدى. پرەزيدەنت ۇكىمەتكە جىل سوڭىنا دەيىن 2030 جىلعا دەيىنگى قاۋىپسىز ەڭبەك تۇجىرىمداماسىن قابىلداۋدى تاپسىردى. «بۇل قۇجات جۇمىس ورنىنداعى كاسىبي سىن-قاتەرلەردىڭ الدىن الۋعا جانە جويۋعا باعىتتالۋى كەرەك», دەپ اتاپ ءوتتى.
زارا شالاباەۆا,
قاراعاندى وبلىستىق
ءماسليحاتىنىڭ دەپۋتاتى
