اۋەلدە جاقسى قارقىنمەن باستالىپ, بالالاردى سپورتقا, شىعارماشىلىققا باۋليتىن ۇيىرمەلەر كوپتەپ اشىلعانى راس. مەملەكەتتىڭ قارجىلاندىرۋىمەن جەرگىلىكتى كاسىپكەرلەر بالالارعا ارنالعان ورتالىقتار جۇمىسىن قىزۋ باستاپ كەتكەنىن دە بىلەمىز. جوبا بالالارعا عانا ەمەس, جۇمىس ورىندارىنىڭ دا كوبەيۋىنە سەپتىگىن تيگىزدى. الايدا جول ورتاسىنا كەلگەندە اقشا بولىنبەي ءبىرشاما ۇيىرمە جابىلىپ تىندى. سوڭى سيىرقۇيىمشاقتانىپ كەتكەن باستامانىڭ باس-اياعىن ماتاعان ءتۇيىن شەشىلمەي كەلەدى. جاۋاپتى مينيسترلىك پەن جەرگىلىكتى اكىمدىكتەر تاراپىنان «قاراستىرامىز, بىراق ۋادە بەرە المايىز. كۇتىڭىزدەر...» دەگەننەن وزگە جاۋاپ بولماي تۇر.
«بالالار ۇيىرمەسى» قىزمەتىن قايتا قالپىنا كەلتىرگەن ءجون. وندا جاستارىمىز قولونەردىڭ جانە شىعارماشىلىقتىڭ باستاپقى نەگىزدەرىمەن تانىسار ەدى. بالالار ءۇشىن قاتەرلى بۇگىنگىدەي اۋمالى-توكپەلى زاماندا ولاردىڭ كۇش-جىگەرى مەن قىزىعۋشىلىعىن دۇرىس ارناعا باعىتتاۋ اسا ماڭىزدى. بالالار مەملەكەتىمىزدىڭ بولاشاعى ەمەس پە؟! اكىمدەردىڭ جۇمىسىن وسى ولشەم بويىنشا دا باعالايمىز», دەگەن مەملەكەت باسشىسىنىڭ تاپسىرماسى ءسوز كۇيىندە قالعانعا ۇقسايدى.
رەسمي مالىمەتكە سۇيەنسەك, رەسپۋبليكا بويىنشا جوبا نەگىزىندە 560 مىڭنان اسا بالا قامتىلماق. ال استانا قالاسى بويىنشا 86 188 بالا ۇيىرمەلەرگە بارۋعا ءتيىس. «بالالاردىڭ الەۋەتىن ارتتىرۋ ماقساتىندا وڭىرلەردە 86,7 ملرد تەڭگە ءبولىنىپ, ناتيجەسىندە 560 مىڭنان اسا بالا مەن ءجاسوسپىرىم تەگىن سپورت سەكتسيالارىمەن جانە شىعارماشىلىق ۇيىرمەلەرمەن قامتاماسىز ەتىلەدى. ەندىگى كەزەكتە وڭىرلەر پروتسەدۋرالىق ماسەلەلەردى جەدەلدەتىپ, تەز ارادا جۇمىسقا كىرىسۋى قاجەت. وسى ورايدا وبلىستىق سپورت باسقارمالارىنىڭ باسشىلارىمەن بىرلەسىپ جۇمىس اتقارۋ, مەملەكەت باسشىسى تاپسىرماسىن ساپالى ورىنداۋ – ورتاق مىندەت», دەگەن ەدى ەكس-مينيستر اسحات ورالوۆ.
وزدەرىڭىز بىلەتىندەي, قازىر ArtSport-پەن قاتار «DamuBala» پلاتفورماسى دا جۇمىس ىستەيدى. الايدا ناۋرىز ايىنان بەرى «DamuBala»-عا قارجى بولىنبەگەندىكتەن, ۇيىرمەلەرگە قاتىساتىن بالا سانى ازايىپ, كەيبىرى جۇمىسىن توقتاتقان. قانشاما بالا ءالى كەزەگىن كۇتىپ ءجۇر. ArtSport ۇيىمداستىرۋشىلارى بالاسىن تەگىن ۇيىرمەگە بەرۋگە كەزەكتە تۇرعان اتا-انالارعا ۋادە بەرۋدەن شارشاعانىن ايتادى.
– بىزگە بولىنەدى دەگەن 15 ملرد تەڭگەنىڭ 5,7 ملرد تەڭگەسى ءالى تيگەن جوق. سوعان بايلانىستى جۇمىسىمىز تۇرالاپ قالدى. اتا-انالار دا بالالارىن ۇيىرمەلەرگە بەرە الماي وتىر. كاسىپكەرلەردىڭ موينىندا عيماراتتى جالداۋ اقىسى, قىزمەتكەرلەرگە تولەيتىن جالاقىسى بار. ەلوردادا تەگىن ۇيىرمەگە تىركەلگەن 69 مىڭ بالانىڭ ءارى قارايعى «تاعدىرى» كۇنى بۇگىنگە دەيىن بەيمالىم بولىپ تۇر. سوندىقتان شىعارماشىلىق جانە سپورت باعىتىنداعى ArtSport ۇيىرمەلەرىنە 2023 جىلى بولىنگەن قارجىنى قايتا قاراپ, جىل سوڭىنا دەيىن جەتەتىن قاراجات كولەمىن ناقتىلاۋدى سۇرايمىز. سونداي-اق ۇكىمەتتەن استانا قالاسىنا 86 188 بالاعا بەكىتكەن 86 188 ۆاۋچەردى جىل بويىنا توقتاۋسىز تولىق كولەمىندە قارجىلاندىرۋ تەتىگىن قايتا ەسەپتەپ, كەم دەگەندە بولىنەتىن قاراجاتتى 15 ملرد تەڭگەگە دەيىن جەتكىزۋىن سۇراپ وتىرمىز, دەيدى ArtSport قاۋىمداستىعىنىڭ ءتورايىمى لانا بولات.
قاۋىمداستىق وكىلدەرىنىڭ شاعىمىن تىڭداعان استانا قالالىق ءماسليحاتىنىڭ دەپۋتاتى اسقار سماعۇلوۆ ماسەلەنى اكىمدىكپەن اقىلداسا وتىرىپ شەشۋ كەرەگىن ايتتى. «بىردەن قارجى بولىنەدى دەۋ قيىن» ەكەنىن دە ەسكەرتتى.
– ارينە, ءبىز دە بالالاردىڭ قاتارىنان قالماي, تەگىن ۇيىرمەلەرگە قاتىسۋعا مۇمكىندىك العانىن قالايمىز. ماسەلەنىڭ ءمان-جايىن ءتۇسىنىپ وتىرمىز. بىراق قارجى ءبولۋ يا بولمەۋدى اكىمدىك شەشەدى. مۇنى كۇن تارتىبىنە قويىپ, جاۋاپتى ادامداردان ناقتى جاۋاپ الۋعا تىرىسامىز. الايدا ايتا كەتەتىن ماسەلە بار. بۇل – پلاتفورما جۇيەسى. وندا ءبىراز ولقىلىق بار. وسىنداي ورتالىقتاردى تەكسەرۋ كەزىندە ۇيىرمەگە قاتىسپايتىن بالالاردىڭ دا تىزىمدە جۇرەتىنى انىقتالدى, دەدى ا.سماعۇلوۆ.
ال استانا قالالىق ەكونوميكا جانە بيۋدجەتتىك جوسپارلاۋ باسقارماسى اقشانىڭ ءبارى قىستان شىعۋعا, كارىز جۇيەلەرىن جوندەۋگە, جىلۋ ماسەلەلەرىن شەشۋگە جۇمسالعانىن العا تارتىپ وتىر.
اتا-انالاردىڭ ايتۋىنشا, مەكتەپتە 1 بالا 1 عانا ۇيىرمەگە تەگىن قاتىسا الادى. ەكى-ءۇش ۇيىرمەگە قاتار بارۋ ءۇشىن اقشا تولەۋ كەرەك. بيىل ۇيىرمەلەردىڭ اقىسى ەكى ەسە كوتەرىلدى. سوندىقتان كەيبىر اتا-انالاردىڭ قالتاسى بالانىڭ قالاۋىن كوتەرە المايدى. سونداي كەزدە ArtSport سەكىلدى پلاتفورمالاردىڭ قىزمەتى جاقسى كومەكتەسەدى. «مەملەكەتتىڭ قولداۋى بالالارىمىزعا ۇلكەن قۋانىش سىيلار ەدى», دەيدى اتا-انالار.
– بالالارىم «DamuBala» پلاتفورماسىنداعى ۇيىرمەلەرگە قاتىسىپ جۇرگەن ەدى. ولار ءوز قالاۋلارىمەن بىرنەشە ۇيىرمەگە باراتىن. «DamuBala» بالالارىمنىڭ بوس ۋاقىتىن ءتيىمدى پايدالانۋعا ءارى قىزىعۋشىلىقتارىن دامىتۋعا سەپتىگىن تيگىزدى. بىراق جۇمىس توقتاپ قالعاندا قاتتى قىنجىلدىم. ولار مەملەكەتتىك تەگىن ءبىر ۇيىرمەدەن بولەك باسقالارىنا دا قاتىسقىسى كەلەدى. بىراق بۇلار اقىلى. كوپبالالى انا بولعاندىقتان, تولەۋگە شامام كەلمەيدى, دەيدى 6 بالانىڭ اناسى.
تاپ-تاماشا باستاما ەدى. اتتەڭ سوڭى سۇيىلىپ بارادى...
