بۇگىندە «وسكەندە تانكيست بولام» دەيتىن بالانى از كەزدەستىرەتىنىمىز بەلگىلى. ءبىر جاعىنان, قۇدايدىڭ بەرگەن بەيبىت زامانى «ۇشقىش», «تانكيست» بولۋدى ارماندايتىن بالالاردىڭ سانىن بارىنشا ازايتسا, ەكىنشى جاعىنان تانك ايداۋدان كەيبىر جاس جەتكىنشەكتەر ۇرەيلەنەتىنى دە جاسىرىن ەمەس. بىراق ارامىزدا تانك سەكىلدى كەز كەلگەن كۇردەلى اسكەري تەحنيكانى ۇرشىقشا يىرە الاتىن قازاق جاستارى از ەمەس ەكەنىن دالەلدەپ جۇرگەن زامانداستارىمىز جەتەرلىك. سولاردىڭ ءبىرى – 3-سىنىپتى سەرجانت رۋستام مولداشەۆ.
ءتارتىپ پەن ءبىلىمدى, شىدام مەن ءتوزىمدى تالاپ ەتەتىن اسكەري سالانى تاڭداعان كەيىپكەرىمىز قوستاناي وبلىسىنىڭ پريدوروجنوە اۋىلىندا ءومىر ەسىگىن اشقان. اسكەري قىزمەتىن 2013 جىلى كەلىسىمشارت بويىنشا «شىعىس» وڭىرلىك قولباسشىلىعىنا قاراستى اياگوز گارنيزونىنىڭ تانك بريگاداسىندا كوزدەۋشى-وپەراتور بولىپ باستاعاندا بۇل قىزمەتتىڭ ءوزىنىڭ وڭ جامباسىنا كەلەتىنىن بىردەن بايقاپتى. «مەرزىمدى اسكەري قىزمەتىمدى اياقتاعاننان كەيىن ءوز قالاۋىممەن وسى سالاعا ءبىرجولا بەت بۇردىم» دەيدى ول.
قازىرگى ۋاقىتتا 10810 اسكەري ءبولىمىنىڭ 1-تانك باتالونىندا روتا سەرجانتى لاۋازىمىندا قىزمەت اتقارادى. ول وزىنە سەنىپ تاپسىرىلعان ت-72 اۋىر ۇرىس تەحنيكاسىن تياناقتى مەڭگەرگەن. ءوز بىلگەنى مەن كوكەيگە تۇيگەنىن ۇيرەتۋدەن جالىقپايتىن سەرجانت قىزمەتتىڭ حاس مامانى بولۋ ءۇشىن ءاردايىم ءبىلىمىڭدى ارتتىرىپ وتىرۋ كەرەك دەگەن پىكىردى ۇستانادى. «دەگەنمەن تانكيست بولام دەيتىن ادامنىڭ جۇرەگىنەن, ەڭ الدىمەن, وتانشىلدىق سەزىمى ورىن الۋى كەرەك دەپ ويلايمىن. ەكىنشىدەن, بولاتتاي مىقتى بولۋ قاجەت» دەيدى ول.
ەلىمىزدىڭ قارۋلى كۇشتەرىندە 10 جىلدان استام قىزمەت ەتىپ كەلە جاتقان رۋستامنىڭ اسكەري قىزمەتتەگى جەتىستىكتەرى از ەمەس. اتاپ ايتقاندا, ول اسكەريلەردىڭ حالىقارالىق ويىندارى اياسىنداعى «تانك بياتلونى» سايىسىندا قارۋلى كۇشتەرىمىزدىڭ قاتارىندا ونەر كورسەتىپ, ەل نامىسىن قورعاپ, 2016, 2017, 2019 جانە 2021 جىلدارى كوماندالىق ەسەپتە جۇلدەلى ورىنداردى يەلەندى. بۇل جارىستاردا ول تانكتە كوزدەۋشى قىزمەتىن اتقارعان. وسىنداي جەتىستىكتەرىنىڭ ارقاسىندا ونىڭ قاجىرلى ەڭبەگى باعالانىپ, قورعانىس ءمينيسترىنىڭ قولىنان حالىقارالىق ويىندارىندا كورسەتكەن شەبەرلىگى مەن ادال قىزمەتى ءۇشىن 2017 جىلى ء«ىى دارەجەلى ەل قورعانى» مەدالىن الدى.
ايتا كەتسەك, قازىرگى تاڭدا مەرزىمدى اسكەري قىزمەتكە كەلگەن جىگىتتەرگە گۆاردەيسك گارنيزونىندا تانك باسقارۋ ماماندىعى وقىتىلادى. «ەلىمىزدىڭ ارمياسىندا ت-72 ۇرىس تانكىلەرى قولدانىلادى جانە ولار كەز كەلگەن قاۋىپكە تويتارىس بەرۋگە 100% دايىن دەپ ايتا الامىن. مەن قازىر اياگوز گارنيزونىنداعى تانك بريگاداسىندا قىزمەت اتقارامىن. ارتىق ايتقاندىق ەمەس, ءبىز كۇن سايىن ءوز شەبەرلىگىمىزدى شىڭدايمىز. كۇندەلىكتى جاۋىنگەرلىك جوسپارعا سايكەس كوپتەگەن تاجىريبەلىك جاتتىعۋلاردى جاسايمىز» دەيدى رۋستام مولداشەۆ.
ءبىزدىڭ كەيىپكەرىمىز قىزمەتتە ادال دوس, سەنىمدى قارۋلاس بولسا, ۇيىندە ونەگەلى اكە. ومىرلىك سەرىگى مارينا مولداشوۆامەن اسكەري قىزمەتتە ءجۇرىپ تانىسىپ, بۇگىندە ءومىردىڭ ىستىق-سۋىعىن بىرگە كورىپ كەلەدى. مولداشوۆتار وتباسىندا جاسۇلان, جاسمين جانە سانجار ەسىمدى ءتاتتى بالاپاندار ءوسىپ كەلەدى.
قىزمەت جولىندا ءتۇرلى بەلەستەردى وتكەرگەن, سابىرلى مىنەزىمەن ءوز ورتاسىندا بەدەلدى رۋستامنىڭ ارىپتەستەرى دە ونىڭ ەڭبەكسۇيگىش, تاباندى جان ەكەنىن جاسىرمايدى. «ول ءوزىنىڭ ءتارتىبى جانە بەرىلگەن تاپسىرمالاردى تىڭعىلىقتى ورىنداۋىمەن ارىپتەستەرىنە ۇلگى. جاۋىنگەرلىك دايارلىق ساباقتارىندا ارقاشان جوعارى دەڭگەيدەن كورىنەدى. بايراقتى باسەكەلەردە ەلىمىزدىڭ ابىرويىن اسقاقتاتىپ جۇرگەن باتىر ۇلدىڭ بىزبەن بىرگە قىزمەت اتقاراتىنىن ماقتان ەتەمىز», – دەيدى 1-تانك باتالونىنىڭ كومانديرى, مايور رينات ساعىندىقوۆ.
ءبىز اڭگىمە سوڭىندا رۋستامعا «ەلىمىزدىڭ ءوز تانكىلەرى قاشان شىعادى؟» دەگەن توسىن سۇراقتى قويدىق. «قازىرگى تاڭدا بىزدە تانكىلەرگە كۇردەلى جوندەۋ جاسايتىن كاسىپورىندار بار. ال ءوز تانكىمىزدى شىعارۋ بولاشاقتىڭ ەنشىسىندە دەگەن سەنىمدەمىن. سەبەبى تانك – قۇرلىق اسكەرلەرىنىڭ ەڭ جويقىن كۇشى» دەپ جاۋاپ بەردى.
ايتپاقشى, 15 قىركۇيەكتە ەلىمىزدە تانكيستەر كۇنى اتالىپ وتەدى. مەرەكە قارساڭىندا ءوز ءىسىنىڭ مايتالمانىنا قىزمەتتە تابىستى بولۋىن, ارتىنان ءوزى سەكىلدى تانك تىزگىندەگەن باتىرلار ەرە بەرۋىن تىلەدىك.
