كەڭەس مۇشەلەرى «لۋدومانيانىڭ الدىن الۋ جونىندەگى كەشەندى جوسپاردى» ازىرلەۋ مەن ىسكە اسىرۋدىڭ ۋاقتىلىعى مەن قاجەتتىلىگىن, سونداي-اق 4 قىركۇيەكتە قاۋىپسىزدىك كەڭەسىنىڭ وتىرىسىندا ايتىلعان مەملەكەت باسشىسىنىڭ تاپسىرمالارىن ىسكە اسىرۋدىڭ ماڭىزدىلىعىن اتاپ ءوتتى. ونىڭ بارىسىندا حالىق اراسىندا, اسىرەسە جاستار اراسىندا تاربيە جانە ءتۇسىندىرۋ شارالارى بولىگىندە ويىنعا تاۋەلدىلىك ماسەلەلەرى قارالدى.
جيىن بارىسىندا تۋريزم جانە سپورت ۆيتسە-ءمينيسترى ەرجان ەركىنباەۆ قازاقستان پرەزيدەنتى جانىنداعى جاستار ساياساتى جونىندەگى كەڭەس مۇشەلەرىنە «ويىن بيزنەسى جانە لوتەرەيا قىزمەتى سالاسىنداعى مەملەكەتتىك رەتتەۋدى جەتىلدىرۋ, لۋدومانيانىڭ الدىن الۋ جونىندەگى كەشەندى جوسپاردىڭ» جوباسىن تانىستىردى.
تالقىلاۋ قورىتىندىسى بويىنشا كەڭەس مۇشەلەرى «لۋدومانيانىڭ الدىن الۋ ماسەلەلەرى جونىندەگى كەشەندى جوسپاردىڭ» جوباسىنا بىرقاتار شارالاردى ەنگىزۋ, اسىرەسە جاستار اراسىندا ويىنعا تاۋەلدىلىكپەن كۇرەس جونىندەگى اقپاراتتىق-يدەولوگيالىق شارالاردى كۇشەيتۋ, سونىمەن قاتار ەلدەگى لۋدومانيانىڭ دامۋىنا جول بەرمەۋگە ىقپال ەتەتىن الەۋمەتتىك كوزقاراستاردى قالىپتاستىرۋعا ازاماتتىق قوعام, ءدىني قىزمەتكەرلەر مەن بۇقارالىق اقپارات قۇرالدارىنىڭ وكىلدەرىن تارتۋ بويىنشا بىرقاتار ۇسىنىس ەنگىزدى.
بۇدان بولەك, كەشەندى جوسپاردى ىسكە اسىرۋدىڭ ساپاسى مەن تيىمدىلىگىن ارتتىرۋ ماقساتىندا ءاربىر باعىت بويىنشا كەڭەس مۇشەلەرى, قوعامدىق پىكىر كوشباسشىلارى, بلوگەرلەر مەن ساراپشىلار كىرەتىن سالالىق جۇمىس توپتارىن قۇرۋ جونىندە شەشىم قابىلداندى.
