«زاماناۋي ۇلگىدەگى ەكى مەكتەپتە ءبىلىم الۋعا نيەتتەنگەن وقۋشىلار قاتارى كوبەيدى. ءبىلىم ساپاسىن كوتەرۋ, بالالارعا تولىققاندى جاعداي جاساۋ ءۇشىن تاعى دا ەكى Binom مەكتەبىن اشۋ تۋرالى شەشىم قابىلداندى. بۇل مەكتەپتە بارلىق مۇمكىندىك بار. سوعان ساي مەكتەپ تە ۇزدىكتەردىڭ ءبىرى بولۋى قاجەت», دەدى وبلىس اكىمى سەرىك شاپكەنوۆ.
ماسەلەن, د.قوناەۆ اتىنداعى Binom مەكتەبىندە 4 مىڭ وقۋشى ءبىلىم الادى. مۇندا بارلىعى 160 سىنىپ اشىلعان. ماسەلەن, 22 ليتسەي سىنىبىندا 550 بالا وقيدى. ال 10, 11-سىنىپتاردا جاراتىلىستانۋ-ماتەماتيكا باعىتىندا وقىتىلادى. مەكتەپ ديرەكتورى ءلاززات دۇيسەنباەۆانىڭ ايتۋىنشا, ءبىلىم ورداسىنىڭ اۋماعى 22 مىڭ شارشى مەتردى قۇرايدى. مۇندا 94 كابينەت, ونىڭ ىشىندە فيزيكا, حيميا, بيولوگيا پاندەرىنە ارنالعان التى كەڭەيتىلگەن زەرتحانا مەن زەرتحانالىق بولمەسى بار. ءبىلىم ورداسى سەگىز ينفورماتيكا كابينەتىمەن, ەكى سپورتزال, حورەوگرافيا زالى, 48 ورىندىق مۋلتيمەديا سىنىبى, 50 ورىندىق كينوزال, 300 ورىندىق اكت زالى, ويىن بولمەلەرىمەن قامتىلعان. ال كىتاپحاناعا 10 مىڭ كىتاپ قويىلعان. سونداي-اق 75 ورىندىق مونوبلوگى بار «تانىم» شىعارماشىلىق تەحنولوگيالار ورتالىعى, اسحانا مەن مەديتسينالىق پۋنكت وقۋشىلاردىڭ يگىلىگىنە قىزمەت ەتەدى. ءبىلىم ورداسىندا پىشىندەر مەن ماتەريالدارمەن شىعارماشىلىق ەكسپەريمەنت جاساۋ ءۇشىن 3D-پرينتەر, مەتالل, اعاش ويۋ, ماتا وڭدەۋ, تەحنولوگيا, اسپازدىق شەبەرحانالار, روبوتتەحنيكا كابينەتى بار. سونداي-اق STEAM ءبىلىم بەرۋ كابينەتىمەن, ءار وقۋشىعا ارنالعان جەكە لوكەرمەن قامتىلعان. عيمارات ەرەكشە ءبىلىم بەرۋ قاجەتتىلىگى بار بالالار ءۇشىن جەدەلساتىمەن, پاندۋستارمەن جابدىقتالعان.
وڭىردە جاڭادان اشىلعان ءبىلىم وشاقتارىنىڭ ءبىرى – جاڭاتالاپ اۋىلىنداعى «سارمات» مامانداندىرىلعان مەكتەپ-ينتەرناتى. العاش رەت ەسىگىن اشقان ءبىلىم ورداسىنىڭ 7,8 جانە 9-سىنىبىندا 150 وقۋشى وقيدى. وقۋشىلارعا 14 مۇعالىم ءدارىس بەرەدى. ال كەلەسى جىلى وقۋشىلار سانىن 300-گە جەتكىزۋ كوزدەلىپ وتىر.
«بۇل مەكتەپ-ينتەرناتتا وقۋشىلارعا جالپى ورتا بىلىممەن بىرگە اسكەري ءىستىڭ قىر-سىرى وقىتىلادى. «سارمات» مەكتەپ-ينتەرناتى – كوپتەن كۇتكەن جوبانىڭ ءبىرى. عيمارات قۇرىلىسى باستالعالى بەرى ءبىلىم ورداسىنىڭ تۇجىرىمداماسى, تاربيەلىك
جۇمىس باعىتى ايقىندالدى. مەكتەپ-ينتەرناتقا قابىلدانۋ ءۇشىن وقۋشىلار نورماتيۆ تاپسىرىپ, تەستىلەۋدەن ءوتتى. وقۋشىلاردىڭ اراسىنان ۇزدىكتەرى تاڭدالدى. ءبىلىم مەن تاربيە – اجىراماس ۇعىم. مۇندا وقۋشىلارعا ساپالى بىلىمگە قوسا, ۇلتتىق تاربيە بەرىلەدى. وسىندا ءدارىس الاتىن ءار تۇلەك وتانىنا ادال قىزمەت ەتەتىن وفيتسەرلەر كورپۋسىنىڭ قاتارىن تولىقتىرادى», دەدى اتىراۋ وبلىسى اكىمىنىڭ ورىنباسارى جاسۇلان بيسەمبيەۆ.
«سارمات» مامانداندىرىلعان مەكتەپ-ينتەرناتىندا جاراتىلىستانۋ-ماتەماتيكا باعىتىنداعى فيزيكا, بيولوگيا, حيميا, گەوگرافيا پاندەرى تەرەڭدەتىلىپ وقىتىلادى. سونداي-اق اسكەري بەيىندىك پاندەر, سپورت, العاشقى اسكەري دايىندىق, بي, ءان, دومبىرا سىندى ۇيىرمەلەر اشىلعان. مەكتەپ-ينتەرناتتىڭ جانىندا ءۇش قاباتتى جاتاقحانا سالىنعان. وقۋشىلارعا اسكەري ۇلگىدەگى كيىم, بەس مەزگىل تاماق تەگىن بەرىلەدى. پاندىك سىنىپتاردان بولەك, اسكەري دايىندىق ءۇشىن ارنايى جاتتىعۋ الاڭى, زاماناۋي زەرتحانالار جانە كىتاپحانامەن قامتىلىپ وتىر.
اتىراۋ وبلىسى
