شوتلانديا استاناسىنداعى فەستيۆال قالىپتاسقان ءداستۇر بويىنشا تامىز ايىندا ءۇش اپتا بويى وتكىزىلىپ, كورىنىستەرى مەن كونتسەرتتەرىن جىل سايىن ەكى ميلليونعا جۋىق كورەرمەن تاماشالايدى. اتالعان فەستيۆال كورەرمەندەرىنىڭ نازارىنا قازاقستان ونەرى العاش رەت ۇسىنىلدى. EEGERU ءانسامبلىنىڭ فەستيۆالگە ساپارى «دارا» قايىرىمدىلىق قورى قولداۋىمەن ۇيىمداستىرىلدى.
EEGERU كونتسەرتى Queen’s Hall ساحناسىندا ءوتىپ, انسامبل قازاقستاندىق كومپوزيتورلاردىڭ شىعارمالارىن, سونداي-اق شەتەلدىك اۆتورلاردىڭ بىرنەشە كومپوزيتسياسىن ورىندادى. اتاپ ايتقاندا, ەدينبۋرگتە العاش رەت قۋات شىلدەباەۆتىڭ «قاراكەمەر» جانە ارتىق توقسانباەۆتىڭ My Respect to You, Mr. Tattimbet تۋىندىلارى ورىندالدى. كونتسەرتتىڭ ەرەكشە ءنومىرى – شوتلاند كومپوزيتورى كلەر دجونستوننىڭ EEGERU ءانسامبلى ءۇشىن ارنايى جازعان Call of The Mountains كومپوزيتسياسى. كومپوزيتور شىعارماسىنا تەك كلاسسيكالىق اكۋستيكالىق جانە تسيفرلىق اسپاپتاردى عانا ەمەس, سونداي-اق قازاق قىلقوبىزىن دا قوسقان.
سونىمەن قاتار كونتسەرتتەن كەيىنگى كۇندەرى – 28-29 تامىزدا, EEGERU-ءدىڭ ەرەكشە قاجەتتىلىكتەرى بار مۋزىكانتتار مەن كومپوزيتورلاردىڭ مۇمكىندىگىن كەڭەيتۋمەن اينالىساتىن شوتلانديانىڭ جەتەكشى ينكليۋزيۆتى ونەر ۇيىمى Drake Music Scotland-تا ونەر كورسەتتى. قازاقستان ارتىستەرى شوتلانديالىق ارىپتەستەرىنە شەبەرلىك ساباعىن وتكىزىپ, ولاردى قىل-قوبىز ۇلتتىق اسپابىمەن, ونىڭ مۇمكىندىكتەرىمەن تانىستىردى.
«وسىنداي اۋقىمدى فەستيۆالدە ونەر كورسەتۋ ءبىزدى جىگەرلەندىرەدى ءارى ينكليۋزيۆتى مۋزىكالىق ءبىلىم بەرۋدە شەتەلدىك ارىپتەستەرىمىزدەن تاجىريبە الۋعا جول اشادى. قازىرگى الەمدەگى ينكليۋزيۆتى وقىتۋ جاڭا تەحنولوگيالارمەن تىكەلەي بايلانىستى جانە شوتلاند مۋزىكانتتارى بۇل باعىتتى كوپتەگەن جىل بويى دامىتىپ كەلەدى. قازاقستاندا ينكليۋزيا ماسەلەلەرىمەن جۇيەلى تۇردە «دارا» قورى اينالىسادى. ءبىز شوتلاند مۋزىكانتتارى مەن مۋزىكا اۋەسقويلارىنىڭ قازاق مۋزىكاسىنا دەگەن قۇشتارلىعىن وياتا الدىق دەگەن ۇمىتتەمىز», دەيدى EEGERU ءانسامبلىنىڭ ديرەكتورى راۋشان جۇمانيازوۆا.
