جىل سوڭىنا دەيىن جالعاساتىن ناۋقان اياسىندا جەرگىلىكتى اتقارۋشى ورگانداردىڭ پۋنكتتەرىندە 195 قالالىق جانە اۋداندىق شاقىرۋ كوميسسياسى جۇمىس ىستەپ جاتىر. بيىلعى اسكەرگە قابىلداۋدىڭ ەرەكشەلىگى – بارلىق ءىس-شارا اشىق تۇردە وتەدى, سوندىقتان كوميسسيا جۇمىسىن ساربازداردىڭ انالارى مەن قوعامدىق كوميتەت وكىلدەرى باقىلاي الادى.
وسى كۇزدە اسكەر قاتارىنا 19 مىڭنان استام جاس الىنادى دەپ كۇتىلىپ وتىر. ونىڭ ىشىندە قارۋلى كۇشتەر قاتارىنا 8 مىڭنان استام, ۇلتتىق ۇلانعا – 6 مىڭ, ۇقك شەكارا قىزمەتىنە – 3 مىڭ, مەملەكەتتىك كۇزەت قىزمەتىنە جانە توتەنشە جاعدايلار مينيسترلىگىنە 300 ادام شاقىرىلادى.
ازاماتتاردى مەرزىمدى اسكەري قىزمەتكە دايارلاۋ جانە اسكەرگە شاقىرۋ – ۇزدىكسىز جۇرگىزىلەتىن ءۇردىس. ۋچاسكەلەرگە تىركەلگەن ساتتەن جەرگىلىكتى اسكەري باسقارۋ ورگاندارى اسكەرگە شاقىرىلۋعا جاتاتىن ازاماتتاردى جۇيەلى تۇردە زەردەلەۋدى باستايدى. ول ءۇشىن ونىڭ قۇجاتتارىن وقىپ قانا قويماي, جاس جىگىتتەرمەن تاجىريبە جۇمىستارى دا جۇرگىزىلەدى.
كەزەكتى ناۋقان قارساڭىندا بارلىق وڭىردە شاقىرۋ كوميسسيالارىن باسقاراتىن وبلىس, قالا جانە اۋدان اكىمدەرى ورىنباسارلارىنىڭ باسشىلىعىمەن شاقىرۋ جانە مەديتسينالىق كوميسسيالارى مۇشەلەرىمەن نۇسقاۋ-ادىستەمەلىك ساباقتار ءوتتى. مەملەكەت باسشىسىنىڭ تاپسىرماسىمەن قورعانىس ۆەدومستۆوسى مۇددەلى مەملەكەتتىك ورگاندارمەن بىرلەسىپ, مەرزىمدى اسكەري قىزمەتشىلەردىڭ جانە ولاردىڭ وتباسى مۇشەلەرىنىڭ الەۋمەتتىك ءال-اۋقاتىن جاقسارتۋ ءۇشىن مەرزىمدى اسكەري قىزمەتتىڭ ابىرويىن ءوسىرۋ جانە بەدەلىن ارتتىرۋ جونىندەگى جۇمىستى جولعا قويعان. سونىڭ ءبىرى – بۇگىندە مەرزىمدى قىزمەتكە الىنعان ساربازدارعا نەسيەلىك كانيكۋل بەرىلەدى. ياعني ول اسكەردەن ورالعانشا نەسيە تولەۋ شەگەرىلەدى.
قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ وقۋ ورتالىقتارىندا ساربازدار اسكەري-ەسەپتەگى ماماندىقتار بويىنشا دايارلانىپ, ولارعا مەملەكەتتىك ۇلگىدەگى كۋالىك بەرىلەدى. بۇلار – ەل ەكونوميكاسى ءۇشىن سۇرانىستاعى ماماندىقتار.
قورعانىس مينيسترلىگى 70-تەن استام جوعارى جانە جوعارى وقۋ ورنىنان كەيىنگى ءبىلىم بەرۋ مەكەمەسىمەن مەرزىمدى اسكەري قىزمەت وتكەرگەن ازاماتتار ءۇشىن ءبىلىم بەرۋ سەكتورىندا قوسىمشا جەڭىلدىكتەر بەرۋ تۋرالى كەلىسىمگە قول قويدى. بيىل جوعارى وقۋ ورىندارىنا تەگىن ءبىلىم الۋ ءۇشىن اسكەردە قىزمەت ەتكەن 180-نەن اسا, اقىلى تۇردە وقۋعا 400-دەن اسا ادام ءتۇستى.
قازىرگى ۋاقىتتا اسكەري مىندەتتىلەر مەن اسكەرگە شاقىرىلۋشىلاردى ەسەپكە قويۋ جانە شىعارۋ تۇرعىلىقتى جەرى وزگەرگەن كەزدە اۆتوماتتى تۇردە جۇزەگە اسىرىلاتىنىن بىلگەن ءجون. سول سياقتى جۋىردا شاقىرۋ ۋچاسكەلەرىنە تىركەۋ تۋرالى كۋالىكتەر بەرۋ جانە بورىشىن وتەمەگەن ازاماتتارعا اسكەري بيلەتتەر بەرۋ ءۇردىسى جويىلادى.
